2 “Mgbọ keyi, mâtumu atikọ inyi owu: Ebi ubọọn̄ ita mêsibi inu inikpulu ido Pesia, ge me udun̄ ge. Ukot kè ebiba isiraka, ogwu òso ini môkakana isibi. Ogwu ubọọn̄ keyi môbọọn̄ ubọọn̄ enenen igak ebilọ. Mije ubọọn̄ kan̄ ya, ọmọ môkana ogwu òkaan̄ unye, mè inisa me ikeya irọ inyi otutuuk ene enegbaan̄ etim akọn̄ ekeme ido Giris. 3 Ikpele ogwu ubọọn̄ ge òkakaan̄ unye enenen môkakana isibi, mè ikikpulu ikpele ama ubọọn̄, mè ikirọ inu geelek òneme ọmọ. 4 Ire, me mgbọ unye kan̄ môminbe ichit, mêjijaka ama ubọọn̄ kan̄, mè itọọn̄ ibak okpọkọ ini inyi agan̄ ini eyi linyọn̄. Ebi ubọọn̄ ebi kpere bọn kan̄ ebekikpulu, ire, ema kpebekaan̄ unye isasa ikpulu kubọk ọmọ okaan̄be, mije, ebegbugbugbọ mkpulu kan̄ igwook, mè isa ikana inyi ebi ofifi ife.

5 “Ogwu ubọọn̄ òkikpulu ama ubọọn̄ eyi agan̄ osiki mônenikaan̄ unye. Ire, ene ge me lek ebi ibot akọn̄ kan̄ mônye lek igak ọmọ, mè inikikpulu ama ubọọn̄ eyi kan̄, eyi òmimin enenen. 6 Acha inen mè inen isiraka, ema mêgbaan̄ lek ibọp, mè inire otu ge. Ogwu ubọọn̄ agan̄ osiki môsa ogwu gwun̄ enenwaan̄ inyi ogwu ubọọn̄ agan̄ inyọn̄ me lek nwa, inyi mgbaan̄-nchieek kiban̄ inye, mè ifuk. Ire, ogwu enenwaan̄ ya ìkpoyaka ikọt ikaan̄ unye me lek ogwu olom, ubọk ogwu ute si ìkpoyaka inye. Mgbọ ya, mênenitet ogwu enenwaan̄ ya, mè ogwu ute, mè ogwu òkibieen̄ ọmọ inye isa inyi ibe ekpan̄.

7 “Ene ge ogwu owot iman nte ogwu enenwaan̄ ya mônenikana ogwu ubọọn̄ agan̄ osiki, me irek ogwu adasi, mè inijibi akọn̄ isi itim me lek ogwu ubọọn̄ agan̄ inyọn̄, mè ibum itibi ama mgban akọn̄ kan̄, mè itim ikpan̄ ọmọ. 8 Môkpulu si otutuuk awaji kiban̄, mè mkpọmfaka kiban̄, mè inu ubọọn̄ kiban̄ echi alata okuket mè echi alata araran̄, isa ifo Ijipiti. Akọn̄ keyi isiraka, ogwu ubọọn̄ agan̄ osiki mônenitele ogwu ubọọn̄ agan̄ inyọn̄, inyi isiki efuuk owuwa acha. 9 Ogwu ubọọn̄ agan̄ inyọn̄ mônenijibi akọn̄ isi itim me lek ogwu ubọọn̄ agan̄ osiki, ire, ìkpokọt itap isi. Mônenigwu ikom ifo ido kan̄. 10 Ire, bọn ogwu ubọọn̄ agan̄ inyọn̄ mênenibem lek akọn̄, mè inititiin̄ ebi akọn̄ iwa ijot ere, mè ikigbuku isibi kubọk ogbururu eyi kpebekọt ikeke ida, mè isa akọn̄ ya isi ire ama mgban akọn̄ ogwu ubọọn̄ agan̄ osiki.

11 “Ogwu ubọọn̄ agan̄ osiki mônanaan̄ ejit, mè inijibi akọn̄ isibi isi itim me lek ogwu ubọọn̄ agan̄ inyọn̄. Ogwu ubọọn̄ agan̄ inyọn̄ môsasa urum akọn̄ òwawa enenen ikeke ida ọmọ, ire ọmọ môtitim ikpan̄ ogwu ubọọn̄ agan̄ inyọn̄ ya. 12 Mgbọ ogwu ubọọn̄ agan̄ osiki môtimbe ikpan̄ ogwu ubọọn̄ agan̄ inyọn̄, mè ikpulu owuwa urum akọn̄ kan̄ me usun̄, ogwu ubọọn̄ agan̄ osiki mônenikigumu lek, mè ikpan̄ obop obop ene. Ire, ntim-mkpan̄ kan̄ ìkabofuk, 13 mije, ogwu ubọọn̄ agan̄ inyọn̄ môkpọk ititiin̄ ebi akọn̄ ìwawa igak ebi adasi mgbọ. Owuwa acha isiraka, ọmọ melek owuwa urum akọn̄ kan̄ cha ìkakaan̄ ogbogbo nroon̄ akọn̄, mênenijibi akọn̄ isi agan̄ osiki.

