Philippians
Paul kaa misinihaamuwaat umaamuuayimihaau Philippihch kaah taayich
Paul kaa misinihaamuwaat Jesus utiiyiyimiyiuh Philippihch kaah taayich
1
1 Niiyi Paul kiyaah Timothy nitaapitisistuwaanaan Christ Jesus. Chimisinihaamaatinaawaau chiiyiwaau anitaah Philippihch kaah taayaakw kaa taapwaayaayimaakw Jesus Christh, kiyaah chiiyiwaau kaa niikaaniskuuwaakuch umaamuuayimihaauch kiyaah chiiyiwaau kaa wiichihiiwaayaakw anitih ayimihaaukimikuhch.
2 Nitutimuwaauch Chishaaminituu kuuhtaawiiniu kiyaah tipaayihchichaasiu Jesus Christ chaa chii miyututaataakuch kiyaah chaa chii miitaakuch chiyaamaayihtimuwiniyiu.
Paul kaa ayimihaashtimuwaat aniyaayiuh kaa taapwaayaayihtimiyich Philippihch kaah taayich
3 Nininaaskumaau Chishaaminituu aan aayaamihaastuukw, tihtu miyaamitunaayimitikuch.
4 Kiyaah naashtaapwaah nimiywaayihtaan, tihtu aa ayimihaashtimaatikuch,
5 Aa chischiyaan taan kaa ishpish paachi miyu wiichihiiyaakw aa waawiihtimuukwaau iiyiyiuch miywaachimuwiniyiu Jesus aah aayimuumaakiniwiyich. Aaukw an uskich kaah aati waawiichihiiyaakw niishtim kaa paahtimaakw miywaachimuwin aashkw maak maakwaach anuuhch chiwiichihiinaawaau.
6 Nichaashtinaahuun maak Chishaaminituu chaa chii chiishihtaat taan kaa iishi chihchi miyunaakuhtaat chipimaatisiiwiniwaau kiyaah chaa wiichihiitaakw atitiu chaa chii aati chiisinihtaauchuwaakw piihim aniyaayiu aa chiishikaayich tikushiniiyichaa Jesus Christ.
7 Waash aaukw kuiskw asinaakuuhch uu chaa chii iishi maamitunaayimitikuch, aa saachihiitikuch. Waash misiwaa chichii wiichihiinaawaau an aapitisiiwin Chishaaminituu aa chishaawaatutaauut kaa miyit. Aat utih maakwaach chipihutuukimikuhch aah taayaan ayaapich maakwaach aashkw aa chispaawaatimaan miywaachimuwin kiyaah aa waawiihtimaan aa taapwaamikihch.
8 Chishaaminituu chischaayihtim taan aa ishpish naashch miin wiih wiichaautikuch, waash Christ Jesus nichiihtutaakw naashch chaa chii saachihiitikuch.
9 Chitiyimihaashtimaatinaawaau atitiu chaa chii iyaayaakw mishtiih saachihiiwaawin kiyaah chischaayihtimuwin kiyaah miyu nistuuhtimun
10 Chaa chii aati chischaayihtimaakw taan an maauch chaa kuiskunaakuhch chaa chii iishi pimaatisiiyaakw aakw maak mitun chaa piyaahchi pimaatisiiyaakw kiyaah nimui mitun kiti uhchi tikun chaa iishi ataamaayihtaakusiyaakw iishpih tikushihkaa Christ.
11 Mikw Jesus Christ chiki tutaakuwaau chaa chii kuiskutaatisiiwaakw, chaa chii uhchi miyututiwaakuch kutikich. Aakutaah maak Chishaaminituu chaa chistaayimaakinuut kiyaah chaa maamihchimaakinuut.
Chaa chii pimaatisiiyaan aaukw Christ
12 Niichishaanitikw chinitiwaayimitinaawaau chaa chii chischaayihtimaakw uu kaa iishpiyaan aa chipihukiwiyaan taapwaah chii aati wiichihiikuch kutikich iiyiyiuch chaa chii aati taapwaahtihch miywaachimuwiniyiu.
13 Muyaam misiwaa anichii nitupiyuuch kaa naanaakichihtaawaach chihchiuchimaau uwaaskaahiikinimiyiu kiyaah kutikich iiyiyiuch utih kaah taach chischaayihtimuch aah aapitishiishtaamich Christ waahchi taauch utih.
14 Kiyaah maak, aah taayaan utih chipihutuukimikuhch mihchaatu chiichishaanuuch atitiu suuhchikaapuwich aa taapwaayaayimaach tipaayihchichaasiu, atitiu aati suuhchitaahaauch aa waawiihtihch miywaachimuwiniyiu aahaakaa mitun kushtaachich.
15 Tapwaah kiyipwaa taauch iiyiyiuch mikw aa uwihtaayimich kiyaah maak aa wiih mimichipiyihiich aayuwikw waahchi aayimuumaach Christ. Aakw kutikich suuhk waawiihtimuch miywaachimuwiniyiu kuiskw aa wiih iyihtich, aayuwikw waahchi aayimuumaach Christ.
16 Aaukunich maak uchii nuukuhtaach aa saachihiich, chischaayihtimuch Chishaaminituu aa chii uwaayaapimiyich chaa chii waawiihtimuch aa taapwaamikiniiyich uyaayiu miywaachimuwiniyiu.
