Paul kaah iitaat aniyaayiu kaa taapwaayaayihtimiyich aakaa chaa chii mikushkaataayihtimiyich
4
1 Aakw maak niichishaanitikw, chiiyiwaau naashch kaa saachihiitikuch, muush kaa chischitaatikuch. Nuwich chimiywaayihtimihiinaawaau kiyaah chimaamihchihiinaawaau chaa chii tipaachimitikuch. Aaukw uu kaa iishi aayimuutimaatikuch aa nitiwaayimitikuch chaa chii aayichikaapuyaakw aa taapwaayaayimaakw tipaayihchichaasiu.
2 Nipikusaayimaauch anichii iskwaauch Eudia kiyaah Syntyche kaa ishinihkaasuch aa wiih ninihiihtuwaach tipaayihchichaasiu chaah aakaa ustuuwaayimituuch.
3 Niwiichaawaakin muush kuiskw kaa chiih tiyin aa wiichiaapitisiimitaan chinitutimaatin chaa chii wiichihiitwaau uchii iskwaauch chaa chii puuniich aa wustiwaayimituch. Waash taapishkun chii mishtih aapitisiwich aa wiichihiich aa waawiihtimuch miywaachimuwiniyiu. Kiyaah an naapaau Clement kiyaah anichii kutikich kaa wiichiaapitisiimikwaau, utishinihkaasuwiniwaau kaa misinaataayiyich Chishaaminituuh umisinihiikiniiyich chaa chii iyaach kaachich pimaatisiiwiniyiuh.
4 Muush miywaayihtimukw aa taapwaayaayimaakw tipaayihchichaasiu. Miin maak chiwiihtimaatinaawaau miywaayihtimukw.
5 Iishi pimaatisiikw misiwaa iiyiyiuch chaa chii chischaayimitaakuch aa ishpish chishaawaatisiyaakw. Shaash paashunaakuniyiu chaa ishpish tikushihk tipaayihchichaasiu.
6 Akaawii chaakwaan chiki uhchi mikushkaataayihtimihiikunaawaau. Tiyikuch misiwaa taan chaa aati ispiyiwaakwaa ayimihaakw, aa waawiihtimuwaakw Chishaaminituu chaakwaayiu aa iishi nitiwaayihtimuwaakw. Kiyaah maak chipih ninaaskumaawaau.
7 Aakw maak Chishaaminituu chaa miyitaakw chiyaamaayihtimuwiniyiu aakaa chaa chii aayimaayihtimiskaakuwaakw chaakwaayiu chimitunaayihchikiniwaahch kiyaah maak chitaahiiwaahch waash aa taapwaayaayimaakw Christ Jesus. Aaukw uu chiyaamaayihtimuwin kaah aayimuutaach nimui mitun chii nistuhtaakiniu taan aa ishpish miywaayihtaakuhch.
8 Niichishaanitikw, aashkw aahaakaa chiishihtaayaan aa misinihaamaatikuch paayikw miin chaakwaan chiki wiihtimaatinaawaau, suuhk muush maamitunaayihtimukw anihii chaakwaanihii aa taapwaamikihch kiyaah aa miywaashihch, anihii kaa mimihchihiiwaahch, muyaam chaakwaan aa kuiskunaakuhch, chaakwaan aa chistaayihtaakuhch, kiyaah kuiskw iyihtiwin, piyaahchi pimaatisiiwin, chaakwaan aa nihaayihtimihiiwaach kiyaah chaakwaan aa miyu tipaatutaach.
9 Chipih tutaanaawaau an kaa iishi chischinuhamaatikuch kiyaah an kaa iishi waapimiyaakw aah iitaatisiiyaan. Aakw maak Chishaaminituu an kaa miyitihkw chiyaamaayihtimuwiniyiu chiki wiichaaukuwaau.
