Moses koya Aron koya Isip yori naŋge Yaweko ŋande yimiraró, 2 “Kombo ŋako yariŋo naru sukiyó korete qu yoweya. 3 Israel unipare soso ŋunde yimiroyi, ‘Kombo naruyó kande irisa ŋuno, uni kanata-kanata eneŋo pare-simóyemboro sipsip simó ka ma meme simó kanata ka siyoro enesó-enesó rotoyi yoweya. 4 Ko eneŋo winiŋo tomó ta naŋge ko nú-qare ŋu kama nemukowaŋgo tiníqo, awando meté wini ka ya kutaqemo ŋu osese yiriní mahewaŋgo, ko wini irisa ŋundo rondaŋero newaŋgo. Ene okeyá ta meté ta iŋoro unipare-simó rokóyemo suŋgí ŋu rondaŋe inoyuri suŋgí kini teweya. 5 Yendo meté sipsip urumuni ma meme urumuni kumima naruyó kanata ŋundiro rotaró qu. Ko yendo sipsip ma meme ka kowí mama soso woro rambaruruwoyote qu ma rewero. 6 Enendo nú-qare ŋu meté ta sopoyuri kombo naruyó 14 ŋu naru maheweya, ko ŋu naruko naŋge suwoya tiníqo nú-qareye soso ta utomukowaŋgo. 7 Ko enendo nú-qare ŋuro sitúŋo kumi siyoro do yano núqare newaŋgo ŋuro makono tatá irisa ŋu sonowowaŋgo. Ko kaŋuya sosoko mako kembémo papare uraŋgurí quno ŋuwore ŋuya sonowowaŋgo. 8 Ŋu suwono yendo sipsip pe ma meme suŋgí ŋu teko qayi qembe. Ko yendo suŋgí ko bret yis moré kini ko sotawo oŋgomi moré kini ŋuya ni qembe. 9 Yeko suŋgí kama qaro ŋu ma newero, ko tiŋiqo ma ka newero. Yeko teko naŋge qayi qembe. Kumbéko ko khe kandí qahímo o qu soso teko qayi qembe, ko ni qembe. 10 Ye suŋgí sombé-sombé ka se rotoyi yoní ita saraŋoweya koro, ko suŋgí kumi roti yoní ita saraŋoweya tiníqo, se teko qayi teko qaní kini teweya. 11 Ye suŋgí ŋu newero ko ye ŋande ti qembe. Tuwi rimuro khe punu-punu tero saté usúye khe uwero qu towoyi qembe. Ye o waka ta ni qembe, dokoro, o newato ŋuko nondo ye taka yerewe meté yowaŋgo ŋuro rokóŋo.