53
Mande nore itaka iŋoteto ŋa danimbo iŋondutuwoweya?Ko Yawe koro kho wimbí danimbo qena?
2 Yaweko kho uniyó rotoní ŋundo komó qembe tunoqaró,
ko te yuwó ŋunde qembe noko harimo ŋuno wotaró.
Ene qene nuŋguwowero qu kini,
kini horé.
3 Unipare soso huwóŋaŋgurí.
Ene quhurí korowoyaró, surumí korowoyaró.
Uni piyimi ka unipare soso kama qeneyoteŋgo
ŋunde qembe nore owí rato umburó.
4 Nore qenero yatowó, “Anutuko eneŋo quhuríyómboro quhurí inaró.
Anutuko naŋge ene uraró.”
Quko ŋu hamó, enendo noreŋo mepénani rero quhurínani korowaró,
ko surumínani ŋu korowaró.
5 Quko noreŋo otetenani piyimimboro Yaweko saŋgawaró.
Noreŋo potónanimboro usowaró.
Quhurí ene saŋano raró ŋuko newonde meté nore nunaró,
ko eneŋo mama piyimi ŋuko nore noriní meté teteto.
6 Nore soso sipsip ŋunde qembe khe meté rotoro
nore iŋo-iŋonani naŋge howato.
Ŋunde ŋuro Yaweko nore soso quro quhurínanimboro
quhurí ene saŋano reró.
7 Uni saŋgirí ŋundo utoro o piyimi te inaŋgurí,
quko mande ka kama yaró.
Sipsip simó uroyi khumoweya ŋunde qembe re wosaŋgurí,
ko sipsip huí toŋowaŋgo quno ŋuno maŋgó kusiyote,
ŋundiro naŋge uni ŋu mande ka kama yaró.
8 Uni saŋgirí ŋundo o piyimi te inoro rondaŋero re toŋeŋgurí.
Ŋunde ŋuroko eneko soweyó moré kini.
Dokoro uroyi khumaró,
neneŋo uniparenemboro quhuríyemboro uroyi khumaró.
9 Enendo o piyimi ka kama taró
ko mande qota-qota kama yaró.
Quko uni piyimi ŋunde qembe khumaró
ko onoŋo unindoro tapuko ŋuno tapuŋaŋgurí.
10 Yawe eneŋombo kho uniyó riní rambaruru tero surumí parámi taró.
Eneŋo yoto-yotoyó ŋu riní o qa-qa ŋunde tero uniparetoro quhuríye rotowero quro khumaró.
Ene khumoweya tiníqo yoto-yotoyó piru yoní ko usisí yiyoweya.
Ko enendo Yawe koro iŋo-iŋo ŋu howiní o meté tunoqeweya.
11 Quhurí parámi ŋu kini tiníqota
o qambu meté ŋu tunoqiní qenero ene niŋgu-niŋgu teweya.
Yaweko ŋande yete, “Kho unine roneneŋowí muko
eneŋo iŋo-iŋoyó meté ŋuwore unipare qambu yoriní roneneŋowí tewaŋgo,
ko enendo o piyimi teyoteŋgo ŋuro kimoyó korowoweya.
12 Ŋunde ŋuroko nondo ene rewe uni parámi horé teweya,
ko o meté-meté mu siyoro uni wimbuye moré mu yunoweya.
Dokoro ene eneŋo rero khumaró
ko unipareto ene uni piyimi tete ye iŋaŋgurí.
Hamó, enendo qambu quro quhuríyemboro kimoyó piyimi ŋu koroworo
neneŋo uni piyimi ŋuro saŋgiríne riní kini taró.”