Uupaayaahchi miywaachimuwin kaa misinihaahk maayuhtwaat
John
Christ kaa tipaachimaakinuut chaa tikushihk
1
1 Maauch uskich kaah chischipiyinaaniwich, shaash wiiyi chii taahtaakupin an ayimuwin. An ayimuwin maak chiih taau aah taayich Chishaaminituuh kiyaah ayimuwin wiiyi chiih aau Chishaaminituu.
2 Shaash chiih taau ayimuwin Chishaaminituu ahtaayich anitaah maauch uskich.
3 Misiwaa chaakwaayiu wiiyi chii ushihtaau, nimui tikuniyiu chaakwaayiu wiiyi aahaakaa uhchi ushihtaat.
4 Wiiyi aah taat uhchipiyiu pimaatisiiwiniyiu, pimaatisiiwiniihch maak aakutaah kaa uhchi waashtaanimaakuch iiyiyiuch.
5 Waashtaawin maak chiihkaayaashtaau aukaashtaayaawinihch kiyaah aukaashtaayaawin maak nimui uhchi chii aashtuwaaham aniyaayiu waashtaawiniyiu.
6 Chiih taau naapaau Chishaaminituu aa chii paachi iitishihukut John aa ishinihkaasut.
7 Chii paachi tikushin chaa chii chischaayihtaakunichaasiwit, chaa chii chischaayihtaakunichaat aniyaayiu waastaawiniyiu aakw maak misiwaa iiyiyiuh paahtaakuuchaa chaa chii taapwaahtimiyich wiiyi uhchi.
8 Nimiyaau maak wiiyi iiyaawit an waashtaawin an iyaayimuutaach mikw maak wiiyi chii paachi iitishihwaakiniu kuiskw chaa chii wiihtihk waashtaawiniyiu.
9 Uu chihchiwaa waashtaawin chii paachi tikushin utih aschiihch misiwaa tihtuu awaayiuh chaa chii waashtaanimuwaat.
10 Utih aschiihch chiih taau. Aat wiiyi aa chii ushihtaat uyaayiu aschiiyiu ayaapich nimui uhchi chischaayimikuu iiyiyiu utih aschiihch.
11 Chii paachi naatim aniyaayiu kaa taapiyiwaaushiit, mikw maak aniyaayiuh tipiyiwaa utiyiyimh nimui uhchi utinikuu.
12 Aniyaayiuh maak awaayiuh kaa utinikut kiyaah kaa taapwaayaayimikut chii miyaau kischihuwiniyiu chaa chii utiwaashishiimitutaakuyich Chishaaminituuh.
13 Aniyaayiuh maak kaa utiwaashishiimitutaakuch nimui wiiyi iskwaau kiyaah maak naapaau aah taayich uhchi pimaatisiiwich nimui kiyaah iiyiyiu utitaayihtimuwiniihch uhchi. Taapwaah Chishaaminituu aah taayich chii uhchi uschi pimaatisiiwich.
14 An maak ayimuwin chii iiyiyuuhaakiniu, chichii wiichimikuniu utih aschiihch. Chichii waapimaaniu maak aa maauch chistaayihtaakusit muyaam aa ishpish maauch aa chistaayihtaakusiiyich Chishaaminituu aniyaayiuh uhtaawiih waash wiiyi mikw paayikusiu aa ukusiitutaakut Chishaaminituu, saakischinaashkaakuu maak miyuhkaachaawiniyiu kiyaah taapwaawiniyiu.
15 John kuiskw chii wiihtim awaayiuh iyaawiyich. Aayiuh maak chii wiihtim aa chiswaawaat aah iyit, “chichii chichinaawaachaa kaah aayimuumik awaan kaa iyaan, ‘chiki paachi tikushin aashkw awaan atitiu aa chistaayihtaakusit ishpish wiiyi niiyi. Aaukw uu kaah aayimuumik an kaah taat aamwaayaa uhchi pimaatisiiyaan niiyi.’ ”
16 Aniyaayiu aa saakischinaashkaakut miyuhkaachaawiniyiu misiwaa aa tishiyihkw naashtaapwaah chii chishaawaatutaakuniu, naanitimaa chii miyikuniu miyuhkaachaawiniyiu.
17 Chishaaminituu chii aapichihaau aniyaayiuh Moses chaa chii wiihtimuwaayich iiyiyiu uwiishuwaawin, Jesus Christ maak kaa waapihtiwaayich utaapwaausiwin kiyaah umiyuhkaachaawin.
18 Nimui nihtaa awaan uhchi waapimaau Chishaaminituu, mikw aniyaayiuh upaayikusaan utaahiich kaatiyaat chii tutaakuu chaa chii chischaayimaakinuut.
