4 ―Cajval, lec ti li'otic oe. Mi xac'ane, ta jmeltsanticotic oxp'ejuc sucbil yanal te'; jp'ej avu'un, jp'ej yu'un Moisés, jp'ej yu'un Elías ―xi la li Pedroe.

5 Ti c'alal yolel chlo'ilaj li Pedroe, ja'o la ital lumal toc, ibut'ij la scotolic. Iyac' la xojobal li lumal toque. Iya'iic la ic'opoj ta yut lumal toc ti Rioxe.

―Li'i ja' Jch'amal. Jc'anoj tajmec. Bats'i jun co'on yu'un. Xach'unbeic me li c'usitic chayalbeique ―xi la.

6 Ti c'alal iya'iic ti oxvo' jchi'ilticotic ta yajchanc'op ti Jesuse, ixi'ic la tajmec, ispatan la sbaic ta lum. 7 Itijeic la yu'un ti Jesuse:

―Licanic, mu xaxi'ic ―x'utatic la.

8 Ta jliquel o isq'uelic la ta jujot pero stuc xa la tey va'al iyilic ti Jesuse.

9 Ti c'alal iyalic tale ―Mu to me much'u xavalbeic ya'i ti c'usi avilique. Ja'to me xavalic a'yuc ti c'alal xicha'cuxi loq'uel ta jmuquenal vo'on ti co'ol crixchanootique ―x'utatic la yu'un ti Jesuse.

10 ―¿C'u yu'un chalic li jchanubtasvanejetic ta smantal Rioxe ti ba'yi chtal ti Eliase, ti ts'acal to chatale? ―xutic la ti Jesuse.

11 ―Ta melel ja' yech ts'ibabil ta sc'op Riox ti ja' ba'yi ta xtal ti Eliase. Ja' chtal yalbe li jchi'iltactique ti ac'u yictaic spasel li c'usitic chopole. 12 Chacalbeic, ti Eliase i'ay xa, pero muc xojtiquinic. Li crixchanoetique ispasbeic ti c'usi tsc'an yo'onique, ismilic. Ja' no'ox yech chismilic uc, vo'on ti co'ol crixchanootique ―x'utatic la yu'un ti Jesuse.

13 Ja' la iyul o ta sjolic ti ja' sc'oplal Juan j'ac'-ich'vo' ti iyal ti Jesuse.

14 Ti c'alal iyulic yo' bu tsoboloticotic xchi'uc ti crixchanoetique, tey ic'ot jun jchi'iltic, isquejan sba ta yoc ti Jesuse.

15 ―Cajval, c'uxubinbon li jcreme yu'un staoj tup'-ic'. Toj abol sba. Ep ta ech'el ic'ot ta c'oc'. Ep ta ech'el ip'aj ta vo'. 16 Iquic'be tal lavajchanc'optaque, icalbeic ti ac'u sloq'uesic ti pucuje, pero muc xloc' yu'unic ―xut ti Jesuse.

17 ―Chopol ajolic, mu onox xach'unic tajmec. ¿C'u to onox ora chach'unic ya'el ti vo'ne xa li' jchi'ucoxuque, ti jal xa lajts'icbeique? Ic'becon tal li creme ―xiyutoticotic xchi'uc ti jchi'iltactique.

18 Ti Jesuse istac loq'uel ti pucuje. Ora iloc' ta yo'on ti creme.

19 Ti c'alal jtucticotic xae ―¿C'u yu'un ti muc xloc' cu'unticotic ti pucuje? ―xcuticotic ti Jesuse.

20 ―Yu'un mu to chach'unic ti vo'on chajcoltaic ta spasel scotole. Ta melel chacalbeic, ac'u mi jutuc no'ox ach'unojic ti oy jyu'ele, ac'u mi co'ol xchi'uc jp'ej bec' mustisya, pero spas xa avu'unic li c'usitic vocol ta pasele. Ja' chac c'u cha'al mi chavalic ti ac'u loc'uc li vits li'i, tspas avu'unic. Scotol xa xu' avu'unic mi ja' yech ach'unojique. 21 Pero li jtos pucujetic ti ijloq'uese, ja'to ta xloc' mi chac'oponic Rioxe, mi chavicta avotique ―xiyutoticotic ti Jesuse.

22 Ti c'alal teoticotic to'ox ta Galilea xchi'uc ti Jesuse ―Vo'on ti co'ol crixchanootique chi'aq'ue entrucal ta stojol crixchanoetic. 23 Chismilic, chimuque, ta yoxibal c'ac'al chicha'cuxi ―xiyutoticotic.

Ti c'alal ica'iticotique, icat co'onticotic tajmec.

24 Ti c'alal lic'ototicotic ta Capernaume, tey ic'otic jayvo' jtsob-tojel-aq'uel scuenta muc'ta templo.

―¿Mi chac' chib dracma lavajchanubtasvanejique? ―x'utat li Pedroe.

25 ―Chac' ―xi.

C'alal i'och ta yut na li Pedroe, ja' ba'yi ic'oponat yu'un ti Jesuse.

―Simón, ¿c'usi chanop? ¿Much'u tsc'anbe taq'uin li preserenteetic li' ta sba balamile? ¿Mi ja' tsc'anbe li xch'amaltaque, o mi yan crixchanoetic tsc'anbe? ―x'utat.

26 ―Yan crixchanoetic tsc'anbe ―xi li Pedroe.

―Ja' colem chcom li xch'amaltaque. Ja' no'ox yech li vo'on uque, mu persauc chacac' ti yechuque. 27 Pero yo' mu soc o sjolique, batan ta nab, tic'o ochel ta nab li ansuelo tsacob choye. Li primero choy chanit loq'uele, jach'bo ye. Tey yumoj chata jsep estatero. Ich'o tal, ac'bo li much'utic ta stsobe. Tey batuc scuenta jcha'va'altic ―x'utat yu'un ti Jesuse.