Ubọk ene îge inu me agba uwu me ijọk kè Belisaja
5
Ikakwun̄ usen ge, mgbọ owuwa acha orakabe, ogwu ubọọn̄ Belisaja onenito ikpele ijọk ge inyi obop ebi ibot ikwaan̄ kan̄, ọmọ melek kiban̄ ekekinwọ miin̄. 2 Mgbọ miin̄ okanabe Belisaja me chieen̄, inyinyi ida ibe esi ekpulu ekpen̄ alata araran̄ mè alata okuket cha, echi Nebukadineja nte kan̄ ukot ikaan̄ okpulube me emen Uwu Mbuban Awaji me Jeruselem esa enu, inyi ọmọ, ogwu ubọọn̄, melek ebi nwa kan̄ mè ebi ugan kan̄, mè ebi ibot ikwaan̄ kan̄, esa enwọ miin̄. 3 Enenisi ikpulu ekpen̄ alata araran̄ cha, echi ekpulube me emen Uwu Mbuban Awaji me Jeruselem, isa inu. Ogwu ubọọn̄ mè ebi ibot ikwaan̄ kan̄, mè ebi nwa kan̄, mè ebi ugan kan̄, ekekisa ekpen̄ cha inwọ miin̄. 4 Mgbọ ema ekisa ekpen̄ cha inwọ miin̄, ema ekekitọn̄ awaji kiban̄ cha, echi esabe alata araran̄, mè alata okuket, mè ekwe, mè okwukwut, mè uti, mè ewuuk ikike irom.5 Me ekakpọge chieen̄, ema eyaka inimun̄ ubọk ebilene ge okige inu me agba uwu echọkọbe irọt, me agba lek ngugọọn̄ mkpukan̄ me emen uwu ogwu ubọọn̄ ya. Ogwu ubọọn̄ Belisaja okekikpọ ike ubọk ya okige inu me agba uwu ya. 6 Ukpook otetet ogwu ubọọn̄ igọm, isi kan̄ owọwọlọ, akpatukot iba kan̄ okekigba ikwak, ebek ukot iba kan̄ owọwọ me ijọn̄.
7 Ogwu ubọọn̄ otataan̄ ukpo ibe egwen ebi ìkitet ǹcha, mè ebi ìkisa ntoronyan̄ ido ido-inu, mè ebi ìkido ido-inu, enyi ọmọ. Mgbọ ife cha enube, itutumu inyi ebi ìriọọn̄ inu Babilọn chi ibe, “Ene geelek òkọkọt ifuk inu yi egebe me agba uwu, mè ibum ibot inyi emi, mêtap ene ya ofọnti irio irio ebi ubọọn̄ ekitap, mè ikwaan̄ akalari alata araran̄ me ebek, ọmọ mônenikana òso ene ita me irek mkpulu me otutuuk ama ubọọn̄ yi.”
8 Otutuuk ebi ìriọọn̄ inu ogwu ubọọn̄ enunu, ire, ema kpekọt ifuk inu ya egebe me agba uwu, kpekọt ibum si ibot. 9 Mije keya, ukpook otetet ogwu ubọọn̄ igak adasi mgbọ, isi kan̄ si owọwọlọ igak adasi mgbọ. Otutuuk ebi ibot ikwaan̄ kan̄ eninin̄ èweke, kpeyaka iriọọn̄ inu eberọ.
10 Mgbọ nga ogwu ubọọn̄ onọbe ida ogwu ubọọn̄ mè ebi ibot ikwaan̄ kan̄ ekitaan̄ ukpo, inanan̄a ije inu emen uwu ere ekirie ijọk ya, mè initumu ibe, “Ogwu ubọọn̄, luk ujọn̄ọ ugwem! Kayaka ìfieek owot, kayaka ìchieek ibe isi kwun̄ iwọlọ! 11 Me ama ubọọn̄ kwun̄, îkaan̄ ogwu enerieen̄ ge òkaan̄ ekwukwu ebi kè awaji ìkup mbuban me emen. Me ukot mgbọ nte kwun̄ okikpulu, mîweek imun̄ ibe ke ogwu enerieen̄ ya îkaan̄ ngobo-ntet, mè ifuk-ibot, mè iriọọn̄-inu, kubọk ebi kè awaji ekikaan̄. Nte kwun̄, Nebukadineja ogwu ubọọn̄, osasa ọmọ irọ ogwu ibot inyi otutuuk ebi ìkiroon̄ nriroon̄, mè ebi ìkitet ǹcha, mè ebi ìkisa ntoronyan̄ ido ido-inu, mè ebi ìkido ido-inu. Îre nte kwun̄, ogwu ubọọn̄ oto ọmọ me irek ya. 12 Ogwu enerieen̄ ya ìre Danien, ogwu nte kwun̄ onyibe erieen̄ Belitisaja. Mîweek imun̄ ibe ke ogwu enerieen̄ ya îfet ibot, mè ikaan̄ ifuk-ibot mè ngobo-ntet, mè ikikọt ibum ibot ilaak, mè nke nke urọk, mè ikikọt irọ si owuwa uyọt uyọt ufialek. Ria ikwaan̄ gwen Danien, ke môbum ibot inu yi egebe inyi owu.”
