2 ―Jchanubtasvanej, ¿much'u ta smul ti ma'sat i'ayan li jchi'iltic le'e? ¿Mi ta smul stuc, o mi ta smul stot sme'? ―xcuticotic vo'oticotic ti yajchanc'opoticotique.

3 ―Mu ta smuluc stuc, mi ja'uc ta smul stot sme'. Ti ma'sat i'ayane, ja' yo' xvinaj o slequilal syu'elal ti Rioxe. 4 Ti c'u sjalil li' cuxulon ta sba balamile, persa ta jpas ti c'usi tsc'an ti Jtote ti listac tale yo' to xu' jpas, yu'un po'ot xa xismilic. 5 Ti c'u sjalil li'on ta sba balamile, co'ol xchi'uc aluzicon ya'el vo'oxuc ti li'oxuc ta sba balamile, yu'un chcac' avilic c'u x'elan yo'on ti Rioxe ―xiyutoticotic ti Jesuse.

6 C'alal laj yal chac taje, istubta balamil, ispas jset' ach'el. Ja' isjaxbe ta xcha'p'ejel sat ti ma'sate.

7 ―Ba poco lasate yo' bu li tanqueal vo' Siloee ―xut. Li Siloee “tacbil” xi smelol.

Ba spoc sat ti ma'sate. C'alal isute, xil xa osil yu'un ijam ti sate. 8 Ti slac'nataque xchi'uc ti much'utic yilojic onox ti ma'sate, ja' yech lic yalbe sbaic:

―Li vinic le'e ¿mi ma'uc ti q'uex no'ox tey tsc'an limoxnae? ―xut sbaic.

9 ―Ja' ―xiic jlom.

―Ma'uc, yu'un oy xco'olaj satic ―xiic jlom.

―Vo'on ti ma'saton to'oxe ―xi ti vinique.

10 ―¿C'uxi ijam lasate? ―xutic.

11 ―Ja' ispas jset' ach'el li jchi'iltic Jesús sbie. Ja' lisjaxbe ta xcha'p'ejel jsat. C'alal laj sjaxbee, “batan, ba poco lasate yo' bu li tanqueal vo' Siloee”, xiyut. Ay jpoc, ja' ijam o. Lavie xquil xa osil ―x'utatic yu'un ti vinique.

12 ―¿Bu ma un? ―xutic.

―Mu jna' bu ibat ―xi.

13 Ti ma'sat to'oxe iyiq'uic ech'el ta stojol jfariseoetic. 14 Ta sc'ac'alil ox ta jcuxticotic ti ispas jset' ach'el ti isjambe o sat vinic ti Jesuse.

15 Ti jfariseoetique isjac'beic c'uxi ijam ti sate.

―Lisjaxbe jset' ach'el, ts'acal to ay jpoc li jsate, ja' ijam o ―xi ti vinique.

16 ―Mu xich' ta muc' Riox li vinic chavale yu'un mu xchabi li sc'ac'alil ta jcuxtique ―xiic jayvo' ti jfariseoetique.

―Ti much'u oy smule mu xjam yu'un sat ma'satetic chac c'u cha'al ispas taj vinique ―xiic jlom.

Lic yut sbaic ti jfariseoetique ja' ti mu co'oluc ti c'usi isnopique. 17 Isjac'beic noxtoc ti vinique:

―Li vo'ote ¿much'u lasjambe asat ti avaloje? ―xutic.

―Chcal vo'one, ja' yaj'alc'op Riox ―xi.

18 Ti jfariseoetique mu xch'unic ti ja' ti ma'sat to'oxe. Ja'to ixch'unic ti c'alal istacbeic ta iq'uel ti stot sme'e. 19 C'alal ic'ot ti stot sme'e ―¿Mi ja' acremic li'i ti ma'sat i'ayan chavalique? ¿C'uxi ijam li sate? ―xutic.

20 ―Ja' jcremticotic ti ma'sat i'ayane. 21 Mu jna'ticotic c'uxi ijam li sate. Mu jna'ticotic noxtoc much'u ijambon o. Jac'beic stuc yu'un oy xa xch'ulel ―xi ti stot sme'e.

