Gwun̄ Arọọn̄ ya îkama adasi irek agba gweregwen
6
Nnenikikpọ,
mè imun̄ mgbọ Gwun̄ Arọọn̄ ya okamabe adasi irek me lek irek agba jaaba cha esabe igọm ikpa ya ichit.
Mgbọ îkamabe agba ya,
nnọnọ ubọk inu ge me lek inu ini cha òkup me ugwem osookbe ida kubọk isinyọn̄ itumu ibe,
“Na!”
2 Nraraan̄ chieen̄,
mè imun̄ inyinya okuket ge okinu.
Ogwu òkweek me inyọn̄ inyinya ya îkaan̄ ogbaan̄ me ubọk.
Enenikwuun̄ ọmọ okpibot ubọọn̄.
Ọmọ olilibi me inyọn̄ inyinya kan̄ inan̄a kubọk ogwu òtitim ikpan̄ me akọn̄,
mè iben me ejit ikpọkpọ ikitim si ikpan̄ ifo isi.
3 Gwun̄ Arọọn̄ ya onenikama òso irek agba iba.
Mgbọ îkamabe,
nnọnọ inu òkup me ugwem eyi òso iba otumube ibe,
“Na!”
4 Ofifi inyinya onanan̄a isibi inu,
mè inin̄ ikeya ikup araran̄ kubọk alọm ukan̄.
Eneninyi ogwu òkup me inyọn̄ kan̄ unye ibe isan̄a esuuk isan̄a me linyọn̄,
inyi ebi ene ebene ekekpan̄ lek kiban̄.
Mînyi si ogwu òkup me inyọn̄ inyinya araran̄ yi ikpele oge akọn̄ ge.
5 Gwun̄ Arọọn̄ ya onenikama òso irek agba ita.
Mgbọ îkamabe,
nnọnọ ida inu òkup me ugwem eyi òso ita otumube ibe,
“Na!”
Nraraan̄ chieen̄,
mè imun̄ inyinya ofifit ge osibibe inu.
Ogwu òkup me inyọn̄ kan̄ îkaan̄ okwukwut itọ-inu me ubọk.
6 Nneninọ inu ge òtaan̄ kubọk ida ene onan̄abe me etete inu ini cha òkup me ugwem ikitumu ibe,
“Ebi ene mêsa dinari ge ilep ewopa akpa wit ge gaalek,
mè isa si dinarib ge ilep ewop akpa balì ita gaalek.
Ire,
ikajijaka uko olifu mè uko gerep,
inyi aran̄ mè miin̄ ikanan.”
7 Gwun̄ Arọọn̄ ya onenikama òso irek agba ini.
Nnọnọ ida inu òkup me ugwem eyi òso ini okitumu ibe,
“Na!”
8 Nraraan̄ chieen̄,
mè imun̄ inyinya ge òkpọkpọ ikup joon̄ kubọk ene ogwu orukan̄ ofiakbe ifiin̄ enenen.
Ogwu òkup me inyọn̄ inyinya ya,
ekigwen Mkpa.
Ama Ekwukwu okekigọọk ọmọ me udun̄.
Eneninyi ema unye ibe esa oge akọn̄,
mè akan̄,
mè orukan̄,
mè ijo anam oron ekpan̄ ebilene,
irek ge me etete irek ini,
me otutuuk linyọn̄.
9 Gwun̄ Arọọn̄ ya onenikama òso irek agba go.
Mkpọkpọ me irak ntook òkup me ere ya,
mè imun̄ ibot ejit otutuuk ebi ekpan̄be mije ema ekitumu ikọ Awaji,
mè isa otutuuk ugwem kiban̄ ichieek inye,
mè ikiluk ugwem igọọk me lek.
10 Ema ekekitaan̄ ukpo itumu ibe,
“Ogwukaan̄-ene,
owu ogwu atikọ,
mè ogwu òkup me mbuban,
ìre mgbọ owa ke obosibi oyerebet me ibot ebi linyọn̄ cha,
mè isulu ema osusut me useen̄ ema ekpan̄be eji?
Mije,
òkikup ifiin̄.”
11 Eneninyi ema ofọnti okuket,
me ene me ene,
mè itumu inyi ema ibe enye lek ekup sọntiik mgbọ,
mege ire mgbọ ebi linyọn̄ mêkpan̄be si bọn Nte kiban̄ mè ebi melek kiban̄ ekigbaan̄ isi ikwaan̄ inyi Awaji iso otu ifuk,
kubọk ekpan̄be ema.
12 Nnenikikpọ mgbọ Gwun̄ Arọọn̄ ya okamabe òso irek agba gweregwen.
Mgbọ yaage,
ijọn̄ osisisik atalek unye unye,
ura ogwugwu ikom idun,
mè ifit ikup kpurọk kubọk ekwut ufieejit esabe inwọọn̄ ebot irom.
Onyan̄ ogwugwu ikom si,
mè inin̄ ikup eje eje.
13 Ntoronyan̄ òkup me isinyọn̄ ogegen̄ igwook me ijọn̄ kubọk mfut figi òto me ulọ mgbọ okigen̄ igwook me ijọn̄ mgbọ unye efet okiwut ibieen̄.
14 Isinyọn̄ okakat igba kubọk ufo,
mè ininiin̄ ichep.
Ogoon̄ geelek,
mè achọ geelek òkup me linyọn̄ yi,
ojijibi inan̄a me akpat.
15 Mije ukpook,
otutuuk ebi ubọọn̄ ìkup me linyọn̄,
mè ebi ibot mkpulu geelek,
mè ebi ibot akọn̄ geelek,
mè ebi ìbọbọọn̄ ubọọn̄,
mè ebi isi ile,
mè otutuuk ebi usun̄,
mè ebi kpere ebi usun̄,
elilibi isi ilet me emen ǹkororok mè irak ewuuk òkup me inyọn̄ ogoon̄,
16 mè ikitaan̄ ukpo itumu inyi ogoon̄ cha mè ewuuk cha ibe,
“Ìgbugbọ ìchit eji,
mè ìlet eji me chieen̄ ogwu òkweek irek me inyọn̄ ogboon̄ ubọọn̄ ya,
inyi unaan̄-ejit eyi Gwun̄ Arọọn̄ ya ikare eji lek!
17 Mije,
uga usen unaan̄-ejit kiban̄ îra ire.
Kpunu ene geege òbokọt ikeke ida!”