Babilọn ama ile ya înan̄a irọn̄
18
Mgbọ eya orakabe,
mmumun̄ ofifi ogwu osat Awaji ge onan̄abe me emen inyọn̄ inu.
Ogwu osat ya îkaan̄ unye enenen,
utoon̄ òrirọ ònan̄a me lek kan̄ ototoon̄ ikana otutuuk linyọn̄.
2 Ikekitaan̄ ukpo ikitumu ibe,
“Îrọn̄!
Îrọn̄!
Babilọn ama ile ya îrọn̄!
Ọmọ îkana ere ebi osat yọk,
mè ijo erumun̄ geelek,
mè ebi kè ofut geelek ikatanage me isi Awaji,
mè ofut geelek òkichaka mbuban ekiluk.
3 Mije,
otutuuk ebi linyọn̄ mîgọọk ọmọ irọ ugan-nwa mè òje oyet,
isasa ema kubọk miin̄.
Otutuuk ebi ubọọn̄ linyọn̄ mîrọ ugan-nwa melek kan̄ iso.
Ebi ìkinyam ewe me linyọn̄ keyi
mîbọọn̄ ubọọn̄ inan̄a me lek ubene
ugwem ogwu enenwaan̄ ya okiluk.”
4 Nneninọ ofifi ida okitaan̄ inan̄a me emen inyọn̄ itumu ibe,
“Ebi n̄a,
ìnan̄a ìsibi me emen kan̄!
Ikagọọk ọmọ ìtap ubọk me emen ijo inu kan̄,
inyi enyi ekagọọk ọmọ ìbọkọ osusut kan̄ geege.
5 Mije ijo kan̄ îwa enenen,
mè itoon̄ ibene mege isi ire emen inyọn̄.
Awaji ìkawuuk inu ikpak kan̄!
6 Enyi ìrọ ọmọ me lek ubọk ọmọ orọbe enyi.
Otutuuk ijo inu îrọbe enyi,
ìkpe ọmọ useen̄ mgbọ iba.
Ujat inu ya îtọkọbe ijot ekpen̄ inyi ene,
ìtọkọ eyi òjajat igak ikeya mgbọ iba ìnyi ọmọ inwọ.
7 Ìnyi ọmọ ujaralek mè ufieejit ògbegbe
ìgọọk me ìkeke umin mè ubene
ugwem eyi ọmọ onyibe lek kan̄.
Mije,
ìkigugo lek me emen ejit kan̄ ibe,
‘Emi ǹkisiki ikweek irek kubọk ubọọn̄ enenwaan̄,
ǹkare nwakpa,
m̀kpakup me ufieejit kubọk ge.’
8 Eya orọ,
otutuuk uyọrọlek kan̄ ìborọn̄
ikeme ọmọ me egwe ge gaalek.
Mkpa,
mè ufieejit,
mè uga akan̄,
môkeme ọmọ.
Ukan̄ môtaka ọmọ,
mije,
Okumugwem Awaji
ogwu òkisibi ọmọ oyerebet me ibot
ìre ogwu òmimin enenen.
9 “Ebi ubọọn̄ linyọn̄ ebi ìrọrọ ugan-nwa melek kan̄,
mè irie utop otu melek kan̄,
mêto ito,
mè ifieek ejit inyi ọmọ mgbọ ema mêmun̄be oduku ònan̄a me lek ukan̄ òkitaka ọmọ okibumu ifo inyọn̄.
10 Ujaralek ọmọ obokibọkọ me emen ukan̄ ya môtet ema ukpook enenen.
Mije keya,
ema mêkeke me ujọn̄ọ ere,
mè ikito ito ibe,
“ ‘Jei,
njijin!
Owu okaan̄ njijin onọ!
Jei,
Babilọn,
nga ama ile!
Jei,
Babilọn,
ama unye!
Mbubak mgbọ ge gaalek uyọrọlek onube ke owu ojijaka,
mè ichep isan̄a kpai!’
11 “Ebi ìkinyam uga ewe me linyọn̄ mêto ito,
mè ifieek ejit enenen inyi ọmọ,
mije,
kpunu ogwu òboyaka ikilep ogbogbo inu mbit kiban̄ ofifi.
12 Kpunu ogwu òboyaka ikilep inu mbit echi alata araran̄,
mè echi alata okuket,
mè ewuuk unye otu ewe,
echi ònan̄a me ijọn̄,
mè echi ònan̄a me okwaan̄,
mè ekwut irio irio,
mè echi òrọrọt mè ikimumọọn̄,
mè echi òkup eje eje,
mè esese lek uti,
mè owuwa inu esabe oduuk eniin̄ irom,
mè unye ewe uwot,
mè ekwe,
mè okwukwut,
mè ewuuk urọt lek.
