2 ―Toj abol sbaic chquil li jchi'iltactic li'i yu'un yoxibal xa c'ac'al li' jchi'uctique, mu xa c'u slajesic. 3 Ti mi ta jtac ech'el ta snaic lavi muc bu ve'emique, yic'al xlubtsajic ta be yu'un nom liquemic tal li jlome ―x'utatic la yu'un ti Jesuse.

4 ―¿Bu ta jtaticotic ep pan li' ta xocol balamile ti ta jmac'linticotic oe? ―xutic la.

5 ―¿Jayp'ej to li jpantique? ―x'utatic la.

―Vucp'ej ―xutic la.

6 Ti Jesuse iyalbe la ti crixchanoetique ti ac'u chotlicuque. Ixch'am la ti vucp'ej pane, “colaval”, xut la ti Rioxe. Ja'o la ixut ti pane, ja' la i'ac'batic li lajchavo'e. Ja' xa la iyac'beic ti crixchanoetique. 7 Oy la jaycot sc'ox choyic noxtoc. Ti Jesuse “colaval” xut la noxtoc ti Rioxe.

―Ac'beic li crixchanoetique ―x'utatic la noxtoc.

8 Ive' la scotolic, lec la inojic. Istsobic la ti c'u yepal muc xlaj yu'un ti crixchanoetique, inoj la vucub moch ti sovrae. 9 Oy la chanmiluc ti ive'ique. Ti c'alal laj ve'icuc ti crixchanoetique ―Batanic xa un ―x'utatic la yu'un ti Jesuse.

10 Li lajchavo'e ja'o la i'och xchi'uquic ta canova ti Jesuse, italic la ta sts'el Dalmanuta.

11 Tey la ic'otic jayvo' jfariseoetic, oy la c'usi isjac'beic ti Jesuse yo' la stabeic o smul ti yalojique.

―Ac'o quilticotic mi yech ti oy ayu'ele. Jq'ueltiquic mi oy c'usi xyal tal avu'un ta vinajel yo' jch'unticotic o ti stacojot tal ti Rioxe ―xutic la.

12 Ti Jesuse isjic' la yo'on, yu'un la toj chopol iya'i ti mu xch'unic tajmeque.

―Vo'oxuc ti cuxuloxuc lavie, avilic ti oy jyu'ele. ¿C'u yu'un chac'anic ti oy c'usi ta jyales tal ta vinajele? Ta melel chacalbeic, lavie mu xcac' avilic ti oy jyu'ele ―x'utatic la yu'un ti Jesuse.

13 Ti Jesuse tey la iscomtsan ti jfariseoetique, i'och la ta canova xchi'uc li lajchavo'e, ibatic la ta jech nab.

14 Li lajchavo'e muc la sna' xich' ech'el spanic. C'ajom la jp'ej pan tey ta scanovaic.

15 ―Q'uelo me abaic ta svuquesobil xch'ut span li jfariseoetique xchi'uc li Erodese ―x'utatic la yu'un ti Jesuse.

16 ―Ti x'elan chale, ja' nan ti muc jna'tic tal ti jpantique ―xut xa la sbaic li lajchavo'e.

17 Ti Jesuse sna'oj la ti c'usi chalique.

―¿C'u yu'un ti xavalvalbe abaic ti muc xana'ic tal ti jpantique? Yu'un mu to bu ach'unojic ya'el ti vo'on tsots jyu'ele. 18 Oy asatic pero co'ol xchi'uc mu xavilic. Oy achiquinic pero co'ol xchi'uc mu xava'iic. ¿Mi ich'ay xa xava'iic ti c'usitic ijpase? 19 Ti c'alal ijxutilan ti vo'p'ej pane c'alal ijmac'lintic ti vo'mil viniquetique, ¿jayib moch inoj ti sovrae? ―x'utatic la.

―Lajcheb ―xutic la.

20 ―Ti c'alal ijxutilan ti vucp'ej pane c'alal ijmac'lintic ti chanmile, ¿jayib moch inoj ti sovrae? ―x'utatic la.

―Vucub ―xutic la.

21 ―¿Mi mu to xava'ibeic smelol li c'usi lacalbeique? ―x'utatic la.

22 Ti Jesuse tey la ic'ot ta jteclum Betsáida. Tey la yic'ojbeic c'otel jun jchi'ilticotic, ma'sat la.

―Abulajan, picbo sat li vinic li'i ―xutic la ti Jesuse.

