Jesus kiyaah Nicodemus
3
1 Chiih taau naapaau Nicodemus aa ishinihkaasut, Phariseeyich chii uhchiiu kiyaah aaukw an paayikw kaa niikaanishkiwaat Jew iiyiyiu.
2 Paayikwaau maak aa tipiskaayich chii nitiwaapimaau Jesus aakw aataat, “chiskutimaachaasiu, chii chischaayimitinaan chiiyi aah aawiyin chiskutimaachaasiu aa chii paachi iitishuhuusk Chishaaminituu. Waash nimui awaan chiki chiih tutim aniyaayiu maamishkaach iyihtiwin chiiyi kaah tutimin aakaa wiichaaukuchaa Chishaaminituu.”
Aa nitiwaayihtaakuhch miin chaa chii iiyiyiut awaan
3 Aakw Jesus aataat, “naashch taapwaah chiwiihtimaatin, nimui awaan chiki chii waapihtimwaau Chishaaminituuh uchihchiuchimaawiniyiuh paatish miin chii iiyiyiwichaa.”
4 Aakw Nicodemus aatikut, “taanitaah miin chaa chii uhchi iiyiyiwit awaan shaash aa chiish nihtaauchit? Nimui miin chiki chii piihchaawaau ukaawiih uspiyaayihch miin chaa chii iiyiyiwit.”
5 Aakw Jesus aataat, “kuiskw chiwiihtimaatin, nimui awaan chiki chii piihchaau Chishaaminituuh uchihchiuchimaawiniiyich paatish nipiihch kiyaah ahchaahkuwinihch uhchi iiyiyiuhiikuchaa.
6 Misiwaa chiniichihiikunuuch aah taach chichii uhchi iyaanaaniu uu iiyiyiu pimaatisiiwin. Mikw maak kaa piyaahchisiit ahchaahkw aah taat uhchi aakutaah waahchi iyaayihkw ahchaahkw pimaatisiiwin.
7 Akaawii maamishkaataayihtimihiikw uu aah iititaan aa nitiwaayihtaakusiyin miin chaa chii iiyiyiuiin.
8 Aa yuutihch, mikw anitaah waah iishi yuwaach aakutaah aa iishi yuwaach. Paahtaakun aa yuutihch nimui mikw chischaayihtaakun taanitaah nihaau waahchipiyich kiyaah taanitaah aa ispiyich an aa yuutihch. Aayuwikw maak muyaam aa isinaakusit misiwaa tihtu awaan kaa piyaahchisiit ahchaahkw kaa uhchi pimaatisiit.”
9 Aakw Nicodemus aatikut, “taanitaah maak chaa chii uhchi iispiyich uu.”
10 Aakw Jesus aataat, “chiiyi aaukw paayikw chiskutimaachaasiu utih Israelihch, iyaapich aa maak nimui chii nistuhtaan uu kaa iyaan?
11 Kuiskw chiwiihtimaatin. Nitiaayimuutaanaan taan aa iishi chischaayihtimaahch kiyaah taan kaa iishi waapihtimaahch, nimui maak chiiyiwaau chiwiih taapwaahtuunaan.
12 Nimui chitaapwaahtuunaawaau aa wiihtimaatikuch taan aayispiyiyich utih aschiihch. Taanitaah maak chaa chii uhchi taapwaahtimaakw wiihtimaatikuchaa taan aa iitaayihtaakuhch anitaah chihchichiishikuhch?
13 Nimui maak awaan uhchi uhpiskaau chihchichiishikuhch iishi mikw an iiyiyiuukusisaan aaukw an wiiyi chihchichiishikuhch kaa uhchi paachi yaashiit.”
Taanitaah chaa chii uhchi iyaat awaan kaachich pimaatisiiwiniyiu
14 Muyaam aniyaayiu kaah tik aniyaa Moses maakwaach pikutiskimikaahch kaah taach kaa chikimuhaat kiyaah kaa niimaaskuwaat achinaapukuhkaan mistikuhch misiwaa awaayiuh chaa chii waapimaayich, aayuwikw muyaam kiyaah wiiyi chipih niimaaskuhwaakiniu iiyiyiukusisaan.
15 Aakw maak misiwaa awaan kaa taapwaayaayimaat chaa chii iyaat kaachich pimaatisiiwiniyiu.
16 Waash Chishaaminituu kaa ishpish saachihaat aschiihch aah taayich chii pichistinaau mikw kaa paayikushiyich ukusish, mikw aniyaayiuh awaayiuh chaa taapwaayaayimikuyich chaah aakaa iiyiwihuyich, maak chaa chii iyaayich kaachich pimaatisiiwiniyiu.
17 Waash Chishaaminituu chii paachi iitishihwaau ukusish utih aschiihch chaa chii pimaachihaayich awaayiuh, nimui wiiyi chaa chii paachi nishiwinaachihmaayich.
18 An maak awaan tiyaapwaayaayimimaat ukusisimaau nimui nishiwinaachimaakiniu, an wiiyi aakaa taapwaayaayimaat shaash nishiwinaachimaakiniu waash nimui taapwaayaayimaau aniyaayiu Chishaaminituuh kaa paayikushiyich ukusisiyiuh.
