Idi inpakaan din taga-Babilonia da Ari Jehoyakin ay anak Ari Jehoyakim ya din papangolon di ipogaw ya nankalalaing ay man-obla ed Juda ta mantee da ed Babilonia, waday dowa ay baskit ay inpailan Diyos en Jeremias. Di esa yan napay-an si mam-is ay igos, di esa pay yan lawlawa ay igos ay adi kakan. Kanan Diyos en din mam-is ay igos yan say kaiarigana din ipogaw ay enggay naiey ed Babilonia. Ayowananas daida et mantaoli din poli da sin bokod da ay ili. Mo din lawlawa pay ay igos, daidas da Ari Zedekias ya din nakalasat sin naabakan di Jerusalem. Dosaen Diyos daida am-in enggana ay magay mabay-an.

Sakbay ay naamag dana, waday inpaipadton Diyos en Jeremias sin maikap-at ay tawen ay nanturayan Ari Jehoyakim. Kanan Jeremias sin kaipoipogaw en inpidwapidwa na ay nangibaga sin kalin Diyos en daida sin oneg di dowanpo ya tolo ay tawen manlogi sin timpon Ari Josias ya siya met laeng di inam-amag din iib-a na ay mamadto, ngem adi dan pinatpati. Gapo sidi, siya na di mapasamak en daida. (24:1–25:7)