Sokome ŋako Yesuko Mesaiya tero maheró koro sowo mande ka. Komo suki uni kato sokome ŋa Grik mandewore nakayáŋaró, quko eneŋo owí kama nakayáŋaró. Itaka iŋo-iŋo uni kumimbo ŋande yeteŋgo, ko sokome ŋanoko Grik mande kekere piyimi mu yote. Uni nakayáŋaró ŋuko iŋo-iŋo parámi moré, ko Grik mande nakayáŋowero murí ŋuko iŋomukaró. Sowo mande ŋako Juda uni kumimbo o taŋgurí quro mande ka, quko nakayáŋaró qundo sowo mande ŋa uni wini meyowo koro nakayáŋaró. Ŋunde ŋuroko Juda uniparetoro muríye kumi wisiyo yunoyaró. Ŋuya Yesu koro usisambatoro sowo mande Atam noŋgo qu nakayáŋaró.

Ŋu naruko ŋuno Israel mirako ŋuno Juda unipareto eneŋo miraye kama sopoyaŋgurí. Hamó, eneŋo uni kembéyembo sopo yereŋgurí, quko wiri yerete uni meyowombo uni kembé ŋu wiri yereyara. Wiri yerete uni parámi ŋuko Rom uni ka, ko eneŋo kuma unindo unipare soso mirane-mirane kondé yondowoyaŋgurí.

Asa nimímbo Yesu pisiyoní parámi tero hurí tero kho tero Anutuko unipareto wiri yereweya naruyó ŋuro yesowoyaró. Yate-yate Juda koro uni kembé-kembémbo Yesu koro mandí ŋuro piyimiŋoro saŋgirí tero rero Rom koro sopo-sopo unindoro kandímo raŋgurí. Ŋunde raŋoyi Yesu uroní khumaró. Khumoní Anutuko riní pitu ko otoqaró. Ko enendo itaka samboko yote.

Uni mande ŋa nakayáŋaró quro owí sokomeko kama yote, quko iŋo-iŋo uni qambu ŋande iŋoyoteŋgo, ko Pol koro topé, Luk, nakayáŋaró. Sokome ŋaya Asá yerewí Uni sokome ŋuya sowo mande kanata quro sombé-sombé titiri, ko irisa koro mandeyarimboro murí ŋunde naŋge. Ŋunde ŋuroko uni kanatako sokome irisa-irisa ŋu nakayáŋaró. Ŋundiro naŋge nore sokome ŋaro yeteto, Miti Mande Lukiko Nakayáŋaró Mu, dokoro Mesaiya maheró koro piŋa mande ŋuko miti mande ŋundiro. Lukiko Juda uni kini, ko enendo Grik muríyewore sukuli tero dota tunoqaró. Polko kho tero uyareyate naru kumimo Luk eneya uyareró. Sokome nakayáŋaró quro naruyó muko 61AD koya 62AD keweroko peka. (Asa “61AD” murí muko ŋandiro, Yesu pisiyaró, yate kumima naru 61 ŋunde rotaró. Nore kumima naru 2,000 ŋunde rotoro yate itaka yoteto.)

Asa mande korete quno Lukiko ŋande yaró, ko enendo Yesu naruyómboro sowo mande horé riní tunoqewero quro mande ŋa nakayáŋaró. (Luk 1:1 weyo qembe.) Enendo Yesuko unipare enesó-enesó newonde hamó yunoyote ŋuro nore witú yereró. Hamó, tapara mande kate-kate yero uni onoŋoye moré kini qambu ŋuya unipareto quhurí korowoyaŋgurí ŋuro yaró. Sokomeko ŋano nore qene iŋowato, ko Kristo maheró, quko nore niŋgu-niŋgu yunaró, ko rambaruru koŋgo noriní o meté horé ka rewato ŋuro iŋo-iŋo ka nunaró.