Anutuko mande soso rondaŋaró.
11
Asa sono riru ŋu kini tiníqo ŋu naruko ŋuno unipare soso mande kanata quno yaŋgurí. 2 Asa sono riru kini tiníqo unipare kosa aretesina uyaro Babilonia mirako kuhú kano kunditaŋgurí.3 Kunditero ŋande epe mito-mito taŋgurí, “Nore kinzé tamowe hari o wondo qembe yondowato,” yaŋgurí. Enendo ya wondopo kama yondowaŋgurí. O wondo qembe ŋundopo yondowaŋgurí. Ko o wondo qembe ŋu sowe-sowe tewero quro o ka seworu qu sonoyó qembe ŋuko raŋgurí. 4 Ŋunde tero ŋande yaŋgurí, “O wondo qembe ŋu rero yendé parámi ka towato. Ŋuno ya parámi horé ka towato samboko oweya. Ŋunde oní unipare soso qenero nore owenani hokoro ŋano kopowaŋgo. Koporo nore kama wisikaraŋowato.”
5 Ŋunde yaŋgurí quko Yaweko yendé parámi ŋuno ya parámi ŋu qeneró. 6 Qenero ŋande yaró, “Unipare ŋuko mande kanata naŋge o ŋuko mepémo teteŋgo. Ŋunde mepémo tero imemoŋgo o soso tewaŋgo. 7 Nore uya mandeye rondaŋatoka mande enesó-enesó yeya kape-kape tewaŋgo.”
8 Yeroqo unipare ŋu yohowiní kho puŋomo rotoro wisikaraŋaŋgurí. 9 Yendé ŋuno mande soso rondaŋiní tiní ŋu noŋgo unipare soso wisikaraŋoro ene-ene taŋgurí. Ŋunde ti yendé ŋuro owí muko Babel.
Siem koro sowe qu.
10 Siem koro mande piŋayó ŋuko ŋandiro.
Riru parámi ŋu kini tiní kumima naru irisa ŋunde tiníqo Siem kumima naruyó 100 ŋunde rotoro naŋuní ka, owí muko Arpaksat, pisiyaró. 11 Pisiyoro kumima naruyó 500 ŋunde ŋuya yotoro simó-nambo kumi pisi yereró.
12 Arpaksat kumima naruyó 35 ŋunde rotoro naŋuní ka, owí muko Sela, pisiyaró. 13 Pisiyoro kumima naruyó 403 ŋunde ŋuya yotoro simó-nambo kumi pisi yereró.
14 Sela kumima naruyó 30 ŋunde rotoro naŋuní ka, owí muko Eber, pisiyaró. 15 Pisiyoro kumima naruyó 403 ŋunde ŋuya yotoro simó-nambo kumi pisi yereró.
16 Eber kumima naruyó 34 ŋunde rotoro naŋuní ka, owí muko Pelek, pisiyaró. 17 Pisiyoro kumima naruyó 430 ŋunde ŋuya yotoro simó-nambo kumi pisi yereró.
18 Pelek kumima naruyó 30 ŋunde rotoro naŋuní ka, owí muko Reu, pisiyaró. 19 Pisiyoro kumima naruyó 209 ŋunde ŋuya yotoro simó-nambo kumi pisi yereró.
20 Reu kumima naruyó 32 ŋunde rotoro naŋuní ka, owí muko Seruk, pisiyaró. 21 Pisiyoro kumima naruyó 207 ŋunde ŋuya yotoro simó-nambo kumi pisi yereró.
22 Seruk kumima naruyó 30 ŋunde rotoro naŋuní ka, owí muko Nahor, pisiyaró. 23 Pisiyoro kumima naruyó 200 ŋunde ŋuya yotoro simó-nambo kumi pisi yereró.
24 Nahor kumima naruyó 29 ŋunde rotoro naŋuní ka, owí muko Tera, pisiyaró. 25 Pisiyoro kumima naruyó 119 ŋunde ŋuya yotoro simó-nambo kumi pisi yereró.
26 Tera kumima naruyó 70 ŋunde rotoro naŋuní kapusa, oweye muko Abram, Nahor, Haran, pisi yereró.
27 Tera koro mande piŋayó ŋuko ŋandiro.
Tera naŋo-simó pisi yereró. Ŋuro oweye muko Abram, Nahor, Haran. Asa Haran naŋuní ka, owí muko Lot, pisiyaró. 28 Pisiyoro unipare Kaldia koro yendé ka, owí muko Ur, ŋuno khumaró. Ŋu naruko ŋuno iwí Tera toŋí yaró. 29 Asa Abram koya Sarai koya epe re-re tariyó. Ko Nahor koya Milka koya epe re-re tariyó. Milka koya Iska koya Haran koro nambo-simó. 30 Sarai ŋuko pare kusimi. Simó moré kini.
31 Asa Tera, Abram, Lot, Sarai, soso Ur yendé ŋu rotoro Kenan mirako uyarewero toŋeŋgurí. Quko khe puŋomo yendé kano, owí muko Haran, ŋuno yoraŋgo.
32 Tera kumima naruyó 205 ŋunde rotoro ŋuno khumaró.