Etip Jisọs Karais olookbe ebi ntitiin̄ Awaji òkup me Sadis
3
Ogwu mmun̄be ya otutumu si inyi emi ibe,
“Ge ikpa jet ogwu osat Awaji ogwu òkikpulu ntitiin̄ Awaji òkup me Sadis ibe:
Eyi ìre ikọ ònan̄a me otu ogwu òkakaan̄ ekwukwu jaaba eyi Awaji,
mè ikaan̄ si ntoronyan̄ jaaba me ubọk.
Nriọọn̄ ubọk ikwaan̄ kinyi.
Ebi ene ekikeek ibe ke enyi me ugwem.
Ire,
kpunu ugwem geege me emen kinyi,
enyi ekwakwaan̄ isan̄a.
2 Ìnan̄a ìkeke me ilaak!
Ìtap unye me emen sọntiik ugwem ichechieek òsisik enyi me emen,
inyi ikakwu ìsan̄a isi ge.
Mije,
mmun̄ ibe ke ubọk ikwaan̄ kinyi ìkariọọn̄ ubọk ìjaan̄ ìsan̄a me isi Awaji n̄a.
3 Eya orọ,
ìkeek ijejeen̄ ya enyi enọbe,
mè ibọkọ itap.
Ìrọ otutuuk inu cha ejeen̄be enyi,
mè ìgwu ìkom ìsibi ìtele ijo kinyi.
Ire,
ire enyi kpegwu ikom,
mânu me lek kinyi kubọk ogwu inọ okinu uwu ene.
Enyi kpeberiọọn̄ ike mgbọ mbanu.
4 “Ire,
îkaan̄ ene inen mè inen ìkup me etete kinyi me Sadis ebi kpefiat-nu ofọnti kiban̄.
Ema mêtap ofọnti okuket me lek isa ikigọọk emi ije ikana,
mije,
ema mîgbe.
5 Ene geelek òtitim ikpan̄ môtap si ofọnti okuket,
kubọk ife chi ebetap.
M̀kpatutuku erieen̄ kiban̄ isan̄a me ikpa ugwem ya kubọk ge.
Mâtumu isibi me isi Nte n̄a mè isi ebi osat kan̄ ibe ke ema ìre ebi n̄a.
6 “Ogwu ikaan̄ utọn̄,
inọ inu Ekwukwu Awaji okitumu inyi ebi ntitiin̄ Awaji geelek.”
Etip Jisọs Karais olookbe ebi ntitiin̄ Awaji òkup me Filadefia
7 Ene ya otutumu si inyi emi ibe,
“Ge ikpa jet ogwu osat Awaji ogwu òkikpulu ntitiin̄ Awaji òkup me Filadefia ibe:
Eyi ìre ikọ ònan̄a me otu ogwu òkup me mbuban,
ogwu atikọ,
ogwu òkaan̄ atafi kè Debit me ubọk.
Inu geelek îchilibe,
kpunu ogwu òkikọt ichit.
Inu geelek îchitbe,
kpunu ogwu òkikọt ichili.
8 Nriọọn̄ ata ubọk ikwaan̄ kinyi.
Nriọọn̄ ibe ke enyi kpekaan̄ ikpele unye,
ire,
enyi mîkirọ ikọ n̄a.
Enyi kpejit emi.
Kpan̄asi ikeya,
enyi ekekeke inye melek n̄a.
Mije keya,
nchili isotu ibook inyi enyi,
eyi kpunu ene geege òbokọt ichit!
9 Ebi ntitiin̄ kè Setan cha,
ebi ataak cha ìkibe ke ema ìre ebi Ju,
me ere ema kpere ebi Ju geege,
mârọ inyi ema enetọbọ ekpe me ukot kinyi,
mè eriọọn̄ ibe ke emi mmun̄ enyi me chieen̄.
10 Mije enyi egban̄be utọn̄ me lek ikọ ntumube ibe enyi ekaan̄ ukarajit,
emi mâchit enyi itibi mgbọ ikpele ntọ-mkpọ eyi òbonu me otutuuk linyọn̄ initọ otutuuk ebilene ìluk me linyọn̄ keyi ikpọ,
inyi inu geege ikare enyi lek.
11 “Emi gwa ǹkinu ugwat ugwat.
