Faraónpa mashan Salomón yaykushqan
3
Saypitanami Egipto nacionpa mandaqnin rey faraónpa surinta Salomón ashir Davidpa Markanman pusharqan. Say wisanmi Salomón aruykäsirqan palaciunta, Tayta Diospa wayinta y Jerusalén markapa murällantapis. 2 Tayta Diosta adorayänanpaq wayin manaraq kaptinmi altarkunalacho sacrificiuta rupasiyaq.Tantiyakuq kananpaq Tayta Diosta Salomón manakushqan
3 Tayta Diosta Salomón kuyashpanmi taytan David yäsishqankunata lapanta cumplirqan. Isanqa juklä altarkunachömi sacrificiukunata rupasirqan y inciensuwanpis qoshnisirqan. 4 Lapan say altarkunapitapis Gabaóncho kaykaq altarmi mas jatun y mas reqish karqan. Saymi rey Salomón sayman aywaykur waranqa (1,000) uywakunata pishtar rupasina sacrificiukunata rupasirqan.
5 Gabaóncho kaykaptinmi sueñuynincho yuripaykur Salomónta Tayta Dios nirqan: “Imatapis manakamashqaykitami kamaripäshayki”.
6 Sayno niptinmi Salomón nirqan: “Sirvishuqniki papänï David lapan shonqunwan munashqaykino kawaptinmi ali yanapashkanki. Kananpis payta kuyarmi trukan rey kanäpaq churamashkanki. 7 Saymi noqata churamaptiki papänïpa trukan rey kaykä. Maqtalaraq karmi imano mandanäpaq kaqtapis musyäsu. 8 Kananqa yupaytapis mana atipaypaq akrashqayki runakunapa mandaqnin reymi kaykä. 9 Say runakunata shumaq mandanäpaq ali yarpayta y yachayta qoykalämay, Taytay. Shumaq tantiyaykasilämay yarpaynïkuna ali kashqanta o mana ali kashqantapis musyanäpaq. Tantiyayta mana qomaptikiqa manami kuyashqayki saysika runakunata mandayta kamäpakushaqsu”.
10 Salomón manakushqan ali kaptinmi 11 Tayta Dios nirqan: “Qam manami manakamashkankisu aska wata kawanaykipaq, rïcu kanaykipaq ni contraykikunata ushakäsinäpaqpis. Saypa trukanqa shumaq mandanaykipaq ali tantiyakuytami manakamashkanki. 12 Saymi manakamashqaykino yanapäshayki ali tantiyakuq y yachaq kanaykipaq. Qam yachaq kashqaykinöqa manami pipis kashsu ni imaypis kanqasu. 13 Saynölami mana manakaykämaptikipis yanapäshayki rïcu kanaykipaq y munayyuq kanaykipaq. Saymi kawashqaykiyaqqa qampita mas munayyuq rey kanqasu. 14 Lapan leynïkunata y mandamientükunata papäniki Davidno cumpliptikiqa aska wata kawanaykipaqmi yanapäshayki”.
15 Punushqanpita rikcharkamurmi sueñushqanta Salomón tantiyakurqan. Saymi Jerusalénman kutir jukla aywarqan Tayta Diospa Pactu Babulnin kaykashqan kaqman. Saychömi rupasina sacrificiukunata y jawka kawakuy sacrificiukunata rupasirqan. Nirkurmi lapan yanapaqninkunapaq mikuyta rurasirqan.
Arreglananpaq Salomón ali tantiyakushqan
16 Say wisanmi rey Salomón kaqman ishkay prostitütakuna quejakuq aywayashpan 17 jukaq nirqan: “Tayta rey, kay warmiwan ishkä juk wayilacho taykarmi qeshyakushkä. 18 Saypita kimsa junaqlatami paypis qeshyakush. Manami mas pipis noqakunawan kashsu. Ishkalämi kayashkä. 19 Juk sakay punuykashqanchömi kay warmi wawanta wanuqpaq nitiykush. 20 Nirkurmi wanush wawanta pulan paqas oqlaparkamar noqapa wawäta oqlakurkush. 21 Rikcharkamur chuchunäpaqmi wanush wamra oqlaynïcho jitaraykänaq. Pasa wararkuptin rikaykunäpaqqa manami wawäsu say wanush wamra kanaq, sinöqa kay warmipa wawanmi”.
22 Sayno niptinpis jukaq warmi nirqan: “Manami nishqaykinösu. Kawaq kaqmi noqapa wawäqa. Qampami wanushqaqa”.
Niptinmi jukaq warmina nirqan: “Manami nishqaykinösu. Qampa wawaykiqa wanush kaykaqmi. Noqapa wawäqa kawaq kaqmi”.
Sayno nirmi reypa nawpancho fiyupa rimanakuyarqan. 23 Saymi rey nirqan: “Jukniki nikanki: ‘Noqapa wawäqa kawaq kaqmi. Wanush kaykaqqa paypami’. Saynölami juknikipis nikanki: ‘Paypami wanush kaqqa. Noqapaqa kawaq kaqmi’ ”.
24 Sayno nirmi yanapaqninta nirqan: “¡Espädata apamuy!”
Espädata chaskasiptinnami 25 rey nirqan: “Kawaykaq wamrata pulanpa ishkayman partiskir pulanta jukaq warmita y pulantana juknin kaq warmita entregay”.
26 Sayno niptinmi wamrapa maman fiyupa lakikushpan reyta ruwar nirqan: “¡Ama wanuykasiysu, taytay! ¡Saypa trukanqa kawaykaqlata kay warmita qoykuy!”
Jukaq warmimi isanqa nirqan: “Say wamrata ishkayman kusurisun. Saynöpami paypis ni noqapis gustükunawan quëdayäshaqsu”.
27 Saymi rey nirqan: “Amana kusuysu. Wanunanta mana munaq kaq warmita qoykuy. Paymi rasunpaypa kaq mamanqa”.
28 Say warmikuna demandanakuyashqanta rey Salomón shumaq arreglashqanta musyarmi lapan runakuna tantiyakuyarqan yachaq kananpaq Tayta Dios yanapashqanta. Saymi lapan runakunapis rey Salomónta respitayarqan.