Firim fafu fal Aláemit fo guvoge me may "Ebibul". Ebibul yauyu ebaje uŋas úuba. Gaŋas yo gátiar go guvoge me "Bahiĉer babu Bufan babu", gáutten gagu n’guvoh go "Bahiĉer babu Buvugul babu".

Ni Bahiĉer babu Bufan babu gulobdólob bu Aláemit aju me ᵽio bo mof mamu ᵽoomo, ni ᵽoᵽ bu náuwen me arafuhow, mbiban arafuhow ahumu amaŋut áttun firimol. Gáttunut gaugu go arafuhow áttunut mee Aláemit go guĉile min eĉet ebaj ni mof. Gulobolaldólob ᵽoᵽ bu Aláemit aᵽinor me eᵽagen arafuhow jambi allim bándor. Naĉob ánaine ace gajaol Aburaham ban najoh búoh aĉila Aburaham ahumu o ᵽan áni me ᵽaaya ala bugan bugaa súsuh sammeŋe, ban ni aĉila ᵽoᵽ Aláemit ᵽan ájoum me bi ésonien bugan bugagu ᵽe bugaa mof. Gabulaken gagu gal Aburaham go Aláemit aĉob me gúni buganol, go guomme "Esúif yay" ; gajail gagu go guomme "Israel".

Ᵽio bo, Aláemit navoh ánaine ace gajaol Móis bi ni firijaŋ fice fo guvoge me Sinai ak’asennol Firimol bi egiten fo bugal Israel tima n’guffas wáari me ni waarat me, wo aĉila Aláemit amaŋ me ni wo namaŋut me. Gurim gaugu go guvoge me "gúboñ gagu gaa Móis", mala min Móis ayabulo go me n’Aláemit. Gugitengiten ᵽoᵽ bugal Israel úteŋen way guotene gukan min mb’Aláemit aboketil utilil. Kábiriŋ no, Aláemit bajebaj ñice bugan bugo nah’aĉob náh’álobum n’utumil n’ésuh yay. Bugan bugaubugi bugo guvoge me "uboñer". (Ni gufaranse guvogil prophètes.) Nálobul n’utum uboñer waw ubugu aah ésuh yay ᵽan abil áboñul an ajae me eᵽagen mof mamu ᵽe ni búkanum baa gájiol. To nápegul me bugan bugagu bulago min mbi gúju gúni bugan gaĉole bújoŋorol.

Ni Bahiĉer babu Buvugul babu baamme gaŋas gáutten gal Ebibul yay, gumundummundum gulob dó mala buroŋ babu baa Yésu Kirista ; sílebur sausu saamme sibbagir, so suomme siewansil sasu. Yánoyan ni so, ahiĉa ahu ala yo baje waf wábuliore waa buroŋ Yésu wo natajen dó walet ni sipaso.

Elébur yay etogen yay gajow yo Mukanay mamu mal Uᵽotoraaw ; elolob mala ulagora Yésu, bu nihi gujow me súsuh sammeŋe bi evare firim fafu fo Yésu alobil me, ban ni gúbatise bugan gammeŋe. Yo eomme fíĉit fafu faa Jangu yay.

Ᵽúrto élebur yauyu yaa Mukanay, baje siletar sammeŋe so guce ni uᵽotoraaw ubugi guhiĉe bi eramben bugan bugagu gáinen me ni Yésu Kirista. Siletar sausu sinafanafa ajangara ánoan min mb’áju aroŋ nabor ni wo Yésu Kirista amaŋ me, ban natey waf waw waa mof me wájahorut mee ni buroŋ baubu.

Elébur yay ésola yal Ebibul yay yo eomme Bagitener babu bo Aláemit asen me Saaŋ ni bujugum bámah. Elolob mala waf waw úsola wajae me ebaj ni mof, mala ᵽoᵽ eteb ebeŋ yay yaa Yésu ni Seytane, o ni buganol ró.

Gurim gagu gaamme n’élebur yauye gurim gom gal Aláemit. Gúbahenibahen ni gubanjalay min mbi ebanjal yay ni bugagu gaun me gubanjalay gúju guun Aláemit alob ni bugo ŋanno ca. Gúbahenibahen may bi eramben bugan bugagu gamaŋ me effas joon Aláemit, gamaŋ me effas maagen mamu máju me muᵽagenil min gubaj buroŋ bábaerit ni búkanum baa gáinenil ni Yésu Kirista. Gúbahenibahen ᵽoᵽ bi ni bugan bugagu gamaŋ me guliŋen gáinen gagu golil ni Yésu Kirista, fáŋum bugan bugagu gaunut me gúlulumay.

Bugan bugo guĉobe gunave min gúbahenul go ni Bahiĉer babu bítiar babu baa Firim fafu fal Aláemit, bahiĉi me ni gugerekay, gukan ni gújoloay gaa banjal go ánoan ᵽe aagei abanjal ájue aun ŋanno ca. Ni bugan bugaubugi gaĉobi mee, baje ejangara ékatolik ni ejangara epurotestaŋ.

Yo eĉil me burok babu baĉil me min Firim faufe fal Aláemit fubaj ni gubanjalay let burok bal an anur, let ᵽoᵽ burok baa jangu yanur, bare burok bom baa bugan gammeŋe, mata « gañen ganur gújuut gufar busana ».