13 Kpunu ogwu òboyaka ikilep si inu mbit kiban̄,
kubọk inu òkirọ inorie itop eyi ekigwen sinamọn,
mè inu ekisa irọ aran̄ utop olu,
mè nsensi,
mè mâa,
mè farankinsens,
mè miin̄,
mè aran̄ olifu,
mè akpa ekọkọk,
mè echi ibot ibot,
mè eriembuuk,
mè arọọn̄,
mè inyinya,
mè uji akọn̄ inyinya okitaba ije,
mè akpalek ebilene,
mè ibot ejit ebilene si.
14 “Ebi mbit cha mêkitumu ibe,
‘Jei,
otutuuk ata inu cha òkilọk owu ikakaan̄ îlibi itele owu.
Otutuuk inu ubọọn̄ kwun̄,
mè òrirọ kwun̄ îniniin̄ ichep,
owu òkpoyaka ikọt ikaan̄ ema ofifi.’
15 Ebi ewe ìnyanyam inu chi inyi ọmọ,
mè ibọọn̄ ubọọn̄ inan̄a me lek kan̄ kpebekọt ije igbet ọmọ ere me lek.
Ebekeke me ujọn̄ọ ere,
mije,
ujaralek kan̄ môtet ema ukpook.
Ema mêkeke me ujọn̄ọ ere ikito ito,
mè ikifieek ejit ibe,
16 “ ‘Jei,
njijin!
Owu okaan̄ njijin onọ!
Jei Babilọn,
nga ama ile!
Owu ogwu òkitap ata ofọnti okuket,
mè ofọnti irio irio,
mè eyi eje eje,
mè ikinwunwan̄ alata araran̄,
mè ewuuk unye otu ewe eyi
ijọn̄ mè eyi okwaan̄,
echi òkekimumen,
ichit lek.
17 Me mbubak mgbọ ge gaalek
ke otutuuk ikpele inu ubọọn̄ kwun̄ ojijaka isan̄a kpai.’
“Ebi ìkikọp uji ile,
mè ebi geelek ìkisi ikwaan̄ me emen,
mè ebi ije ìkup me emen uji ile,
ema otutuuk ene mêkeke me ujọn̄ọ ere.
18 Mgbọ ema mêmun̄be oduku ònan̄a me lek ukan̄ òkitaka ama ya okibumu,
ema mêtaan̄ ukpo ibe,
‘Jei,
ukpook!
Ìre kpasi ofifi ama ile obet lek nga ama ile keyi?’
19 Ema mêgwọ mfuun̄ igwook me ibot kiban̄ mije ufieejit,
mè ikifieek ejit,
mè ikito ito ibe,
“ ‘Jei,
njijin!
Owu okaan̄ njijin!
Jei,
nga ama ile,
ere otutuuk uji ile òkikọp me emen awaji
okinu inibọọn̄ ubọọn̄ inan̄a me lek ubọọn̄ kwun̄.
Me mbubak mgbọ ge gaalek,
otutuuk inu ubọọn̄ kwun̄ cha îta isan̄a kpai!
20 Enyi ebi ìkup me emen inyọn̄,
ìbele ejit,
mije,
uga ama ya înan̄a irọn̄!
Enyi bọn Awaji,
mè ebi otuchieen̄,
mè ebi nriran,
ìbele ejit!
Awaji îtip ọmọ oyerebet
mije inu îrọbe enyi.’ ”
21 Eya iraraka,
ikpele ogwu osat ge obeben mbubak ewuuk ge òmimin ikup kubọk ikpele ewuuk ikọk-akpa itọp ito me okwaan̄ ke gbidìi,
mè ibe,
“Ikeyi ke mêsa me unye iben owu,
Babilọn,
nga ama ile ya,
itọp itap me emen okwaan̄,
kpebeyaka ikpọk imun̄ ọmọ ofifi.
22 Kpebeyaka ikinọ ida ebi ìkikọt okwa,
mè ida uneen̄,
mè òja,
mè otita okitaan̄ me emen kwun̄ ofifi.
Ebi usọ geege kpebeyaka ikup me emen kwun̄ ofifi.
Ewuuk ikọk-akpa ìkpoyaka isan̄a amọn me emen kwun̄ ofifi.
23 Utoon̄ mkpukan̄ ìkpoyaka itoon̄ me emen kwun̄ ofifi.
Ijọk ido-nwa,
mè ida ogwu òdo nwa,
mè ida aya nwa òbat olom ìkpoyaka itaan̄ me emen kwun̄ ofifi.
Me adasi mgbọ,
ebi mbit ìluk me emen
kwun̄ ere ebi ilile me linyọn̄.
Ire,
owu osa iwot kwun̄ ileke
otutuuk ido geelek ifiin̄ isan̄a.”
24 Babilọn îbọkọ osusut ògbegbe ọmọ,
mije,
îre me emen kan̄ ke emun̄ eje otutuuk ebi nriran,
mè eje bọn Awaji,
emen kan̄ si ke emun̄ eje otutuuk ebi ekpan̄be me linyọn̄ keyi.