14 “Me ukot mgbọ cha, owuwa ebi ene mêkpaka ibot, mè ikije ikeme ogwu ubọọn̄ agan̄ osiki ya. Ebi afa me etete ebi kinyi mêgọọk si ikpaka ibot, isasa irọ inyi ilaak ọkpọchieen̄ ya irọ iso. Ire ema kpebekọt irọ. 15 Ogwu ubọọn̄ agan̄ inyọn̄ mônenijibi akọn̄ inu agan̄ osiki, mè ininama obubot mbin akọn̄ ichak me lek mgban ama mgban akọn̄ ge, mè itim akọn̄ ibọkọ ama ya. Lek môwọwọ ebi akọn̄ agan̄ osiki, kpebeyaka ikọt ikeke ida. Otutuuk ebi akọn̄ kiban̄, ikerere ebi ìnyenye lek ichit, kpebeyaka ikaan̄ unye geege isasa ibeme akọn̄ keya. 16 Ogwu ubọọn̄ agan̄ inyọn̄ ya òjijibi akọn̄ isi agan̄ osiki ya mônenikirọ inu ike geelek òneme ọmọ, kpunu ogwu òbokọt ikeke ida ọmọ. Mônenibọkọ Uja Ido ya ikaan̄, mè ikaan̄ si unye isasa ijijaka ama ya igwook. 17 Môtumu ifieek me ejit kan̄, mè isa otutuuk unye eyi ama ubọọn̄ kan̄ inu agan̄ osiki, iniweek irọrọ mgbaan̄-nchieek melek ogwu ubọọn̄ agan̄ osiki. Môsa gwun̄ enenwaan̄ ge ininyi ogwu ubọọn̄ agan̄ osiki me lek nwa, inyi ọmọ isa me ikeya igbuku mkpulu agan̄ osiki icho. Ire, otitọt kan̄ ìkpokaan̄ ibot. 18 Mgbọ inu îbenbe me ejit ìkare ubọk, mônenikana isi ida ido echi òkup me agba okwaan̄, mè itim akọn̄ ibọkọ owuwa kiban̄. Ire, ogwu ibot akọn̄ ge, ogwu ofifi ido, mônenitim ikpan̄ ọmọ, mè iyaka unyechieen̄ kan̄ ya ichiọọk ọmọ me lek. 19 Ọmọ mônenigwu ikom ikije ifo agan̄ ama mgban akọn̄ eyi ido kan̄. Ire, akọn̄ môrerie ọmọ, ọmọ môkwukwu, kpebeyaka imun̄ ọmọ igak ikeya.

20 “Ofifi ogwu ubọọn̄ mônenimọnọ irek kan̄, mè iniria ogwu òkibọkọ otitip ido, inyi isi ikitet ebi ene me unye ubọk ibọkọ otitip ido, inyi mêsabe inibeme ama ubọọn̄ kan̄ melek òrirọ kan̄. Ire, ogwu ubọọn̄ keyi ìbokup sọn̄ acha inen mè inen gaalek, mêkpakpan̄. Mkpa kan̄ ìkabore mije gọlọgọlọ, ìkporere si me akọn̄.

