Idi en ginobat din soldadon di Babilonia ed Jerusalem yan nilikob da din siyodad, inpaayag Ari Zedekias si Jeremias ta damagena mo mabalin ay man-amag si Diyos si milagro ta maabak din taga-Babilonia ya somaa da. Ngem kanan Jeremias en nakeddengan din siyodad ay mabakas ya mapooan. Din mayad ay matago et bomala da koma sin siyodad ta somoko da sin taga-Babilonia, tan din mantetee sin siyodad et sigurado ay matey da sin gobat, betil ono sakit. Pag ipaammon Jeremias sin kaipoipogaw din dosa ay inkeddeng Diyos sin lawa ay aari ay nanturturay ed Juda sin timpo na ay da Sallum en Jehoyakim ay anak Josias ya si Jehoyakin ay anak Jehoyakim. (21:1–22:30)