Eji ekakifieek bọn Nte kiji ikọ
14
Ìbọkọ gwun̄ Nte ogwu ichechieek kan̄ ikanyege ìtap kubọk ogwu melek kinyi,
mè ikafieek ọmọ ikọ mije inu îchieekbe me ejit kan̄,
eyi ikajege ìkike melek eyi kinyi.
2 Ichechieek ene ge môkọt inyi irek ibe ene ya ikirie otutuuk inu geelek.
Ire,
ofifi ene ogwu ichechieek kan̄ ikanyege môkọt ikirie inu ònan̄a me lek uti gaalek.
3 Ogwu òkirie inu geelek ikakpọ ogwu ìkakirie inu geelek chieen̄ ìsiki.
Ogwu ìkakirie inu geelek ikafieek oyerebet ìtip ogwu òkirie inu geelek îmun̄be,
mije,
Awaji îbọkọ ene ya itap.
4 Owu ogwu òkisibi oyerebet me ibot gwun̄ ikwaan̄ ofifi ene,
ìre owu ìre ekene?
Îre ogwu nte uwu kan̄ gaalek obokọt iriọọn̄ mè ìre òkirọ inwọn,
mè ìre ìkarọ ìnwọn.
Ọmọ môrọ inwọn,
mije,
Okaan̄-ene môrọ inyi ọmọ irọ ijaan̄.
5 Ene ge môkọt ikimọnọ ibe ke usen ge îkup me mbuban igak usen kechilọ,
me ere ofifi ene okimọnọ ibe ke otutuuk usen ìre ìkike.
Ene geelek imun̄ ibe ke inu ọmọ ochieekbe me lek ìre eyi ejit kan̄ ochieekbe inye.
6 Ogwu òkisun̄ usen ge me mbuban igak usen kechilọ,
ìkirọ ikeya inyi Okaan̄-ene.
Ogwu òkitaka anam,
ìkitaka isa imin Okaan̄-ene,
mije,
ìkinyi Awaji itọn̄.
Ogwu ìkakirie inu geelek,
ìkirọ si ikeya inyi Okaan̄-ene,
mè ikinyi Awaji itọn̄.
7 Mije,
kpunu ene geege me etete kiji ogwu òkiluk ugwem inyi lek kan̄ gaalek.
Kpunu si ogwu òkikwu mkpa inyi lek kan̄ gaalek.
8 Ire eji igat ugwem,
eji egat inyi Okaan̄-ene.
Ire eji ikwu mkpa,
eji ekwu si inyi Okaan̄-ene.
Eya orọ,
mè ìre eji ekup me ògat ugwem,
mè ìre eji ekwakwaan̄,
eji ìre eyi Okaan̄-ene.
9 Îre mije keyi ke Jisọs Karais okwu,
mè iyaka ijomo me mkpa,
inyi ọmọ inire Okaan̄-ene inyi ebi ìkwakwaan̄,
mè ebi ìkup me ugwem.
10 Ire ikeya,
ìre owu òjeje ikifieek gwun̄ Nte kwun̄ ikọ?
Sà ìre owu òjeje ikikpọ gwun̄ Nte kwun̄ chieen̄ isiki?
Mije,
eji otutuuk ene mêkeke me isi ogboon̄ oyerebet Awaji,
mè Awaji isibi eji oyerebet me ibot.
11 Okumugwem ìtumu me Ikpa Mbuban ibe,
“Kè lek ugwem n̄a,
ene geelek môtọbọ ekpe me isi n̄a;
otu geelek môtumu isibi ibe ke emi nre Awaji.”a
12 Eya orọ,
ene geelek me etete kiji ìbofuk ifuk eyi ibot kan̄ inyi Awaji.
Eji ekarọ inyi gwun̄ Nte kiji inan̄a irọn̄
13 Eya orọ,
eji ekayaka ìfieek bọn Nte kiji ikọ.
Kpan̄asi ikeya,
ìtumu ìfieek ibe ke enyi kpeberọ inu geege òbokana ukput inyi gwun̄ Nte kinyi,
mè irọ inyi inan̄a irọn̄ inin̄ me emen ijo inu.
14 Emi kubọk ogwu ògọgọọk Jisọs igbaan̄ ire ge,
nriọọn̄ ijaan̄ lek ibe ke kpunu inorie geege òkukup me lek kan̄,
mè ire inorie ikatanage me isi Awaji.
Ire,
ire ikaan̄ ogwu ifuk inu ge kubọk inu ikatanage me isi Awaji,
me lek ene ya,
inu ya si ìkatana me isi Awaji.
15 Ire inu owu okirie ikisisaak gwun̄ Nte kwun̄,
ìsibi ibe ke owu òkayaka ìrọ inu me imumechieen̄.
Kasa me lek inorie okirie ìjijaka ugwem gwun̄ Nte kwun̄ ogwu Jisọs Karais okwube mkpa me ibot.
16 Kachieek ibe inu owu okimọnọ kubọk ata inu iyaka inikana inu ebi ene ekitumu ibe ke îre ijo inu.
17 Mije,
mkpulu eyi Awaji ìkagbaan̄ me lek inu irerie mè inwọnwọ,
ire,
ìkido ata irọrọ,
mè esuuk,
mè unwọọn̄ echi Ekwukwu Mbuban okinyi.
18 Mije,
ene geelek òkisi ikwaan̄ inyi Karais me oniin̄ òkup ikeyi ìre ogwu Awaji okibele ejit me lek,
mè ire si ogwu inu kan̄ okineme ebilene.
19 Eya orọ,
ubọk geelek eji ekọtbe,
eji ekerọ inu echi òbokitap esuuk,
mè echi òbokinama eji mè ebi melek kiji inye.
20 Kajijaka ikwaan̄ Awaji mije inorie.
Otutuuk inorie geelek îtana me isi Awaji.
Ire,
ìkatat ibe ene irie inorie eyi òborọ inyi ofifi ene inan̄a irọn̄.
21 Înwọn enenen ire owu òkataka anam,
òkanwọ miin̄,
òkarọrọ si ofifi inu geege eyi môrọbe inyi gwun̄ Nte kwun̄ inan̄a irọn̄.
22 Eya orọ,
ire ikaan̄ inu geelek owu ochieekbe me lek ofolek inu chi,
sun̄ nyi lek kwun̄ melek Awaji.
Uga ubelejit okup inyi ene geelek ikatipge lek kan̄ oyerebet sa me lek inu îbọkọbe itap inyi lek kan̄.
23 Ire,
ire ikaan̄ ogwu ikaan̄ ejit iba ofolek inu îkirie,
Awaji îtip ene ya oyerebet,
mije,
ìkasa me ichechieek ìrie inu ya,
bak me lek,
irọrọ geelek eyi ikanan̄age me ichechieek ìre ijo inu.