13 Mgbọ esabe Danien inu me isi ogwu ubọọn̄, ogwu ubọọn̄ obebe ọmọ, “Ìre owu ore Danien, ene ge me lek ebi usun̄ akọn̄ nte n̄a ogwu ubọọn̄ osabe inan̄a me Juda inu? 14 Nnọ ibe ke ekwukwu ebi kè awaji òwa me emen kwun̄, ke owu okaan̄ ngobo-ntet, mè ifuk-ibot, mè ikaan̄ si iriọọn̄-inu eyi kpunu ojelek kan̄. 15 Mîsa ebi ìriọọn̄ inu mè ebi ìkitet ǹcha inu me isi n̄a ibe enefuk inu yi egebe me agba uwu, mè ebum ibot enyi emi. Ire, ema kpekọt. 16 Nnọ ibe ke owu òkekikọt ibum ibot owuwa nlelet inu, mè ikikọt ikirọ si owuwa uyọt uyọt ufialek. Mgbọ keyi, ire okọt ifuk inu yi egebe, mè ibum ibot kan̄ inyi emi, mêtap owu ofọnti irio irio ebi ubọọn̄ ekitap, mè ikwaan̄ owu akalari alata araran̄ me ebek, owu mônenikana òso ene ita me irek mkpulu me otutuuk ama ubọọn̄ yi.”
17 Danien ofọfọọk ogwu ubọọn̄ ibe, “Tet inyinyi kwun̄ kaan̄, mè sa mkpukpe cha kpe nyi ofifi ene. Ire, mâfuk inu yi egebe inyi owu, ogwu ubọọn̄, mè ibum si ibot kan̄ inyi owu.
18 “Ogwu ubọọn̄, Awaji Ogwu Òbebene Ichit înyi nte kwun̄ Nebukadineja irek mkpulu, mè irek òbebene, mè umin ubọọn̄, mè òrirọ. 19 Mije irek òbebene eyi Awaji onyibe nte kwun̄, otutuuk ebi ife geelek, mè ido geelek, mè ebi otu usem geelek ekitetet ọmọ ukpook me lek, mè ikifieek owot me lek kan̄. Ebi geelek ogwu ubọọn̄ oweekbe ikpakpan̄, ìkikpakpan̄; ebi îweekbe itetele ibe enwọnọ, ìkitetele ibe enwọnọ; ebi îweekbe ibebene me irek, ìkibebene me irek; ebi îweekbe ikekeme isiki, ìkikekeme isiki. 20 Ire, mgbọ îbenebe ikigumu lek, mè ikinye ejit, Awaji odada ọmọ isan̄a me inyọn̄ ogboon̄ ubọọn̄ kan̄, mè ibọkọ umin ubọọn̄ kan̄ isan̄a ọmọ me ubọk. 21 Îrieen̄ ọmọ isan̄a me etete ebilene, mè inyi ọmọ ejit eyi anam oron, ọmọ oluluk me etete ebi kè inyinya akpan oron, mè ikitaka mbubet kubọk eriembuuk, mbat ònan̄a me inyọn̄ okekireke ọmọ lek, mege ire mgbọ îniriọọn̄ ibe ke Awaji Ogwu Òbebene Ichit ore ogwu òkitọ ikọ me ama ubọọn̄ ebilene geelek, mè ikito ene geelek òneme ọmọ ibe ikikpulu.
22 “Ire, owu ogwu gwun̄, Belisaja, owu òkasiki lek kwun̄, ubọk geelek owu oriọọn̄be otutuuk inu chi ijaan̄. 23 Kpan̄asi ikeya, owu obebene lek ikirọ ikeme Ogwukaan̄-ene òkup me emen inyọn̄. Owu onyi ida, ekpukpulu ekpen̄ ònan̄a me Uwu Mbuban kan̄ ijet owu. Owu melek ebi ibot ikwaan̄ kwun̄, mè ebi nwa kwun̄, mè ebi ugan kwun̄ esasa ekpen̄ cha ikinwọ miin̄, mè ikitọn̄ ebi kè awaji alata okuket, mè alata araran̄, mè ekwe, mè okwukwut, mè uti, mè ewuuk cha, echi kpekimọọn̄ inu, kpekinọ ikọ, kpekigobo inu geege itet. Ire, Awaji ya, ogwu ugwem kwun̄ okupbe me ubọk, ogwu òtetet ibot olik me lek otutuuk inu geelek ògbaan̄ me lek kwun̄, owu òkanyi umin. 24 Îre mije keyi ke Awaji ya oria ubọk ya ibe inige inu yi.
25 “Inu egebe ya ìre ikeyi:
MENE, MENE, TEKEN, PASIN.a
26 “Ibot ikọ cha ìre ikeyi:
MENE ìsibi ibe ke Awaji îfuk otu ifuk usen owu obokpulu isan̄a, mè isa ire òta.
27 TEKEN ìsibi ibe ke mîtọ ulobo kwun̄ ikpọ me inyọn̄ otitọ, mè imun̄ ibe ke owu òkaso ifuk.
28 PASINb ìsibi ibe ke mîtọbọ ama ubọọn̄ kwun̄ ibum, mè isa ikana itap me ubọk ebi Midia mè ebi Pesia.”
29 Belisaja onyinyi ida, etatap Danien ofọnti irio irio ebi ubọọn̄ ekitap, mè ikwaan̄ ọmọ akalari alata araran̄ me ebek, mè ibene ọmọ me irek isa irọ òso ene ita me mkpulu me ama ubọọn̄ ya.