Zân
Zisasiyet yaŋaŋ Zânaŋ meluwaŋ mge.
Zânaŋ Kawawaŋgalen Zet Zapat Dolakŋaŋ Penaŋ kapi kuye. Zân kapi Zisasiyet nembaŋaŋneyet tuŋguwinaŋgatnaŋaŋ Kawawaŋgalen Zet Zapat Dolakŋaŋ Penaŋ kapi kuye. Zemsiyet meniŋaŋ ma biwidaŋgat kwitnaŋ Zebedi (Matiyu 10:1-4; Mak 3:13-19 ma Luk 6:12-16). Zânaŋ Kawawaŋgalen Zet Zapat Dolakŋaŋ kuyeen ikŋaŋgat kwitnaŋ esemteŋ kumti, “Neŋ Zânaŋ kuyap,” kegok ku zeye. “Egaŋ nembaŋaŋ nâmtikŋaŋ mamin,” kegok kuye. Zet keboŋ ke omba kukuŋaŋ makuwek. Egaŋ buŋam zapat kapi etaŋ ku kuye. Zapat meluwaŋ tuk ŋen kuyeyaŋ bamgat eknup.
Matiyumak Mak ma Luk ekŋenaŋ am maŋgeen kwep kwepgat kumindawien. Zânaŋ buŋam zapat kapi apapalak papia kuye. Am sambe msat kataŋ ekŋengat zapat kuye. Zet Zapat Dolakŋaŋ kapi Matiyumak Mak ma Luk ekŋenaŋ kuwien keyet kateŋ yek. Egaŋ Zisasiyet yaŋaŋ penaŋ deyetnaŋ kokotnaŋ ma egaŋ kuleki penaŋ mimiyet koge keyet yaŋaŋ weyaŋ kuye. Zet ŋotekŋaŋ Zânaŋ kuyeen ŋen kapigok, Zisas ek Kawawaŋaŋ an peme koti am mama mimiŋin bekananengatnaŋ gilik zemindatimti mama teŋ am indandayet zenzeŋaŋ wan ilak koti kegok mmâge.
Zet ŋotekŋaŋ temaŋ Zângalen buŋam zapat keŋan kapigogaŋ talip:
1:1-18. Zisas eweŋan an kwi penaŋ maŋge
1:19-51. Zân an tu zulutindende egaŋ mulupmaŋ ewe tapme Zisasiyaŋ yaŋbemti nembaŋanen indage
2–6 Zisasiyaŋ am tuŋguwinaŋ mulup yaŋbemti mge
7–11 Zisasiyaŋ menok notnaŋ mti an ŋeŋaŋ bembe ekŋenmak zet mdândâ notnaŋ mge
12–19 Zisasiyaŋ gakikiyelen set im mege
20 Zisasiyaŋ gakikiyengatnaŋ wage
21 Nembaŋaneyet zemgwatnaŋ notnaŋ mimindamti kululuŋen mowege