3 Tampara tampampiaing tee-koo tee Kumponing eeꞌnoko Bauma teie niikaang Ovoring Jiisuuꞌ Karistooꞌke,

tee eeꞌnara Karistooꞌkoo kuunge biraankemuruꞌ ookara biraankenankai Tanuaang Meekung-etaning paning-koo otoromainge.

4 Aaꞌnong teroita kansiꞌ mmeꞌ pupuꞌaravaruko-ita miruꞌmuruꞌ Karistooꞌkoo kuung oꞌnoritaaꞌ meekaꞌmariri oꞌnoriiꞌnaang tuumpimariaꞌ tee-koo dutakanooꞌke.

5 Tee tee piaamuritaaꞌ miruꞌmuruꞌ baurukaaꞌ deemariiꞌnaang Jiisuuꞌ Karistooꞌke makosi-antamurioꞌ baka bakaang piai,

maroita.

6 Teie teeꞌ nkomuruꞌ daangampampiainaꞌ tee-koo avuavuꞌ maneenung-koo Bauring Piaaruꞌkoo kuunge avusiroꞌari amuruꞌnung-koo.

7 Karistooꞌke bakaang erenge mooꞌmurira makosi-antamuriko Kumponinge niikaang orakaꞌ nkonanka tontaꞌmemurira unaa-antamuruꞌnung;

8 Teeꞌkoo bakei aaꞌnaꞌ maantoꞌ bakaang piaae niiꞌkoo piampuuꞌnunge,

9 tee eeꞌnara bakaang mataue tavoꞌantavuuꞌ bakaang noruꞌ ninka Kumponinge sirapoꞌantamemurima kapooꞌ makensiꞌnung teie tavoꞌanta-koo piavokoꞌ Karistooꞌkoo kuunge.

10 Tee aung eeꞌnara:

Uripoꞌketa teie marovukoꞌ tee Karistooꞌkoo ookara naroꞌuriiꞌnaang bateinang makotuko aaꞌning paning-nupoong eeꞌnoko kansiꞌnupoong,

ookara-koo boreꞌ deempari.

11 Ookara kapooꞌ tee Kumponinge matauvuma miruꞌumanaꞌ nkoaramaung,

eeꞌnoko niiꞌ teeꞌke Kumponinge bakaning deemariiꞌnaang miruꞌmuruꞌ Karistooꞌankoi tutuntomaa tampuuꞌnaꞌ.

12 Bakaang matau eeꞌ:

Niiꞌ urompiri Karistooꞌ nempampimainge nantoong daangang-antavarampiaing bakaang meenasi-koo.

13 Eeꞌnoko diiꞌ eeꞌning nariꞌke,

Karistooꞌankoi baitorariruꞌning kara masikung taaraverira tee doorenang tampara diiꞌ domanturiaing-koong.

Eeꞌnoko bakaning deentariko dateꞌantaruri Tanuaang Meekung aruruꞌ bakaning avuriiꞌnaang maraka-antavuuꞌnung.

14 Tee Tanuaang Meekung niiꞌ amuruꞌnung tee tasiꞌanta-koo niiꞌke nkavampiaing ootukunung barenku tero naumuruꞌnaꞌ.

Tee kompampirioꞌ Kumponinge asiꞌnaꞌmung dupe-antavui oko-antamuriaing,

niiꞌke tee daangampampiainaꞌ meenasi-poꞌnung.

15 Teeꞌkoo ninge taaravamira diiꞌ masikaꞌanta otoꞌderuring Ovoring Jiisuuꞌkoo eeꞌnoko diikaang piaa ookara Kumponing bakaning meekupoong-koo,

16 tenang-eta deto taararampira dotumaramaung kunsi-koo tantampima.

17 Eeꞌ eentamaramaung:

Teie Kumponinge niikaang Ovoring Jiisuuꞌ Karistooꞌ bakaange,

Baumai Meenasi Okovenunge aruriaing tee Tanuaang matau diiꞌkoo sirakaꞌantavuaing bakaang kara-koo miruꞌnooꞌ diiꞌke tasiꞌperiaꞌnaang tee Kumponing.

18 Ning eentamaramaung diikaang domang-koong dutai sirakaꞌantaruriko diiꞌke tasiꞌperiiꞌnaang tee barenku bokumurira bamuruꞌnung,

eeꞌnoko bakei aaꞌnaꞌ maantoꞌ meenasi-poꞌning otoromanaꞌ teing biraankenanka bakaning-koo meekupoong-koo maraka-antavuruꞌning tankeeꞌeeaining.

19 Eeꞌnoko napoꞌ eentamaramaang tasiꞌperiiꞌnaang iriꞌ aaꞌnaꞌ pankaing niiꞌkoo baitomarimaing-koo sipuing,

paaranang-koo makosi deeaung.

20 Tee aaꞌnung iriꞌ baukoniꞌke kompui Karistooꞌ booꞌketa daaꞌantavura tampavine-koo Kumponing-koo baꞌnang-antavuuꞌ paning-koo Ovoring-antavui.

21 Teenooꞌ Ovorinooꞌ tee deu basi anantenaung-koo:

ookara tare-nupoong,

pankainuka,

purintoꞌpoꞌnupoong,

ovontung eeꞌnoko ootukunung amutemuriiꞌ miring-poꞌnupoong,

enanariong eeꞌnoko damaꞌnariong napoꞌ nariꞌ.

22 Tee tee Kumponinge ookara kapooꞌnanka Karistooꞌkoong kauꞌkoo boong sipuma Karistooꞌ tee boreꞌ deeng-antavuuꞌ ookara kapooꞌnanka-koo dootuuꞌnupoong tampaꞌ pakuvuriainaꞌ,

teing tee bakaang mono makosinuka.

23 Eeꞌnoko tee-pinaꞌ boreꞌ mono ninka beꞌnuꞌura dupearapeuꞌnaꞌ teeꞌ nariꞌ Karistooꞌ dupe-anta baka dupearavaing ootukuarara.