Ja' li' yaloj ti c'uxi icham ti Juan j'ac'-ich'vo'e
14
Ti covierno Erodese iya'i ti ep c'usitic tspas ti Jesuse yu'un vinajem sc'oplal.2 ―Taje ja' nan ti Juan j'ac'-ich'vo'e. Yu'un nan icha'cuxi, yech'o ti oy syu'ele ―xut ti xchi'iltac tey ta opisinae.
3 Ja' ta smantal ti Erodese ti itsac ti Juane, ti ichuque ta carina ta yut chuclebale yo' mu xtae o ta milel yu'un ti yajnil to'ox yits'ine. Erodías sbi ti antse. Felipe sbi ti yits'ine.
4 ―Ma'uc yech chal li leye ti apojbe yajnil lavits'ine ―x'utat yu'un Juan ti Erodese.
5 Ti Erodese yo'onuc smil ti Juane pero ixi' o to'ox ti jchi'iltactic ta israelale, yu'un xch'unojic ti ja' yaj'alc'op Rioxe. 6 Ts'acal to c'alal iloc' sjabilal ti Erodese, ispas sq'uinal. Ti stseb Erodíase i'ac'otaj. Ti c'u x'elan i'ac'otaje, lec iyil ti Erodese xchi'uc ti much'utic tey tsobolique.
7 ―C'anbon ti c'usi chac'ane, lojriox chacac'be ―xut tseb ti Erodese.
8 Ti tsebe ba sjac'be sme' ti c'usi tsc'anbe ti Erodese. C'alal i'albat ti c'usi tsc'ane, ba yalbe ti Erodese:
―Ja' ac'bon tal ta plato sjol li Juan j'ac'-ich'vo'e ―xut.
9 Ti Erodese iyat yo'on. Ta scoj ti isva'an ta rextico ti Rioxe, xchi'uc ti ya'yojic ti much'utic tey xchi'uc ta mexae, yech'o un iyal ti xu' chich'be sjol ti Juane. 10 Ja'o istac ech'el yajsolterotac ti ac'u ba stuch'beic tal sjol ti Juan ta chuclebale. 11 Ispachbeic tal ta plato, iyac'beic ti tsebe. Ti tsebe ba yac'be sme'.
12 Ic'ot yajchanc'optac ti Juane, ay sloq'uesic, ba smuquic. Ba yalbeic ti Jesuse.
Ja' li' yaloj ti ismac'lin vo'mil viniquetic ti Jesuse
13 Ti Jesuse iya'i ti ip'ise ta Juan yu'un ti Erodese, i'och ech'el ta canova, ibat ta xocol balamil. C'alal iya'iic ti jchi'iltactic ta israelale ti ibat xa ti Jesuse, oy jayib jteclum iloq'uic ech'el, ba staic. 14 Ti c'alal liloc'oticotic ta canovae, tey xa tsobol ep crixchanoetic c'ot jtaticotic. Ti Jesuse isc'uxubin, iyet'esbe xchamel ti jchameletic tey capalique. 15 C'alal ch-ic'ub xa'ox osile ―Li'toe xocol balamil. Imal xa c'ac'al noxtoc. Más lec taco ech'el li crixchanoetique, ac'u ba sman sve'elic ta naetic ―xcuticotic ti Jesuse.
16 ―Mu persauc xbatic. Mac'linic vo'oxuc ―xiyutoticotic.
17 ―Mu c'usi oy cu'unticotic. C'ajom no'ox vo'p'ej pan xchi'uc cha'cot choy li' quich'ojticotique ―xcuticotic.
18 ―Ich'ic tal ―xiyutoticotic.
19 Ti Jesuse iyalbe ti jchi'iltactique ti ac'u chotlicuc ta stentejtique. Ixch'am ti vo'p'ej pane xchi'uc ti cha'cot choye, isq'uel vinajel, “colaval” xut ti Rioxe. Ja'o ixut ti pane, ixch'ac noxtoc ti choye. Liyac'boticotic. Vo'oticotic xa icac'beticotic ti crixchanoetique. 20 Ive' scotolic, lec inojic. Ijtsobticotic ti pane xchi'uc ti choye ti c'u yepal muc xlaj yu'un ti crixchanoetique. Inoj lajcheb moch ti sovrae. 21 Oy nan vo'miluc viniquetic ive'ic. Slecoj ti antsetique xchi'uc ti c'oxetique, muc bu nitbil.
Ja' li' yaloj ti ixanav ta yoc ta ba nab ti Jesuse
22 Ts'acal to ―Ochanic ech'el ta canova, t'ab batanic ta jech nab ―xiyutoticotic ti Jesuse.
Ti Jesuse stuc xa isc'opon comel ti crixchanoetique. 23 Ti c'alal laj sc'opon comele, imuy ta vits, ba sc'opon Riox. C'alal i'ic'ube, stuc tey ta vits ti Jesuse. 24 Li vo'oticotique o'lol xa'ox nab xiloc'oticotic ech'el. Ital tsots ic' ta quelavticotic, xyuc'yon xa tajmec li nabe. Mu xa xanav ti canovae. 25 C'alal po'ot xa'ox sacube, listaoticotic ta o'lol nab ti Jesuse. Iquilticotic ti chanav tal ta yoc ta ba name. 26 Ti c'alal iquilticotique, lixi'oticotic. Xcac'ticoticuc me ch'ulelal. Xi'avlajetoticotic xa tajmec.
27 Ora ic'opoj ti Jesuse:
―Vo'on Jesuson, mu me xaxi'ic ―xiyutoticotic.
28 ―Cajval, mi yech chaval ti vo'ote, alo ti xu' chital ta ba nab uque, chtal jnupot ―xi li Pedroe.
29 ―La' ―x'utat.
Iloc' ta canova li Pedroe, ixanav ta yoc ta ba nab, ba snup ti Jesuse. 30 C'alal iya'i ti tsots iq'ue, ixi'. Chmuc xa'ox yalel ta vo'.
―¡Cajval, coltaon! ―xut.
31 Ti Jesuse ora istsacbe sc'ob.
―¿C'u yu'un ti chaxi'e? ¿Mi mu to bu ach'unoj ya'el ti vo'on tsots jyu'ele? ―x'utat.
32 C'alal i'ochic ta canovae, ipaj li iq'ue. 33 Vo'oticotic ti teoticotic ta yut canovae ijquejan jbaticotic, iquich'ticotic ta muc' ti Jesuse.
―Ta melel vo'ot Xch'amalot ti Rioxe ―xcuticotic.
Ja' li' yaloj ti iyet'esbe xchamel ep jchameletic ta Genesaret ti Jesuse
34 Ti c'alal lic'ototicotic ta Genesaret ta jech nabe, tey liloc'oticotic ta canova. 35 Ti jchi'iltactic ta israelale ti tey nacajtique iyojtiquinic ti ja' ti Jesuse. Ora ivinaj ta sjunlej Genesaret ti tey ic'ot ti Jesuse. Iyic'beic tal scotol jchameletic. 36 Oy jlom jchameletic isc'anbeic ti Jesuse ti ja' no'ox ac'u yac' ta piquel ti sne spimilc'u'e. Ti much'utic ispique i'ech' o ti xchamelic uque.