aboñer O aamme an o Aláemit alobe gurim min mb’ábahen go alob ésuh yay. Ni gufaranse guoge prophète.

Aburaham O aamme ᵽaaya afan ala bugal Israel. Aláemit aĉobol bi ejogor ni o gajogorol gátiar (Fíĉilum 17 ; 22.15-18). Gáinen Aburaham gájalo mee go guĉile min Ebibul yay eunenol ti bigitenum baa gáinen bi ni ejangaraay ᵽe.

Añol Arafuhow Dáru gajow go aboñer ahu Dañel asene Aᵽagena ahu (Dañel 7.13). Yésu nah’aŋaŋar gajow gaugu bi elob mola aĉila faŋaol. Gajow gaugu gugitengiten búoh Yésu alet Aláemit bare, bare ᵽoᵽ an nam.

Aᵽárisie Juluj Eᵽárisie.

aᵽotora Juluj uᵽotora.

Asúif Juluj Esúif.

bíbiñu Dáru jununuhen jaju jo subugum jo nihi sisen me bíñu.

bífig Dáru bununuh banogore búkaju. Gúfig go guomme subugum bo, gunogor ti sifi. Ebibul yay neh’eŋaŋar bugal Israel eligor ni bífig.

ble Dáru mitiñ mice maile ti emano.

búhut Ni Esúif yay áᵽur ánoan no nabugi ak’abaj gunah futoh ni gúfaji, ᵽan áruri búhut ; érur búhut yauyu kakan fúffasum fo Aláemit akiĉe n’enilol (Fíĉilum 17.10-14).

buoliv Dáru bununuh bom bo nihi bubuh mitiñ míni ti gueĉ, mo nihi guŋar n’gucokor édunen.

ĉerubim Dáru búuwenum bajahaliene babaje ubes, ban ni babaj buul ti bal an ni guot gubbagir. Búuwenum baubu nihi bukakan burok bi n’Aláemit.

David O aamme ávi Israel áutten. Ni Bahiĉer babu Bufan babu, Aláemit naᵽiene nalob aah Aᵽagena ahu ni gabugor David naate áᵽurul (2 Samiel 7.12-14 ; Esai 11.1 ; 55.3).

ekurua Kakan ubabar úuba wo gulajore guilen ; naanaŋ, bugaa Rom ni ekurua nihi gubbaŋ bugan bugagu bugo gumaŋ me jamuh. Ñace ᵽoᵽ ni Firim Aláemit, ekurua bigitenum bom baa sílam.

Eᵽárisie No Yésu ajoulo me ni mof, baje gammeŋe n’Esúif yay gajoge liŋ gúboñ Aláemit ; gajail Eᵽárisie. Gumaŋe enaben go joon, bare nihi guᵽinor búoh bajogeril bulago babu bufaŋe baa bugagu ᵽe. Yo eĉil me Yésu nah’alobil táñi mala batennoro baubu mata wo gulobe me let wo gukane me (Mácie 23).

Esáduke Gayoŋ gom gaam n’Esúif yay gajoge liŋ gúboñ Aláemit, bare ni’guoh bajut eilo ni gaĉet me.

Esúif Dáru gajow gagu gaa bugal Israel gaŋar me bulago babu bo gúboñ Móis gulob me mala bo.

fal fáᵽurut Funogonogor ti busun báamah baa mal. Ni gufaranse guoge lac.

fíiyay, fíiyay Esúif yay Funah fom faa gáelo fal Esúif yay (Fíĉilum 2.3 ; Gaᵽagen 20.8-11). Funah faufu an nd’arok. Fíiyay bi ni fupafo, baje gunah futoh ni gúuba.

