Leprawan qeshyaykaqta Jesús kutikätsinqan
8
Lömachö yachatsikunqanpita Jesús urämuptinmi maytsikaq runakuna qatiyarqan. 2 Tsaychömi leprawan qeshyaykaq runa Jesúspa puntanman qonqurikuykur nirqan: “Taytay, voluntäniki kaptinqa kutikaykatsillämay”.3 Tsaynö rugakuptinmi Jesús yataykur nirqan: “Kutikashqa kanaykitam munä”.
Tsaynö niptinmi jina höra kutikaskirqan. 4 Tsaypitanam Jesús nirqan: “Kutikätsinqaqta ama pitapis willankitsu. Masbien kutikanqaykita rikäshunaykipaq sacerdötiman ayway. Kutikanqaykita musyayänanpaq Moisés qellqanqanchö ninqannölla ofrendaykita templuman apay”.†
Capitanpa serviqninta Jesús kutikätsinqan
5 Capernaúm markaman Jesús chaykuptinnam Roma soldädukunapa capitannin rugakur 6 nirqan: “Taytay, serviqnïmi wajïchö qeshyar ujuraykan. Alläpa antsa karmi ni kuyukuntsu”.
7 Jesúsnam nirqan: “Kutikätsinäpaq aywashun”.
8 Capitannam nirqan: “Taytay, mana Israel runa kaykaptïqa manach wajïman yaykunkimantsu. Masbien serviqnï kutikänanpaq kayllapita niykullay. 9 Noqapis mandamaqnïpa mandädunchömi kä. Tsaynöllam soldädükunapis mandädüchö kayan. Mayqantapis ‘tsaypa ayway’ niptïmi aywan, ‘shamuy’ niptïmi shamun y serviqnïta ‘kayta ruray’ niptïmi ruran”.
10 Tsayta wiyaykurmi Jesús kushikur qatiqnin runakunata nirqan: “Rasun kaqtam niyaq: Kay runa creyikunqantanöqa manam Israel runakunachö tarishkätsu. 11 Tsaymi niyaq: Maytsay nacionkunapita qorikaykurmi Dios Yayapa mandakuyninchö Abrahamwan, Isaacwan y Jacobwan jamaykur mikuyanqa.† 12 Peru wakin runakunam sïqa Dios Yayapa mandakuyninchö kawayänanpaq kanqanta yarparpis mantsaypaq tutapayman qaykushqa kayanqa. Tsaychömi alläpa waqar kirunkunatapis requchyätsirraq ñakayanqa”.†
13 Capitantanam Jesús nirqan: “Wajikipa kutikuy. Creyinqaykinömi serviqniki kutikashqana”.
Tsay höram capitanpa serviqnin kutikaskirqan.
Pedrupa suegranta Jesús kutikätsinqan
14 Tsaypitanam Pedrupa wajinman Jesús aywar tarirqan Pedrupa suegran fiebriwan antsa ujuraykaqta. 15 Makinta yataykuptinnam jina höra kutikaskir mikuyta qararqan.
Atskaq qeshyaqyashakunata Jesús kutikätsinqan
16 Patsa qoyaykaptinnama Jesúsman apayämurqan supaykuna ñakatsiyanqan atskaq runakunata. Tsay runakunapitam supaykunata Jesús juk palabrallawan qarqurqan. Tsaynöllam tukuyläya qeshyaywan qeshyaykaqkunatapis kutikätsirqan. 17 Tsaynö kutikätsirmi profëta Isaías qellqanqanta cumplirqan. Tsay qellqanqanchömi nin:
“Paymi qeshyaynintsikkunata apashqa.†
Paymi nanaynintsikkunatapis jipishqa”.
Qatirayta munaqkunata Jesús tantiyatsinqan
18 Atskaq runakuna juntapuyaptinmi discïpulunkunata Jesús nirqan: “Wak tsimpaman päsashun”.
19 Büquiman yaykuyänanpaq kaykäyaptinmi ley yachatsiq runa Jesústa nirqan: “Rabí, maypa aywaptikipis qatiräshaykim”.
20 Jesúsnam nirqan: “Atuqkunapapis machayninkuna kanmi. Pishqukunapapis qeshunkuna kanmi. Peru Runapa Tsurinpam sïqa maychö puñuykunanllapaqpis kantsu”.
21 Jukaq discïpulunnam nirqan: “Taytay, qatinaqpaq taytätaraq puntata pampaskamushaq”.
22 Jesúsnam nirqan: “Wañushqakunataqa wañushqa majinkuna pampakuyätsun. Qamqa sas qatimay”.
Wayratawan yakuta Jesús päratsinqan
23 Tsaypitanam büquiman Jesús lätaptin discïpulunkunapis qepanta lätayarqan. 24 Qochata tsimpaykäyaptinmi Jesús puñukaskirqan. Tsayyaqmi alläpa wayrawan yaku laqchikar büquita tallpukätsinanpaqna kaykarqan. 25 Tsaymi discïpulunkuna Jesústa rikchatsir niyarqan: “¡Taytay, tallpukaykantsiknam! ¡Salvaykayällämay!”
26 Jesúsnam nirqan: “Mana creyikuq janan shonqu runakuna, ¿imanirtan mantsakashqa kaykäyanki?”
Tsaypita sharkurmi wayratawan yakuta piñaparqan. Piñapaskiptinmi wayrawan yakupis patsallanchö päraskiyarqan. 27 Tsayta rikarmi discïpulunkuna mantsakashqa niyarqan: “Yakupis wayrapis tsaynö cäsunanpaqqa ¡pitan kay runaqa!”
Supaykuna löcuyätsiyanqan runakunata kutikätsinqan
28 Qochata tsimpaskirnam Gadara niyanqan partiman chäyarqan. Tsaychömi supaykuna löcuyätsiyanqan ishkay runakuna panteonpita yarqayämurqan. Paykuna alläpa mantsaypaq kayaptinmi tsaypaqa ni pipis päsayaqtsu. 29 Jesústa rikaskirmi jinchi qayaykachar niyarqan: “¡Diospa Tsurin Jesús! ¡Imatatan noqakunawan munanki! ¿Manaraq hörakuna chämuptinku ñakatsiyämänaykipaq shamushkanki?”
30 Paykunapita mas washaläninchömi maytsika kuchikunata mitsiykäyarqan. 31 Tsaymi supaykuna Jesústa rugar niyarqan: “Kay runakunapita qarqayämarqa taqay kuchikunallaman yaykuyänäpaq permïtiykullay”.
32 Rugakuyanqanta Jesús äniptinmi supaykuna ishkan runakunapita yarquskir tsay kuchikunaman yaykuyarqan. Tsaymi kuchikuna löcuyar lömapita akataykachar qochaman jeqarpuyarqan. Tsaychömi shinqar wañuyarqan.