23 Ti Jesuse istsacbe la sc'ob ti ma'sate, isnit la loq'uel ta ti' jteclum. Istubtabe la ti sate, ispicbe la ta xchibal sc'ob. Isjac'be la mi xil xa osil. 24 Ti vinique isq'uel la osil.

―Chquil li crixchanoetique pero co'ol xchi'uc te' yilel, ja' no'ox ti chanavique ―xi la.

25 Ti Jesuse ispicbe la noxtoc ti sate. Ti vinique isq'uel la noxtoc li osile. Lec xa la icom ti sate, lec xa la xil. 26 Ti Jesuse istac la sutel ta sna:

―Mu me xa'ech' ta yutil jteclum, mu me much'u xavalbe ti lec xa lasate ―x'utat la ech'el yu'un ti Jesuse.

27 Li lajchavo'e ibatic la ta parajeletic ta sts'el jteclum Cesarea de Filipo xchi'uquic ti Jesuse. Ijac'batic la ta be yu'un ti Jesuse:

―¿C'usi van cabtel yalojic li jchi'iltactique? ―x'utatic la.

28 ―Jlom chalic ti vo'ot Juan j'ac'-ich'vo'ote. Jlom chalic ti vo'ot Elíasote. Jlom chalic ti vo'ot yaj'alc'opot Riox ti ta más vo'nee ―xutic la.

29 ―Li vo'oxuque ¿c'usi cabtel ti avalojique? ―x'utatic la.

―Vo'ot Cristoot ti yaloj Riox chapasoticotic ta mantale ―xut la li Pedroe.

30 ―Mu to me much'u xavalbeic ti c'usi cabtele ―x'utatic la.

31 Lic la yal noxtoc ti Jesuse:

―Vo'on ti co'ol crixchanootique, jna'oj ti ta onox xcac' tajmec jvocole. Mu xiyich'ic ta muc' li jmeltsanejc'opetique xchi'uc li totil paleetique, xchi'uc li much'utic ta xchanubtasvanic ta smantal Rioxe. Ja' chiyaq'uic ta milel, chimuque, ta yoxibal c'ac'al chicha'cuxi ―x'utatic la li lajchavo'e.

32 Ti jamal iyal ti chmilee, yech'o un li Pedroe iloc'loc' la ech'el xchi'uc ti Jesuse.

―Cajval, ma'uc yech smelol ti chavich' milele ―xut la.

33 Ti Jesuse ijoyij la, iq'uele la scotolic. I'albat la li Pedroe:

―¿C'u yu'un chach'unbe smantal ti Satanase? Mu me xapajeson. Li vo'ote ma'uc chanop ti c'usi tsc'an ti Rioxe. Ja' yech chanop chac c'u cha'al tsnop li yan crixchanoetique ―x'utat la yu'un ti Jesuse.

34 C'alal laj yal chac taje ―Nopojanic tal ―xut la ti epal crixchanoetique xchi'uc la li lajchavo'e―. Ti much'utic chiyich'ic ta muq'ue, mu me c'uxuc ta yo'on spat xoconic. Ac'u cuchuc yu'unic ilbajinel chac c'u cha'al ta xcuch cu'un li vo'one, ac'u mi ja' xlajic o. 35 Ti much'utic mu xiyich'ic ta muq'ue, ti ja' chi'ic o li milele, yu'un onox ta x'ochic ta c'oc' ta sbatel osil. Yan ti much'utic muc ta alel yu'unic mi ja' xlajic oe, ti chalic a'yuc li c'usi chcale, ta xcuxiic ta sbatel osil. 36 Mi ja' no'ox ta avo'onic li c'usitic oy ta sba balamile, mu c'usi bal o yu'un cha'ochic onox ta c'oc' ta sbatel osil. 37 Ac'u mi jc'ulejoxuc tajmec li' ta sba balumile, pero mu xu' chaman abaic loq'uel li ta c'oq'ue. 38 Mi chaq'uexavic ta yalel a'yuc ti avich'ojicon ta muq'ue, mi chaq'uexavic ta yalbel c'usi caloj li jchi'iltactic lavie, ti mu xich'ic ta muc' ti Rioxe, ti chopol c'usitic tspasique, ja' no'ox yechon uc, vo'on ti co'ol crixchanootique, “le'e ma'uc jch'amal”, chichi ti c'alal xital xchi'uc syu'el ti Jtote xchi'uc ti anjeletic ta vinajele.