Ebi osat jaaba mîsa òta uyọrọlek jaaba inu
15
Mgbọ eya orakabe,
nnenimun̄ ofifi ikpele inu ge òkup uyeke uyeke me emen inyọn̄.
Inu ya ìre ebi osat Awaji jaaba melek òta uyọrọlek jaaba.
Uyọrọlek cha ìre echi òta,
mije,
ema isiraka isan̄a,
unaan̄-ejit Awaji îta.
2 Nnenimun̄ inu ge òkup kubọk okwaan̄.
Inu òkup kubọk mun̄ me okwaan̄ ya ìkitoon̄ kubọk umọọn̄,
mè ikup kubọk esa ukan̄ igwa.
Ebi ìtitim ikpan̄ anam ukpook ya,
mè inu ebotbe òbet lek kan̄,
mè itim si ikpan̄ iman̄ òriọọn̄ eyi erieen̄ kan̄ ya,
ekekeke me agba okwaan̄ ya,
mè ikaan̄ uneen̄ Awaji onyibe ema me ubọk,
3 mè ikikọt ojelek okwa Mosis ogwu ikwaan̄ Awaji ojeen̄be me ukot ikaan̄,
òrere si okwa ekisa itọn̄ Gwun̄ Arọọn̄ Awaji,
ibe,
“Okumugwem Awaji Ogwu Òkaan̄ Unye Geelek,
ubọk ikwaan̄ kwun̄ îmin enenen,
mè ikaan̄ ukpook.
Oniin̄ kwun̄ ìre oniin̄ eyi unen mè atikọ.
Owu ore Ogwu Ubọọn̄ me ukot geelek.
4 Okumugwem,
ìre ekene ore ogwu
kpotet ukpook me lek kwun̄?
Ìre ekene ore ogwu kponyibe owu umin?
Mije,
owu gaalek okup me mbuban.
Otutuuk ido geelek me linyọn̄ mênu initọbọ ebum me isi kwun̄,
mije otutuuk ene mîmun̄ ubọk ikwaan̄ ata irọrọ kwun̄ geelek.”
5 Mgbọ eya orakabe,
nnenikpọ,
mè imun̄ echilibe Ere Òkup Mbuban Ichit ibook me emen Uwu Mbuban òkup me emen inyọn̄.
6 Ebi osat jaaba cha ìsasa uyọrọlek jaaba cha inu enanan̄a me emen Uwu Mbuban ya isibi.
Ema otutuuk etap ofọnti okuket òtatana jai,
mè ikitoon̄,
mè isa fanti alata araran̄ ibọp ikana me otu ejit.
7 Ge me lek inu ini òkup me ugwem cha oneninyi ebi osat jaaba cha okwa alata araran̄ jaaba echi unaan̄-ejit Awaji ogwu òkup me ugwem mgbọ geelek mgbọ geelek ojotbe me emen.
8 Oduku ònan̄a me ujamgbugbo mè unye eyi Awaji ojojot emen Uwu Mbuban ya.
Kpunu ene geege òkọkọt inin̄ emen Uwu Mbuban ya mege ire mgbọ uyọrọlek jaaba cha echi ebi osat jaaba cha esabe inu orakabe.