22 Ti x'elan iyal ti stot sme'e, yu'un xi'emic o ti cajmeltsanejc'opticotique. Yu'un ti jmeltsanejc'opetique yalojic xa ti mu xu' ch-ochic ta junuc templo ti much'utic jamal chalbe sc'oplal ti Jesuse ti ja' ti much'u sc'oplal onox chtal spasoticotic ta mantale. 23 Yech'o ti “jac'beic stuc yu'un oy xa xch'ulel”, xi ti stot sme'e.

24 Ti jmeltsanejc'opetique istaquic ta iq'uel noxtoc ti ma'sat to'oxe.

―Alo ti ja' lasjambe asat ti Rioxe. Li vinic chavale, jna'ojticotic ti oy smule ―xutic.

25 ―Mu jna' mi oy smul, ja' no'ox ti lisjambe xa li jsate ―xi.

26 ―¿C'uxi isjam lasate? ―xutic noxtoc.

27 ―Lacalbeic xa. Mu xach'unic tajmec. ¿C'u yu'un ti chajaq'uic noxtoque? ¿Mi chac'an chachi'inic uc? ―x'utatic yu'un ti vinique.

28 ―Li vo'ote achi'inoj xa. Li vo'oticotique ja' ta jch'unticotic c'usi yaloj ti Moisese. 29 Jna'ojticotic ti isc'opon sbaic xchi'uc ti Rioxe. Taj chavale, mu jna'ticotic bu liquem tal ―xiic ti jmeltsanejc'opetique.

30 Itac'av ti vinique:

―Mu jch'un jna' ti mu xana'ic une yu'un avilic xa ti lisjambe li jsate. 31 Ti Rioxe jna'ojtic ti mu xich'be ta muc' c'usi chalic ti much'utic mu x'ich'on o ta muq'ue. Yan ti much'utic ch-ich'on ta muq'ue, ti tspasbeic c'usi tsc'ane, chich'be ta muc' li c'usi chalique. 32 Ta spasel balamil mu onox bu xca'itic mi oy much'u chjam yu'un sat ti much'u ma'sat i'ayane. 33 Ti manchuc tacbil tal yu'un Riox li much'u chcale, mu c'u xu' spas ti yechuque ―x'utatic ti jmeltsanejc'opetique.

34 C'alal iya'iic chac taje, islabanic:

―Yu'un chopolot li vo'ote, yech'o ti ma'sat la'ayane. Pero lavie vo'ot xa chac'an chachanubtasoticotic ―xutic.

Isnutsic loq'uel ta templo.

35 Ti Jesuse iya'i ti inutse loq'uel ta templo ti ma'sat to'oxe. Isa'e yu'un ti Jesuse. C'alal itae, ijac'bat:

―¿Mi ach'unoj ti talem xa Xch'amal ti Rioxe? ―x'utat.

36 ―Totic, ¿bu li Xch'amal Riox chavale? Ta jch'un ―xi ti vinique.

37 ―Li' aq'uelojbe sate. Vo'on ti li' chajc'opone ―x'utat yu'un ti Jesuse.

38 C'alal iya'i ti vinique, isquejan sba ta yichon ti Jesuse,

―Cajval, ta jch'un ti vo'ot Xch'amalot ti Rioxe ―xut.

39 ―Ti lital li' ta sba balamile, ja' yo' xvinaj o c'u x'elan yo'on li crixchanoetique. Ti much'utic mu sna'ic ti c'uxi chcuxiic ta sbatel osile, ti sna'ojic ti chopol sjolique, ta onox x'ac'bat xch'unic yu'un ti Rioxe ti vo'on chcac'be scuxlejalique. Co'ol xchi'uc chjambat ya'el li satique. Yan ti much'utic lec c'usitic tspasic ti yalojique, ti ja' chcuxiic o ta sbatel osil ti yalojique, mu x'ac'bat xch'unic ti vo'on chcac'be scuxlejalic ta sbatel osile. Co'ol xchi'uc tspasatic ta ma'sat ya'el ―x'utat yu'un ti Jesuse.

40 Ti jlom jfariseoetique ti tey xchi'uquic ti Jesuse, c'alal iya'iic ti x'elan iyal ti Jesuse,

―Ti avaloje, yu'un ma'satoticotic uc ―xutic.

41 ―Ti ma'saticoxuque, ch'abal amulic ti yechuque. Ja' amulic ti lec c'usitic chapasic ti avalojique.