Kaa kuukwaachimaakinuut John siikihaahtaachaasiu awaan wiiyi iyaaut
Matthew 3:1-12; Mark 1:1-8; Luke 3:1-18
19 Jew tipaayihchichaasiwich, Jerusalemihch aa uhchiiyich chii iitishihwaauch ayimihaauchimaau kiyaah kaa ayimihaawaatisiiyich Levi iiyiyiu, John aah taayich chaa chii nituukuukwaachimaayich awaan wiiyi iyaawiyich.
20 John maak kuiskw chii wiihtimuwaau aah iitaat, “nimiyaau niiyi Christ.”
21 Aakw kaa kukwaachimikut aah iitikut, “awaan maak chiiyi? Elijah aa?” Kaah iitaat, “nimaa. Nimuyaau niiyi Elijah.” Miin maak kaa kukwaachimikut, “aau aa chiiyi an uchischiwaahiichaasiu chaa paachi iitishuhamaakuwaachipinaa?” Kaah iitaat, “nimaa.”
22 Aakw miin kaah iitaach, “paachi wiihtimuunaan awaan chiiyi, chaa chii wiihtimaauchihch anichii kaa paachi iitishuhuyimihch waah chischaayimisch awaan chiiyi iyaawiyin.”
23 Aakw kaah iitaat, “aaukw an niiyi kaa chii tipaachimit aniyaa uchischiwaahiichaasiu Isaiah. Uyaayiu chii iyiu,
Chiki tikushin awaan anitaah pikutiskimikaahch aa uhtuhtaat uyaayiu aa iishi taapwaat, iyaaskiwiihkimwaahkw tipaayihchichaasiu umaaskinaam anitih chaa pimuhtaat, kuiskumuhtaawaahkw.”
24 Anichii maak kaa paachi iitishihwaakiniwich pisch waash anichii Phariseech chii kukwaachimaauch John,
25 “Chaakwaan maak waahchi siikihaahtaachaayin aakaa iyaaunaa Christ kiyaah maak Elijah kiyaah maak an chischiwaahiichaasiu?”
26 Aakw John kaah iitaat, “nisiikihaahtaachaan nipii aah aapichihtaayaan, taau maak awaan awiichikaapustaataakw mikw aahaakaa chischaayimaakw.
27 Aaukw maak uu chaa tikushihk wiiyi austaa chistaayihtaakusiu ishpish niiyi, nimui waawaach nitaapichaayihtaakusin chaa chii aapihkunimuch umischisiniyaapiih.”
28 Anitaah maak uu kaa ayihtinaanuuch waapinuutaahch iitaahchaakaam an Jordan siipiihch, chii tikun ihtaawin Bethany kaa ishinihkaataach, aakutaah kaa siikihaahtaachaat John.
Jesus aaukw Chishaaminituu umaanishchaanishiim
29 Miin maak aniyaayiu wiyaapiniiyich John chii waapimaau Jesus aa paachi naatikut, aakw iyaat, “kinuwaapimaahkw maah, aaukw uyaah Chishaaminituu umaanishchaanishimish kaa paachi iitishihwaat anitih chaa chii uhchi waapaayihtimuwaakiniwiyich awaayiuh umichihtwaawiniwaayiuh utih misihtaaskimihch.
30 Aaukw maak uu kaah aayimuutimaatikuch kaah iitikuch, ‘chiki tikushin naapaau, wiiyi maak atitiu kiti chistaayihtaakusiu ishpish niiyi waash aashkw nimui nuuhchi pimaatisiiwaan shaash chiih taau wiiyi.’
31 Nimi nuuhchi chischaayimaau wiiyi iyaaut, aaukw waahchi chii tikushiniyaan chaa chii siikihaahtaachaayaan nipiihch chaa chii uhchi chihkaayaapimikut Israel iiyiyiu.”
32 John maak chii wiihtim taan kaa iishi waapihtihk aah iyit, “nichiiwaapimaau kaa piyaahchisiit ahchaahkw aamimiwit chihchichiishikuhch aa uhchi paachi yaashiitaakut, aakw kaa twaahutaakut, aakutih kaah taayich.
33 Nimui maak ashkw nuuhchi chii chischaayimaau chihchiwaa, mikw maak Chishaaminituu an kaa paachi iitishuhut chaa chii siikihaahtaachaauch nipiihch, nichiih iitikw, ‘chiki waapimaau naapaau kaa piyaahchisiit ahchaahkw aa paachi yaashiititaakut anitih aah taat chaa taayich, aaukw an chaa siikihaahtaachaat kaa piyaahchisiiyichh ahchaahkwh.’
