Pa̱i Tëji Mu'seña Yo'oye
3
Tëji mu'seña co'a mu'seña pa'ija̱'coa.
Ja̱re më'ë asaye pa'iji.
2 Ja̱ mu'seña pa̱i cato curi ai oicohua'ipi cui'ne co'ye de'oye pa'iyese'e cuasacohua'i pa'ija̱'cohua'i a'ë,
jerepa pa'i a'ë cuasacohua'ipi.
Cui'ne yë'ëpi jerepa de'oye yo'oquë a'ë cajë co'ye i̱ohua'ija̱'a sihuacohua'i pa'ija̱'cohua'i a'ë.
Ja̱je pa'iohua'ipi Maija'quëni sa̱ñope caja̱'cohua'i a'ë.
Pëca ja'quëohua'ire sehuocaima'cohua'ipi pa'ija̱'cohua'i a'ë.
Nesi do'ire pëpa to̱ma'cohua'i pa'ija̱'cohua'i a'ë.
Cui'ne Maija'quëre sehuoyere ti oima'cohua'ipi pa'ija̱'cohua'i a'ë.
3 Pa̱ire oima'cohua'i cui'ne ai yo'ocohua'ire ñani ti co̱caima'cohua'i pa'ija̱'cohua'i a'ë.
Co'a cocaohua'i pa'ija̱'cohua'i a'ë.
Cui'ne i̱ohua'i yëye quëco ti̱'ama'cohua'i pa'ija̱'cohua'i a'ë.
Ti oiye peoyerepa yo'ocohua'ipi si'aye de'oyere ai sa̱ñope yo'ocohua'i pa'ija̱'cohua'i a'ë.
4 Cajeohua'i cayeje̱ pa'ye cajë cosocohua'i pa'ija̱'cohua'i a'ë,
cui'ne ti ja'ruja̱ima'cohua'i pa'ija̱'cohua'i a'ë.
Yë'ë jerepa pa'i a'ë cajë co'ye sihuacohua'i pa'ija̱'cohua'i a'ë.
Cui'ne Maija'quëni coejë coa i̱ohua'i yëyese'e co'eja̱'cohua'i a'ë.
5 Maija'quëre sehuosicohua'i yo'oyeje̱ pa'ye yo'ojëta'a coa caja̱'cohua'i a'ë,
nuñerepa Maija'quëre sehuosicohua'i pa'i tutu peocohua'ipi.
Ja̱je pa'iohua'ire tsioma'ë pa'ijë̱'ë.
6 Ja̱je yo'ocohua'i acohua'ipi,
nomiohua'i co'ayena ti̱mësicohua'ipi coa si'aye yëcohua'i pa'i huë̱'ñana cacaroja̱ijë cajeohua'i de'ojëna,
tutu peocohua'ipi,
si'aye i̱ohua'i yëyere necaija̱'cohua'i a'ë.
7 Si'anë ye'yejëta'a ja̱ nomiohua'i ti nuñerepa pa'iyere asa ti̱'ama'pë pa'ija̱'cohua'i a'ë.
8 Tsoe hue̱'ña caya dahuëohua'i Janes cui'ne Jambre sa̱ñope Moisésre yo'oa̱'huë'ë.
Ja̱je cui'ne ja̱ohua'ije̱ sa̱ñope yo'oja̱'cohua'i a'ë,
nuñerepa cocare,
co'ayese'e cuasa ë̱mëohua'i de'osicohua'ipi,
Maija'quë pa'iji cuasayere ne huesosicohua'ipi.
9 Ja̱je pa'iquëta'are si'a pa̱i i̱ohua'i yo'oye asa ti̱'ani huesëohua'ipi yo'oyë,
cajë sehuoma'pëna.
Ai jerepa yo'oma'pë pa'ija̱'cohua'i a'ë,
Moisésre caya ë̱mëohua'i sa̱ñope yo'o jujajë pa'ise'eje̱ yo'oja̱'cohua'ipi.
Tëjiyerepa Pablo Timoteore Cua̱ñese'e
10 Ja̱je pa'iquëta'are më'ë cato yë'ë ye'ya i̱ñose'ere,
yo'oquë pa'iyë,
yë'ë pa'ise'ere,
yë'ë nesi'i cuasase'ere,
Maija'quë pa'iji cuasase'ere,
yë'ë pa̱ire oise'ere,
yë'ë quëcose'ere,
sa̱ñope yo'oye pa'itoje̱,
11 cui'ne yecohua'i jo̱sa yo'ojëna,
ai yo'onije yë'ë quëcose'ere.
Cui'ne më'ëpi asayë,
jeto Antioquía,
Iconia cui'ne Listra daripë̱a pa'i maca jo̱sa yo'ojëna,
ai yo'oquëna,
Ëjaëpi si'aye ja̱re nejocani de'oye pa'iye i̱sise'e.
12 Nuñerepa cayë,
si'aohua'i Jesús ja̱'re tsioni pa'iye yëcohua'i cato ja̱je ai yo'oja̱'cohua'i a'ë,
yecohua'ipi jo̱sa yo'ojëna.
13 Ja̱je pa'iquëta'are,
co'acohua'i cui'ne cosocohua'i cato jero sa'na ai co'ayere yo'ojë yecohua'ire cosocohua'i pa'ija̱'cohua'i a'ë,
coso cua̱ñosicohua'ipi pa'ijë.
14 Ja̱je pa'iquëta'are si'aye më'ë iye a'ë,
i̱tirepa caquë asa huesëse'ere o̱cue pa'i macarepa yo'oquë pa'ijë̱'ë.
Më'ëpi asayë,
më'ëre ye'yasicohua'ire.
15 Cuasajë̱'ë,
cui'ne më'ë cato tsihua'ë pa'inëna Maija'quë toya pëpë caye asaquë a'ë.
Më'ëre ja̱pi de'oye yo'oquëre ye'yaquë cui'ne huasosiquë pa'iyena saye pa'iji,
Cristo Jesuni pa'iji cuasa do'ipi.
16 Si'a toya pëpë Maija'quëpi quëaquëna,
toyasicoa.
Ja̱je pa'ina,
Maija'quë cocapi de'oye a'ë,
pa̱ire ye'yaye,
yëhuo quëcoye tayo yo'ocohua'ire,
quëa nu'ñeñe cui'ne nuñerepa pa'iyena ye'yaye.
17 Ja̱je pa'ina,
cui'ne Maija'quë coca sehuoquëpi si'aye ai ye'yesiquëpi de'oyese'e nequë pa'ija̱'quë api.