Fúggut Aláemit No, bugal Israel sipil ni ubaŋ nihi guŋar min gucokor gúggut gagu golil bi eĉin dó. Mbi gúni n’etos, n’gúju gubboñ go gújaenum. N’gucokor may fúggut fice fáamumma dó Aláemit nah’aemor me ni Móis (Gaᵽagen 29.42-46 ; 33.7-11).

gávi-Aláemit Yaŋ yom yámah yal Aláemit yaam Yerusalem dó ni’gukan me Aláemit bíteŋen. Ni yaŋ yauyu, baj ró Tiñ talu Táñai me, dó uteŋenaaw gunogene me funah-ó-funah ; baj ró ᵽoᵽ Tiñ talu tafaŋ me n’Tíñaie, dó afan uteŋenaaw anogene me ñanur émit-émit.

gúfig Juluj bífig.

gúhiboriay Dáru gúlobum gom gaa bugaa Híbori.

guil gagu gal Israel Sakob nabajene úᵽur guñen ni gúuba. Anóan ni bugo nakakan ᵽaaya afan ala fiil, ban gabugoril bugo guomme ésuh yay yal Israel.

Híbori Dáru gagu gajow gaa bugal Israel. Ni gufaranse guoge Hébreux.

hosanna Yoemme uᵽagenóli ni gúhiboriay. Baŋaner baubu biᵽie m’bubaj n’úfoñ waw wal Esúif yay.

Isak O aamme añol Aburaham. Aláemit naᵽiene nalob Aburaham búoh ᵽan asenol gabugor ; no Aburaham abuh me Isak, toker o babajer símit ekeme.

Israel Dáru gajow gagu go Aláemit akan me Sakob no nataj me n’amalaka ahu aban (Fíĉilum 32.23-33). Gajow gaugu guŋar me gukan gabugorol, yaĉil me nihi guvogil ésuh yay yal Israel.

Kirista O aamme Aᵽagena ahu o bugal Israel guomme n’enah. O aamme Yésu.

mana Dáru mitiñay mátuene mo Aláemit nah’asen me bugal Israel gutiñ no guomen me ni gafit gagu (Gaᵽagen 16.11-18).

Móis Móis an ámah om ala Aláemit. Aĉila áᵽunnulo me bugal Israel ni fimigelet fafu baubu ni mof mamu maa Esíp (Gaᵽagen 3.9-10 ; 14). Aĉila ᵽoᵽ Aláemit aĉob me bi esenol gúboñ gagu gaa gajogorol go najogor me ni bugal Israel, baubu ni firijaŋ fafu faa Sinai (Gaᵽagen 19.3-6 ; 20.1-17).

Paak Dáru gaggan gagu go bugal Israel ni’gukan me bi eosen gaᵽah gagu go Aláemit aᵽagen me sipail ni guñen bugal Esíp (Gaᵽagen 12). Gaggan gaugu gúbuliore ni go nuvogale me jama Paak, no Yésu ailo me ni gaĉet me.

Pantokot Dáru gaggan gagu go bugal Israel ni’gukan me gúvagen babaer. Gaggan gaugu gúbuliore ni gagu go nuvogale me jama Pantokot, no Aláemit aboñulo me ejangaraay gútinar Biinum Banabe (Mukanay 2).

Sakob O aamme añol Isak, o Aburaham abuh me ; gajaol gagu go guomme Israel. Nababaj uñil gono guñen ni gúuba, gaamme ñer sipay gufan bugaa guil gagu gal Israel. Ni unnay waw waa Sósue guil gaugu gugabor me mofil mo guvoge me may Israel, fiil fánofan ni fubaj ró ettam fo.

Sesar O aamen me ávi ahu ámah ahu ala Rom.

Sioŋ Dáru gajow gagu gaa firijaŋ fafu dó Yérusalem eteᵽi me.

uᵽotora Ni lewansil yay, uᵽotoraaw bugo guomme ulagoraaw gaamme guñen ni gúuba gafaŋ me n’gulofe Yésu. Pool naaseh aĉila may aᵽotora nam mala min ajuh me Yésu táh búsol eilo Yésu ni gaĉet me (1 Korent 9.1).

yaŋ yaa galaw Dáru yaŋ yanabe dó Esúif yay ni’gunamo me min guligen Bahiĉer Aláemit ni may gulaw. Ni gufaranse guoge synagogue. Esúh yánoyan ebaje saŋ yo saa galaw.