Noqa Pablum kay cartata qamkunaman cartakamü. Apóstol kanäpaq manam runakunatsu churayämashqa, sinöqa Jesucristo y payta kawatsimuq Dios Yayam churamashqa.

Kaychö wawqikuna y panikunam saludayämushunki. 3 Taytantsik Dios Yaya y Señor Jesucristo llakipäyäshurniki alli päsakuychö kawakuyänaykipaq yanapaykuyälläshuy. 4 Taytantsik Dios Yaya munanqannömi kay patsachö jutsapita salvamänapaq Jesucristo wañurqan.^† 5 Dios Yaya imayyaqpis alabashqa kaykullätsun. Amén.

6 Musyayanqaykinömi Jesucristupa kuyakuyninwan Dios Yaya qayayäshurqayki. Tsayta musyaykarqa ¿imanirtan mana alli yachatsikuyta chaskir manaraqpis unayta Dios Yayapita witikuyashkanki? ¡Tsaytaqa manam imanöpa tantiyaytapis puëdïtsu! 7 Jesucristupa willakuyninpita juk mas willakuyqa manam salvakänapaq kantsu. Tsaynö kaykaptinpis wakin runakunam Jesucristupa willakuyninman yaparkur mana allikunata yachaykätsiyäshunki.

8 Yachatsiyanqaqta manakaqman churar pipis mana allikunata yachatsiptinqa infiernuman Dios Yaya jitarputsun. Noqakunatapis mana allikunata yachatsiyaptiqqa infiernuman jitarpayämätsun. Ciëlupita shamuq angeltapis llutanta yachatsiptinqa infiernuman jitarputsun. 9 Yapaymi nï: Pipis Jesucristupa willakuynin jananman mana alli yachatsikuyta yapaq kaqtaqa infiernuman jitarputsun.

10 Tsaynö nir ¿runakuna aläbayämänantatsuraq ashï? ¿Runakunapita alli rikashqa kaytatsuraq munä? Noqaqa manam runakuna aläbayämänanpaqtsu yachatsï, sinöqa Dios Yaya: “Allitam rurashkanki” nimänanpaqmi.^† Runakuna aläbayämänan raykulla yachatsikurqa manam Jesucristupa serviqnintsu käman.

11 Wawqikuna y panikuna, shumaq tantiyakuyay. Alli willakuyta willakunqäqa manam runakunapa yarpaynintsu. 12 Tsay willakuytaqa manam runatsu yachatsimashqa, sinöqa kikin Jesucristum revelacionchö tantiyatsimashqa.

13 Qamkunam musyayanki ñawpata Israel runakunapa costumbrinkunata cumplir imanö kanqäta. Tsay witsaymi Jesucristuman creyikuqkunapa contran shärir qatikacharqä. Paykunatam llapanta ushakätsiyta munarqä.^† 14 Wakin Israel majïkunapitapis masmi costumbrïkunata välitsirqä.^† Llapan paqta majïkunapitapis masmi Moisés qellqanqankunata cumplirqä.

15 Peru imanö kaptinpis manaraq yuriptïmi Dios Yaya llakipämar payta servinäpaq akramashqa.^† 16 Tsaypitam Jesucristuman creyikunäpaq shumaq tantiyatsimar^† mana Israel runakunata willakuyninta willanäpaq kachamashqa.

Tsaynö kachamaptinmi willakuyninta tantiyatsimänanpaq pitapis tapukurqänatsu. 17 Manam noqapita mas punta kaq apostolkunawan parlanäpaq Jerusalénman aywarqätsu. Masbienmi Arabia partipa aywarqä. Tsaypitanam Damasco markaman yapay kutirqä. 18 Tsaypitam kimsa watataraq Pedruwan parlaq Jerusalénman aywarqä.^† Tsaychömi chunka pitsqa junaq paywan paqta kayarqä. 19 Tsaychömi reqirqä Señor Jesucristupa wawqin Santiaguta. Peru wakin apostolkunataqa manam reqirqätsu. 20 Dios Yaya musyanmi mana llullakunqäta.

21 Tsaypitanam Siria y Cilicia provinciakunapa aywarqä.^a 22 Judea provinciachö^b wawqikuna y panikuna manam ni mayqanpis reqiyämarqantsu. 23 Paykunash wiyayänaq: “Qatikachämaqnintsik runam kananqa Jesucristupa willakuyninta willakurna puriykan”.

24 Tsaynö niqta wiyarshi Dios Yayata alabayänaq.