Taamang Tankaananka ˜Kenaanka-taa Miruꞌaaruꞌnaꞌ
6
Tenang eeꞌnang tee batei-koo Juꞌnupoong Jiisuuꞌ siompaakoꞌnavitu karinga deempariruꞌ,
teing-koo nariong Kirikiꞌnaꞌ kareaakoꞌning eeꞌnoko nariong Iiburu-naꞌ,
eeꞌnoko teing Kirikiꞌnaꞌ kareaakoꞌninge teing Iiburu-naꞌ kareaakoꞌning minkuminkuaarikoꞌ aaꞌpaama,
“Niiꞌkooning manikuꞌ naaroonku tampaꞌ pakuaariarukooꞌ doong kante kapooꞌ tankaampaama.”
2 Eeꞌnoko teinge nanaiꞌketa kenaankai ookara Jiisuuꞌ siompaakoꞌning naroꞌ bokuaarira aaꞌpaaruꞌ,
“Niiꞌke Kumponing bakaang kara daankiampimaung tamung siꞌkoo makosi deeaꞌ taamang bantoꞌarampima.
3 Teeꞌkoo diiꞌke mmaikoriꞌke ˜kenaanka-taa nantoong diiꞌkooning niiꞌning miruꞌereriaing Tanuaang Meekunge eeꞌnoko mataue maantoꞌnuka tasiꞌpereritaaꞌ,
teing eeꞌning aung-koo amuriiꞌ nko-nko-koo siparampiaining.
4 Teka niiꞌ tee kunsi-koo eeꞌnoko Kumponing bakaang kara nau-anta-koo amariaing.”
5 Eeꞌnoko teie karai minkuauꞌnunge ookara karinga dotu-antavuruꞌ,
bera teinge aing aaꞌning tampaaruꞌ:
Sitiveni,
naning baito eeꞌnoko Tanuaang Meekunge maantoꞌ,
teketa Pilipiꞌ,
eeꞌnoko Porokorus,
eeꞌnoko Naikena,
eeꞌnoko Tiimon,
eeꞌnoko Paramenas,
eeꞌnoko Nikolas,
tee naning damaꞌ Juꞌ,
Antiokoꞌnung.
6 Teing aing eeꞌning kara okovuri nkanuka-anko uroꞌkanooꞌ donkong-antavaariko teinge kunsiaaruꞌ tankaꞌ panteꞌaarira teing-koo.
7 Eeꞌnoko teeꞌ nariꞌ Kumponing bakaang kara kato beremparuꞌ eeꞌnoko Jiisuuꞌ siompaakoꞌnavitu aaꞌnaꞌ mmauꞌariruꞌ teke Jerusalemaꞌke,
eeꞌnoko mmauꞌ piristiꞌnanka arooꞌariruꞌ Jiisuuꞌ baito-koo.
Sitiveni Daang Tuumpiauꞌnaꞌ Ovontung-ankoa
8 Eeꞌnoko Sitivenie tee,
Kumponing aaꞌnaꞌ masikaꞌantavuitaaꞌ eeꞌnoko iriꞌke maantoꞌui taaꞌniꞌantananka eeꞌnoko taꞌnimpaariiꞌnanka nkovukoꞌ nantoong-koo meuꞌke.
9 Teka niiꞌninge nantoonge daaꞌarira Sitiveni turampaakoꞌ.
Teing Juꞌ niiꞌnooꞌnupoong biikaang pava dootuuꞌnava-koo dootuuꞌarikoꞌning Kiimata-ita Simpiriꞌantaniiꞌnanka Biikanava tampaakoꞌnava-koo.
Teing eeꞌning Sairini-nupoong eeꞌnoko Aleksandaria-nupoong eeꞌnoko Silisia-nupoong eeꞌnoko napoꞌ Eesia-nupoong.
10 Teka Tanuaang Meekunge kakeꞌii-antavui Sitiveni karantavuko˜ makosiaavarukoꞌ.
11 Teketa tenang teinge niiꞌning nantoong makenge etuaaruꞌnung tosiarima aaꞌpaavaꞌnaang,
“Niiꞌke taaravampirioꞌ teie Kumponing orakaꞌ minkuvuing,
eeꞌnoko Moosesi.”
12 Eeꞌnoko terionge tee tosi-koong minkuminkuru aaꞌnaꞌ berempauꞌnung meuꞌke nantoong-koo,
eeꞌnoko biikaning pankenanka-koo eeꞌnoko boto naunuka-koo bera aaꞌnaꞌ iiravorouꞌ.
Eeꞌnoko teing Sitiveni-anko porora tee baransiiꞌaara koompaaraꞌnavitu naroꞌariruꞌnooꞌ tavoꞌauꞌ.
13 Bera tee daang-koong karananka masikeng-pinaꞌ donkong-antavaaruꞌ aaꞌpauꞌning,
“Aunge naninge uatepa ava pava dootuuꞌnava pankava meekava orakaꞌ minkuvumaung eeꞌnoko tee boto Moosesi-nung.
14 Aiꞌ niiꞌke tee taaravampirioꞌ minkuvuma aaꞌpumaung:
Teie Jiisuuꞌ Nasaretiꞌnunge ava derovura toomonanka Moosesie amuruꞌnanka aampariꞌantavuai.”
15 Eeꞌnoko ookara koompaaraꞌnavitu teke baꞌnampariruꞌninge ooai otoko bakaang oing koosinung˜pinaꞌ oroꞌparuꞌ.