Din Tolong Diyos Sin Ipogaw Na
(26:1-8,19)
26
Domteng to di timpo ay siya na di maikanta sin ili ay Juda:Din siyodad tako et napigsapigsa!
Tan si Diyos ay mismo di kaman makneg ay alad na
ay manalaknib ya mangisalakan sin ipogaw na.
2 Din segpan di siyodad, bokatan yo koma
ta din kaipoipogaw ay nalinteg ya senggep da.
3 Sik-a ay Diyos di mangidawat si tet-ewa ay talna
sin adi mankeyat ay mantalek en sik-a.
4 Mantalek kayo si eng-enggana en Diyos Apo,
tan kaman makneg ya komakaman ay bato
ay say kanayon ay pankamangan tako.
5 Din nangato et inpababa na.
Dinadael na din napigsa ay ili da
ya tinokang na din alad na.
6 Ed wani din nabiteg ya napalpaligatan et gatigatinan da
din nabakas ay siyodad ay sana.
7 Sik-a ay Diyos di mangipasiged
ya maningpa sin danan di nalinteg.
8 Tongpalen mi din laydem ya mantalek kamin sik-a.
Magay odom si anapen mi mo adi et sik-a.
19 Din matey et matago da,
matago kasin din awak da.
Amin ay wada sin kaot da,
matago da ay mangibogaw si ragsak da.
Kaman din panibogan di odan si mola ta matago da,
say iyat Diyos sin natenatey ay manago en daida.
Pag dayawen Isaias si Diyos begew sin panosaanan to sin kaipoipogaw isnan daga ay nakabasol. Abakenan to din kalaban di Israelita ya ayowanana din ipogaw na ay kaman din mangay-ayowan si kaobasan. Dayawen aben Isaias si Diyos tan kaanenan to din basol di ipogaw na ya pasaldengena din panaydayawan das sinan didiyos. Asi na aben itaoli din ipogaw na sin kosto ay ili da ay mapo sin kailiili ay naiwarasan da.
Pag ipadton Isaias din omalian di taga-Assyria ay manadael ed Samaria ay kapital di Israel. Tan olay din mamadto ya papadi ed Israel yan makabeteng da ya adi da kabagbagaan. (26:20–28:8)