19 Aaukw maak uyaayiu chaa uhchi tipaaskunaakiniwich. Waashtaawin chii paachi pichistinaakiniu utih aschiihch mikw maak austaa chii saachihtaauch iiyiyiuch aukaashtaayaawiniyiu ishpish wiiyi waashtaawiniyiu, waash chii michaatisiwich.
20 Waash misiwaah taahtu awaan kaa michihtutihk uhkaatim aniyaayiu waashtaawiniyiu nimui wiih naatim waash nimui nitiwaayihtim chaa chii nuukuniiyich umichiiihtuwin anitaah aa waashtaayich.
21 Mikw maak an awaan taapwaawinihch kaa iishi pimaatisiit anitaah aa waashtaayich iituhtaau, aakw maak nuukuniiyich taan aa iishi ninihiihtiwaat utihtuwinihch Chishaaminituu aa wiichihiikut.
John siikihaahtaachaasiu kaa wiihtihk Jesus aah aawiyich Christ
22 Paatimaa maak anitaah Judea aschiihch chii iituhtaau Jesus uchischinihamuwaakinh aa wiichaaukut. Aakutaah anitaah kaa taawaat aah taayich kiyaah chii siikihaahtaachaau.
23 Kiyaah wiiyi John chii siikihaahtaachaau anitaah Aenon, nimui waahyiu anitih uhchi selimihch waash naashch chii mishaayiu nipiiyiu anitaah. Muush chii nitiwaapimikuu awaayiuh aa nitiwaayihtimiyich chaa chii siikihaahtiwaat, chii siikihaahtiwaau maak.
24 Aayuwikw uyaayiu kaah tik John aashkw aahaakaa uhchi utinaakinuut chaa chipuuhwaakinuut.
25 Pisch maak aniyaayiu John uchischinihamuwaakinh kiyaah kutikich Jew iiyiyiuch chii wishtaapiyiwich aah aayimuutihch ayimihaau piyaahchihiiwaawiniyiu uhchi.
26 Chii nitiwaapimaauch John kiyaah chii iitaauch, “chiskutimaachaasiu, an naapaau taapishkun kaah taayaakw anitaah waapinuutaahch an Jordan siipii, an kaah aayimuumit, anuuhch kiyaah wiiyi siikihaahtaachaau kiyaah misiwaa awaayiuh nitiwaapimikuu.”
27 Aakw John aataat, “nimui awaan chiki chii iyaau chaakwaayiu paatish Chishaaminituu chihchichiishikuhch aah taayich miyikuuchaa chaa chii iyaat.
28 Chiiyiwaau maak chichii paahtuunaawaau uu kaa iyaan, ‘nimiyaau niiyi an Christ, mikw maak nichii paachi niikaanitishihukiwin niiyi chaa chii aayimuumik.’
29 Aaukw waasin niiyi muyaam an uschinaapaawaan uwiichaawaakin, wiiyi chiki wiichimaau aniyaayiu uschiskwaawaan. Aniyaayiu maak uwiichaawaakin an uschinaapaawaan, aniyaayiu kaa wiichihiiwaayich, ashiniwaahiikuu chaa ishpish tikushihk kiyaah miywaayihtimiyiu iishpih piyaahtaakut. Aaukw maak muyaam kiyaah niiyi aa ishpish miywaayihtimaan shaash aah taat an kaa paachi iitishihukut Chishaaminituu.
30 Nitiwaayihtaakun maak wiiyi atitiu chaa chii aati chistaayimaakinuut, aakw niiyi naanaanichiim aakaa chaa chii ishpish chistaayimikiwiyaan.”
An chihchichiishikuhch kaa uhchiit
31 Waash an ishpimihch kaa uhtuhtaat aaukw an maauch aa ishpaayihtaakusit. An aschiihch kaa uhchiit, aschiihch iishi pimaatisiiu, kiyaah aschiiyiu aayimuutim. An awaan chihchichiishikuhch kaa uhchiit wiiyi maauch iispiyihtaakusuu.
32 Wiihtim taan kaa iishi waapihtihk kiyaah taan kaa iishi paahtihk anitaah chihchichiishikuhch, mikw maak nimui awaayiuh taapwaahtaakuu.
33 An awaan kaa utinimwaat taan aah iiyiyich aakutaah nuukuniiyich aa taapwaahtihk Chishaaminituu aa taapwaauchaayihtaakusiiyich.
34 An kaa paachi iitishihukut Chishaaminituu iyiu taan aa iishi miyikut Chishaaminituu chaa chii iyit kiyaah mitun piihchishkaakuu Chishaaminituu utihchaahkuyiu.
35 Uhtaawiimaau saachihaau ukusisimaau. Chii miyaau misiwaa chaakwaayiu chaa chii tipaayihtimiyich.
36 An maak awaan kaa taapwaayaayimaat ukusisimaau iyaau kaachich pimaatisiiwiniyiu, aakw an awaan aakaa kaa ninihiihtiwaat ukusisimaau nimui chiki uhchi iyaau kaachich pimaatisiiwiniyiu. Chishaaminituu utaahkiwiwaashuwiniyiu chiki chichishkaakuu.