Komo suki uni kato sokome ŋa Grik mandewore nakayáŋaró, quko eneŋo owí kama nekaró. Itaka iŋo-iŋo uni qambu qundo ŋande ye iŋoyoteŋgo, ko Sepeti koro naŋuní ŋu, asáŋowí uni Jon, sokome ŋa nakayáŋaró. Sokome kumi ŋuya nakayáŋaró, asa 1 Jon, 3 Jon ko Miti Mande sokome qu ka nakayáŋaró. Sokome soso ŋu, mande koro murí muko kanata na. Uni 2 Jon nakayáŋaró qundo owí kama nekaró, quko eneŋomboro ŋande yaró, “huru-huru koro tapá uni,” yaró. (2 Jon 1 weyo qembe.) Ŋundiro nore ŋande ye iŋoyoteto, ko enendo Anutu koro huru-huru ŋuno owé parámi raró.

Do naru horé nakayáŋaró ŋuya kama iŋoyoteto. Itaka iŋo-iŋo uni kumimbo ŋande yeyoteŋgo, koretero sokome ŋa nakayáŋaró, tukú 1 Jon nakayáŋaró. Dokoro sokome irisa-irisa quno ŋuno uni kaná-kaná ŋuro yaró. 2 Jon 7 ŋuno uni kaná-kaná ŋu Anutu koro uniparetoya watí kunditeyaŋgurí. Quko 1 Jon 2:19 ŋuno uni kaná-kaná ŋu toŋemukaŋgurí.

Asa itaka iŋo-iŋo uni kumimbo ŋande ye iŋoyoteŋgo, ko Jonko kumima naru 66AD ŋuno sokome ŋa nakayáŋaró, peka, quko qambu ŋande yeteŋgo, 85AD koya 100AD keweroko ŋuno nakayáŋaró, peka. (Asa “66AD” murí muko ŋandiro, nimímbo Yesu pisiyaró, yate kumima naru 66 ŋunde rotaró. Nore kumima naru 2,000 ŋunde rotoro yate itaka yoteto.)

Komo suki Anutu koro huru-huru ŋuro tapá unindo ŋande yaŋgurí, ko Jonko sokome ŋa Efesus yendémo nakayáŋaró. Nakayáŋoní huru-huru enesó-enesó Esia mira parámimo ŋuno yoraŋgurí quno uyareró. Uni kaná-kaná ŋundo iŋo-iŋoye enesó-enesó tero uyarero mande koroqe rondaqe yunoyaŋgurí. Asa ko Jonko huru-huru meyowo ŋu kawaware tewero quro sokome ŋa nakayáŋoro iŋo-iŋo meté mu rondaqe yunaró.