Ìtet ugwem ichechieek enyi ekaan̄be ìnye,
inyi ene geege ikabọkọ okpibot ubọọn̄ kinyi ìsan̄a enyi me ubọk.
12 Ene geelek òtitim ikpan̄,
mâsa ene ya irọ atà me emen Uwu Mbuban eyi Awaji n̄a.
Ene ya ìkpoyaka inan̄a me Uwu Mbuban ya isibi.
Mâge erieen̄ Awaji n̄a me lek ene ya,
mè ige si erieen̄ ama Awaji n̄a,
òrere ayaya Jeruselem,
eyi òbonan̄a me ubọk Awaji n̄a me emen inyọn̄ isibi inu.
Mâge si ayaya erieen̄ n̄a me lek ene ya.
13 “Ogwu ikaan̄ utọn̄,
inọ ikọ Ekwukwu Awaji okitumu inyi ebi ntitiin̄ Awaji geelek.”
Etip Jisọs Karais olookbe ebi ntitiin̄ Awaji òkup me Lawodisia
14 Ene ya si onenitumu inyi emi ibe,
“Ge ikpa jet ogwu osat Awaji ogwu òkikpulu ntitiin̄ Awaji òkup me Lawodisia ibe:
Eyi ìre ikọ ònan̄a me otu ogwu erieen̄ kan̄ orebe ‘Ikup Ikeya,’
ogwu ata-ikọ ya ògbegbe ibe etoon̄ ejit me lek,
ogwu òkitumu atikọ,
ogwu otutuuk inu geelek Awaji orombe onan̄abe me ubọk kan̄.
15 Emi nriọọn̄ ubọk ikwaan̄ kinyi.
Enyi ekup kubọk mun̄ òwọwọ otu.
Yoyok,
ìkayok.
Tọtọọk,
ìkatọọk.
Mebe enyi eyoyok isi ge,
mè ìyaka ire etọtọọk isi ge,
kè obele emi ejit.
16 Eya orọ,
mije enyi ewọbe ikeyi,
kpeyok,
kpetọọk,
mâkwut enyi isibi me otu n̄a.
17 Enyi ekitumu ibe,
‘Emi mbọọn̄ ubọọn̄,
kpunu inu geege ònanan emi.
Eya orọ,
ǹkayaka ìweek inu geege.’
Ire,
enyi kperiọọn̄ ibe ke inu îyọt enyi me lek enenen;
ke enyi mîkaan̄ njijin.
Enyi kperiọọn̄ si ibe ke enyi ìre ebi ugbọọn̄,
mè ebi ǹnàan̄;
ke enyi ekije njak.
18 Ǹkiteme enyi nteme ibe,
ìna me ubọk n̄a ìnilep alata araran̄ esabe ukan̄ ikala inyi ikitoon̄,
inyi enyi ebọọn̄ ubọọn̄.
Ìnilep ofọnti okuket ìkitap,
inyi enyi esa echit njak kinyi,
ke mikaan̄ esip.
Ìnilep ugwun̄ chieen̄ ìsa ìtap me chieen̄ kinyi,
inyi enyi ekọt ekemọọn̄ inu.
19 “Ebi mmabe ke nkigana ikọ inyi,
mè ikisulu me njijan̄.
Eya orọ,
ìgbala chieen̄,
mè ìgwu ìkom ìtele ijo kinyi.
20 Kpọ,
emi ǹkeke me otu isotu,
mè ikitọbọ ubọk.
Ire ikaan̄ ogwu inọ ida n̄a,
mè igwuku isotu inyi emi,
mânin̄ emen uwu ene ya,
mè igọọk ene ya igbaan̄ irie inorie,
ọmọ si môgọgọọk emi igbaan̄ irie.
21 Ene geelek òtitim ikpan̄,
mânyi ene ya unye ibe igọọk emi isiki ikweek me inyọn̄ ogboon̄ ubọọn̄ n̄a,
kubọk emi ntimbe ikpan̄,
mè igọọk Nte n̄a isiki ikweek me inyọn̄ ogboon̄ ubọọn̄ kan̄.
22 “Eya orọ,
ogwu ikaan̄ utọn̄,
inọ ikọ Ekwukwu Awaji okitumu inyi ebi ntitiin̄ Awaji geelek.”