34 Nichiiwaapihtaan uu kaa iispiyich kiyaah chiwiihtimaatinaawaau aah aawiyich aniyaayiuh Chishaaminituu ukusish.”
Aniyaayiuh chischinihamuwaakin niishtim kaa uwaayaapimaat Jesus
35 Miin maak aniyaayiu kaashikaayich miin chiih taau anitih John kiyaah aniyaayiuh niishu uchischinihamuwaakinh.
36 Iishpih maak wiyaapimaat Jesus aa pimuhtaayich anitih, chiih iitaau, “waapimaahkw maah, maau uyaayiuh maak Chishaaminituu umaanishchaanishiim.”
37 Aniyaayiuh maak niishu uchischinihamuwaakinh piyaahtaakut uyaayiu aah iyit, chii aatiwiichaawaauch Jesus.
38 Jesus maak chii chipihchikaapu, kaah aapisaapit kaa waapimaat aniyaayiuh kaa nuushuushkaakut, aakw kaah iitaat, “chaakwaan niyaanitiwaapihtimaakw?” Aakw kaah iitaach, “chiskutimaachaasiu taanitaah waahchiiyin?”
39 Chiih iitaau maak, “aashtimukw paachi waapihtimukw.” Aakw kaa wiichaawaach, kaa waapihtimwaach anitih aa wiichiyich. Wiyaash naau chii iispiyiyichaa aa ishkwaapihtaachiishiikaayich. Aakutaah maak kaa taawaach anitih aah taayich iskin taakushuu.
40 Anichii maak niishu chischinihamuwaakin kaah aatiwichaawaach Jesus, paayikw maak an Andrew kaa ishinihkaasut aniyaayiuh Simon Peter wiichishaan.
41 Andrew maak tiiwaahch chii aati naanituwaayimaau aniyaayiuh wiichishaan Simon, aakw kaah iitaat, “nichii miskiwaanaan waash Messiah.” An maak Messiah aah iinaanuuch Christ ishichiishwaaniu Jew ayimuwinihch.
42 Aakw kaa iituhtihaat Simon anitaah Jesus aah taayich. Jesus maak chii kiniwaapimaau aniyaayiuh Simon aakw kaah iitaat, “chiiyi Simon, John ukusish, Cephas chiki ishinihkaasun.” Cephas aa ischiiswaamikihch Peter.
Jesus kaa nituumaat Philip kiyaah Nathanael
43 Miin aniyaayiu aati chiishiikaayich Jesus chii iitaayihtim Galilee aschiihch chaa chii iituhtaat. Aakutaah anitaah kaa miskiwaat Philip, aakw kaah iitaat, “paachi pipaawiichaau.”
44 Philip maak anitaah Bethsaidaahch chii uhchiyiu aniyaayiuh Andrew kiyaah Peter utihtaawiniwaayiu.
45 Philip maak chii naanitiwaapimaau Nathanael, aakw kaah iitaat iishpih kaa miskiwaat, “nichii miskiwaanaan aniyaayiuh Moses kaah aayimuumaat anitaah wiishuwaawinihch, kiyaah anichii uchischiwaahiichaasuch kaah aayimuumaach. Aaukw uu Jesus, Joseph ukusish, anitaah Nazareth kaa uhchiit.”
46 Aakw Nathanael kaah iitaat, “taapwaah kaakiyaah kiti chii uhchiyiu awaan aa chistaayihtaakusit anitaah Nazareth.” Aakw Philip kaah iitaat, “aashtim paachi waapim.”
47 Iishpih maak Jesus wiyaapimaat Nathanael aa paataashtimuhtaayich chiih iitaau, “aaukw uu chihchiwaa Israel iiyiyiu, aakaa naastiis piihchishkaakut kaachiishihiiwaawiniyiu.”
48 Nathanael maak chiih iitaau, “taanitaah waahchi chischaayimiyin?” Aakw Jesus kaah iitaat, “chichii waapimitin aa apiyin shiipaayaachihtikw misishuuminaahtikuhch aamwaayaa uhchi nitiwaapimisk Philip.”
49 Nathanael kaah iitaat, “chiskutimaachaasiu, aaukw chiiyi taapwaah Chishaaminituu ukusish, aaukw chiiyi chihchiuchimaau utih Israelihch.”
50 Aakw Jesus kaah iitaat, “chii taapwaahtaan aa an mikw aa chii wiihtimaataan aa chii waapiimitaan shiipaayaachihtikw misishuuminaahtikuhch? Aashkw chiki waapihtaan atitiu maamishkaach chaakwaanihii.”
51 Aakw miin kaah aati iyit, “naashch taapwaah chiwiihtimaatinaawaau, chiki waapihtaanaawaau chihchichiishikw aah aapihiipiyihch, aakw maak Chishaaminituu utaanchinimh aa uhpipiyiyich kiyaah aa paachi yaashiistiwaach iiyiyiukusisaan.”