Paul kaa ninaaskumut taan kaa iishi wiichihaakinuut
10 Naashtaapwaah nimiywaayihtimihiikw tipaayihchichaasiu miin aa miyitaakw chaa chii wiichihiiyaakw. Shaash waashkich kaa wiih wiichihiiyaakw. Mikw maak aakw iyaakw miin naahiipiyihch chaa chii nuukuhtaayaakw aa maamitunaamiyaakw.
11 Nimiyaau kiyipwaa wii aa nuuhtaapiyaan chaakwaan waahchi iyaan uu. Waash shaash nichischaayihtaan ayaapich chaa chii nihaayihtimaan aat aakaa naashch iyaayaan chaakwaan.
12 Nichischaayihtaan waash taan aa iitaayihtaakuhch aa nuuhtaapiyinaaniwich chaakwaan, kiyaah taan aa iitaayihtaakuhch aa waayuuchihtaakiniwich chaakwaan. Mikw taan aayispiyiwaanaa nichischaayihtaan ayaapich chaa chii nihaayihtimaan. Nimui wiyaash nitiiitaayihtaan aa shiiutaayaan kiyaah maak aa chiishpuyaan, aa chistimaatisiyaan kiyaah maak aa waayuuchihtaayaan chaakwaan.
13 Taan mikw chaa iispiyiwaanaa, misiwaa niki chii shaapushkaan waash Christ nimiyikw suuhkaatisiiwiniyiu.
14 Taapwaah chichii miyututaanaawaau kaa wiichihiiyaakw taan kaa iishi aayimihuyaan.
15 Chiiyiwaau Philippihch kaa uhchiyaakw, chichischaayihtaanaawaau aatisich umaamuuayimihaauch chiiyiwaau mikw aa chii wiichihiiyaakw shuwiyaan uhchi iishpih kaa nikitimaan Macedonia aschii. Chiiyiwaau mikw chichii wiichihiinaawaau uskich kaa waawiihtimaan miywaachimuwin.
16 Chihchii paachi iitishihamuunaawaau maan shuwiyaan kaa chii nuuhtaapiyaan maakwaach anitaah Thessalonicaahch ihtaawin kaa chii ihtaayaan.
17 Nimui wiih aa nitiwaayimaakw chishuwiyaanimuwaau, austaa ninitiwaayihtaan chaa chii waayutihch chaa iishi chishaawaatutaakuwiyaakw.
18 Shaash misiwaa aa chii iyaayaan an kaa iishi paachi wiichihiiyaakw. Aakw maak misiwaa aa iyaayaan taan kaa iishi nuuhtaapiyaan Epaphroditus aa chii paatuwaat aniyaayiu chii miyiwaawiniwaau. Uu kaa iishi miyaakw naashch aa miywaashich pichistinichaawin iishi kiniwaapihtim Chishaaminituu kiyaah naashch nihaayihtimihiikuu.
19 Aakw maak Chishaaminituu an aapitishiishtuukw chiki uhtinimaakuwaau misiwaa chaakwaayiu aa iishi nuuhtaapiyiwaakw, waash aa ishpish naashch waayuch miyututimaachaat Christ Jesus uhchi.
20 Kaachich kiti maamihchimaakiniu Chishaaminituu kuuhtaawiiniu. Aamin.
Maahchaayi kaa iitisinihaamuwaat Paul aniyaayiuh iiyiyiuh
21 Waachiyaamaahkuch misiwaa anichii kaa taapwaayaayimaach Christ Jesus. Chiichishaanuuch utih kaah taach chiwaachiyaamikuwaauch kiyaah wiiyiwaau.
22 Misiwaa anichii kaa taapwaayaayihtihch chiwaachiyaamikuwaauch, kiyaah maak naashch mishtiih chiwaachiyaamikuuwaauch kaah aapitishiich chihchiuchimaau Caesar aah taayich.
23 Ninitutimuwaau maak tipaayihchichaasiu Jesus Christ misiwaa chaa chii chishaawaatutaataakw.