17 Anichii kutikich kaah aayimuumikwaau chii kaachaaskwaauch Christ uu miywaachimuwiniyiu mikw wiiyiwaau utitaayihtimuwiniwaahch uhchi, nimui aniyaayiu wiih aachii wiyiwiichihaawaakupinaa awaayiuh. Aayuwikw aahtich atitiu aa wiih waaushtaapiyihiich utih chipihutuukimikuhch aahtaauch.
18 Aakush kiti ayihtuwich. Waash maak ayaapich kichaaskwaatwaawaa Christ aah aayimuumaach, iyaat maak kwaayiskw asinaakuniiyikwaau kiyaah maak aakaa kwaayiskw aasiinaakuuniiyikwaau waahchi iishi kaachaaskwaach uyaayiu, iyaapich nimiywaayihtaan, suuhk maak niki muuchiichaayihtaan.
19 Waash nichischaayihtaan chaa pichistinikiwiyaan waash chitiyimihaashtimuunaawaau kiyaah maak Jesus Christ kaapiyaahchisiiyich utihchaahkw ni paachi wiichihiikuyiu.
20 Naashch nipikusaayihtaan kiyaah nitispaayimuun aakaa nihtaa chaa chiih tutimaan chaakwaan anitih chaa chii uhchi aatiwaayihtaakusiyaan aah aapitishiishtuukw Christ, aahaakaa niniihiiwaahyik Chishaaminituu. Tiyikuch chaa chii suuhchitaahaayaan muush chaa chii chistaayihtaakuhaakinuut Christ nipimaatisiiwinihch muyaam anuuhch aah aa ishpish chishtaayihtaakuhiik, maakwaach aa pimaatisiiyaan kiyaah maak nipihiikuwichaa wiiyi uhchi.
21 Niiyi kiyipwaa chaa ishpish pimaatisiiwaanaa muush niki pipaawiichaauwaau Christ. Nipihiikiwiyaanaa maak aatituu niki miyupiihyikuun niiyi.
22 Atitiu maak chaa miyikuwaanaa chaa chii pimaatisiiyaan utih aschiihch, aakw atitiu chaa miyu aapitishiishtuukw Christ aa waawiihtimaan miywaachimuwin. Miyikiwiyaan maak chaa chii wiyaayihtimaan, chaa chii nipiyaan kiyaah maak chaa chii pimaatisiiyaan nimui nichischaayihtaan taanitaah an nipih iishi wiyaayihtaan.
23 Taapishkun nimushtaanaayaayihtaan aa niishihch. Naashtaapwaah niwii nikitaan uu aschii, Jesus Christ aah taat chaa chii taayaan. Aaukw uu austaa maaywaashich.
24 Mikw maak chiiyiwaau uhchi, austaa iitaayihtaakun chaa chii pimaatisiiyaan.
25 Nichaashtinaahun maak taapwaah aa nitiwaayihtaakusiyaan aashkw chaa chii pimaatisiiyaan utih aschiihch chiiyiwaau uhchi. Nichischaayihtaan maak chaa taayaan anitih aah taayaakw chaa chii wiichihiitikuch atitiu chaa chii suuhchikaapuyaakw aa taapwaayaayimaakw Christ kiyaah chaa chii muuchichaayihtimaakw an uhchi.
26 Aakw maak atitiu chaa tikuhch aa maamihchimaahkw Christ Jesus iishi waash an miin aa paachi nitiwaapimitikuch.
Aa ninaahkaataayimuyihkw Christ aa nuushuushkuhkw
27 Mikw maak yaayitaai chaa chii iishi pimaatisiiyaakw taan aatishumukuyihkw Christ uu miywaachimuwin. Aakw maak aat aakaa miin chii waapimitikuchaa kiyaah maak nihiipiyihchaa miin chaa chii waapimitikuch aa paahtimaan aah aayichikaapuyaakw, misiwaa paayikunihch ahchaahkuwinich maamuu aa iitaayihtimaakw taan waah tiyaakw kiyaah taapwaah paayikunihch aa iishi pikusaayihtimaakw aa maamuu aahchiishtimaakw aa waawiihtimaakw miywaachimuwin.
28 Aakaawii chiki uhchi kushtaawaauch anichii wiyaash kaa wiih tutaataakuch miywaachimuwiniyiu aa waawiihtimwaakw. Waash aakutaah chaa uhchi chischaayihtihch wiiyiwaau chaa aahaakaa pimaachihaakiniwich kiyaah chiiyiwaau chaa pimaachihiikuwaakw. Chishaaminituu maak wiiyi misiwaa kiti tutim uyaayiu chaa chii iispiyiyich.
29 Chishaaminituu maak chichii wiyaayimikuwaau nimui mikw chaa chii taapwaayaayimaakw Christ, chichii wiyaayimikuwaau kiyaah chaa chii ninaahkaataayimuyaakw Christ uhchi.
30 Taapishkun maak chichii aayimihiikunaanuuu, chichii waapiminaawaau taan kaa iishi nichishkimaan. Chipaahtaanaawaau aashkw ayaapich aah aayimihuyaan.