21 “Ofifi ogwu òbonibọkọ irek ubọọn̄ ìbore ogwu lọkọlọkọ ugwem, ogwu ebi ene kpebekinyi umin kubọk ogwu ubọọn̄. Ogwu ubọọn̄ keyi ìbojibi akọn̄ initim me lek ama ubọọn̄ ya me mgbọ ene geege kpokpọbe chieen̄ ibe akọn̄ mônu, mè isa me ikeya itet ama ubọọn̄ ya ibọkọ. 22 Ọmọ môtim ikpan̄ ogbogbo urum akọn̄ geelek ọmọ môchichinibe, mè ikpan̄ si ogwu ibot òkikpọ chieen̄ me lek inyan̄a-ibot Awaji. 23 Ogwu ubọọn̄ yi môrọ ataak ataak mgbaan̄-nchieek melek owuwa ido, mè ifiaan̄ ema igwook, mè inikana ogwu òkaan̄ ikpele unye, ubọk geelek ibe ke ebi ìkigọọk ọmọ ikeke ìre ene inen mè inen gaalek. 24 Ogwu ubọọn̄ yi môkijibi akọn̄ isi itim ikpan̄ ido echi òbọbọọn̄ ubọọn̄ me mgbọ ife cha kpekpọ chieen̄ ibe akọn̄ mônu, mè isa me ikeya irọ inu ebi nte kan̄ mè ebi nte nte kan̄ kpekọt irọ. Môchon inu îfumbe, mè echi îchichimbe, mè owuwa inu ubọọn̄, inyi ebi melek kan̄. Môtọt igbugbugbọ owuwa ama mgban akọn̄, ire, otitọt kan̄ ìbore sọntiik mgbidim mgbọ gaalek.

25 “Ogwu ubọọn̄ agan̄ inyọn̄ yi môtitiin̄ ikpele urum akọn̄, mè itet lek inye, mè ikat ejit ijibi akọn̄ isa isi itim me lek ogwu ubọọn̄ agan̄ osiki. Ogwu ubọọn̄ agan̄ osiki mônenisa ikpele urum akọn̄ ìwawa enenen, mè inye lek enenen, ijibi akọn̄ isibi isi ikweek ogwu ubọọn̄ agan̄ inyọn̄. Ire, ìkpokọt ikeke ida ogwu ubọọn̄ agan̄ inyọn̄, mije owuwa otitọt etakabe ikeme ọmọ. 26 Ebi melek ogwu ubọọn̄ yi ekigbaan̄ ikweek irie inorie kan̄ mêneniweek ikpakpan̄ ogwu ubọọn̄ yi, mêyiyala urum ebi akọn̄ kan̄, mè ikpan̄ owuwa me lek kiban̄. 27 Ebi ubọọn̄ iba chi, ìtetet ejit inye me irọrọ ijo inu, mêgbaan̄ isiki ikweek irek me lek ikasi ge ikirie inorie, mè ikikan̄ ataak inyi lek kiban̄. Ire, eya ìkabotap ubọk inyi agan̄ geege, mije, mgbọ esun̄be isikem, mgburudun̄ kiban̄ ìbonunu. 28 Ogwu ubọọn̄ agan̄ inyọn̄ mônenikpulu owuwa inu ubọọn̄ îfumbe me akọn̄ isa ikaan̄ me ubọk igwu ikom ifo ido kan̄. Ire, môben me ejit itatap ufialek me lek ebi ìkisun̄ inyan̄a-ibot Awaji. Môrọ si ubọk òneme ọmọ, mè inigwu ikom ifo ido kan̄.

29 “Mgbọ mgbọ esun̄be isikem, ogwu ubọọn̄ agan̄ inyọn̄ môkpọk ijibi akọn̄ isi itim me lek ebi agan̄ osiki. Ire, eyi mgbọ keyi ìkpokup kubọk eyi adasi mgbọ. 30 Owuwa uji akọn̄ ònan̄a me ido agba okwaan̄ agan̄ ichep-ura mênu initim ọmọ akọn̄ me lek, mè itap ukpook igak ọmọ emen. Ọmọ môgwugwu ikom, mè inisa me unaan̄-ejit isi itap ufialek me lek ebi ìkisun̄ inyan̄a-ibot òkup mbuban, mè ikaan̄ ata ejit me lek ebi geelek ìjijit isusun̄ inyan̄a-ibot òkup mbuban ya.

31 “Ebi akọn̄ mênanan̄a ikeke ichaka mbuban me lek ere mgban akọn̄ Uwu Mbuban, mè igban ibe ekayaka ìgwa ngwugwa echi ekigwa usen geelek me Uwu Mbuban, mè iniyik òchichaka inu eyi òkitap mfufiat me ere ya. 32 Ogwu ubọọn̄ yi mônenikisa ofiaan̄ ofiaan̄ ikọ otu ileke ebi ìkpakpaka ibot inyi inyan̄a-ibot ya, ema mêkakana igọọk ọmọ. Ire, ebi geelek ebi ìriọọn̄ Awaji kiban̄, mêtetet lek inye, mè ijit ọmọ.

33 “Ebi ìkaan̄ iriọọn̄-inu mênenikijeen̄ owuwa ebi ene inu. Ire, sọnja mgbọ, mêkpan̄ usini ebi ìriọọn̄ inu cha me akọn̄, mè itap ukan̄ iwọp usini kiban̄, mè ikpulu usini kiban̄ me usun̄ akọn̄, mè ibọkọ ema otutuuk inu ema ekaan̄be. 34 Me emen saasaak kiban̄, ema mêbọkọ sọnja ntap-ubọk. Owuwa ene ebi kpere ebi atikọ mênigọọk ema ikeke. 35 Usini ebi ìriọọn̄ inu cha mênan̄a irọn̄, inyi esa me ikeya egwọk ema, mè ema etana, mè ekakaan̄ nrọ-nlọ geege me ugwem kiban̄ mege isi ire òta mgbọ ya, mije, òta mgbọ ya mônu me mgbọ Awaji otumube ifieek ibe ke mônu.

36 “Ogwu ubọọn̄ ya môkirọ inu geelek òneme ọmọ, mè ikibene lek, mè ikimọnọ ibe ke ọmọ îmin igak ebi kè awaji geelek, mè ikitumu ijo mbat ikọ ikeme Awaji otutuuk awaji geelek. Inu geelek môkije ijaan̄ ọmọ me lek mege ire mgbọ unaan̄-ejit Awaji môtabe, mije, inu ya eyi etumube ifieek ìborọrọ iso. 37 Ogwu ubọọn̄ yi ìbokpọkpọ awaji ebi nte nte kan̄ isiki chieen̄, mè ikpọ si awaji eyi ebibaan̄ ekinwọọn̄ itọtọbọ ebum inyi isiki chieen̄. Ìkposasa awaji geege igwen inu geege, ìbobebene lek kan̄ imin isaba iraka otutuuk awaji geelek. 38 Kpan̄asi awaji kecha, ogwu ubọọn̄ ya ìbokimin awaji uwu mgban akọn̄. Îre awaji ya, eyi ebi nte nte kan̄ kperiọọn̄, ke ìbokisa alata okuket mè alata araran̄ mè esese chieen̄ ewuuk unye otu ewe melek inyinyi unye ewe ikifaka mfaka inyi. 39 Ogwu ubọọn̄ yi môsa me unye eyi awaji ofifi ido yi itim akọn̄ me lek ama mgban akọn̄ echi ònyenye ichit. Môsa ikpele umin inyi ebi geelek ìsisiki ibot inyi ọmọ, mè isa ema ito ibe ekekpulu owuwa ebi ene, mè iche ijọn̄ inyi ema kubọk mkpukpe ubọk ikwaan̄ kiban̄.

40 “Me òta mgbọ, ogwu ubọọn̄ agan̄ osiki mônenijibi akọn̄ isi itim me lek ama ubọọn̄ agan̄ inyọn̄. Ogwu ubọọn̄ agan̄ inyọn̄ môjijibi akọn̄ eyi kan̄ isibi isi ikweek ọmọ, mè isa owuwa uji akọn̄, mè ebi akọn̄ inyọn̄ inyinya, mè owuwa uji akọn̄ okwaan̄ isi itim akọn̄ me lek kan̄. Môsa si ejit yaage ijibi akọn̄ ya inin̄ owuwa ido, mè igbuku imeen̄ ido chi kubọk ogbururu mun̄ ile onin̄ ama. 41 Ogwu ubọọn̄ agan̄ inyọn̄ ya môjibi akọn̄ inin̄ Uja Ido ya, mè itim ikpan̄ owuwa ido. Ire, ebi Edọm, mè ebi Mowabu, mè owuwa ilile ama ido Amọn mênwọnọ me ubọk kan̄. 42 Ogwu ubọọn̄ yi môtim ikpan̄ owuwa ido, Ijipiti si ìkponwọnọ. 43 Môbọkọ otutuuk inu ubọọn̄ echi alata araran̄, mè echi alata okuket, mè otutuuk inu ubọọn̄ geelek òkup me Ijipiti. Môtim ikpan̄ ido Libiya, mè ido Etiopia si igbaalek. 44 Ire, etip ònan̄a me agan̄ mbum-ura mè echi ònan̄a me agan̄ inyọn̄ inire ọmọ lek môtap ọmọ uga ukpook me lek, mè irọ inyi isa me unaan̄-ejit itim akọn̄ ijijaka owuwa ido, mè ichep owuwa me lek ido cha. 45 Môgwuun̄ uwu ọfọ ubọọn̄ kan̄ me etete okwaan̄ ile melek uja ogoon̄ mbuban ya. Ire, mêkpan̄ ọmọ me ere ya, kpunu ogwu òbotap ubọk inyi ọmọ.