7 “Mgbọ keyi, Okumugwem, Awaji Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: ‘Keke orọ enyi etapbe ikpele unan òkup ikeyi me lek kinyi gaalek? Keke orọ enyi ekitap jakajaka me lek ebirieen̄ mè ebibaan̄, mè nsabọn mè nsek nsabọn me Juda, inyi enyi ekayaka ìkaan̄ ebi mêsikbe inyi enyi? 8 Keke orọ enyi esabe inu ubọk kinyi orombe itap emi unaan̄-ejit? Enyi ekisi iwọp nsensi inyi ofifi awaji me ido Ijipiti, ere enyi enube iniluk. Ìkpọ, enyi mîjijaka lek kinyi isan̄a, mè ikana inu ebekisa ifieek otu, mè inu ochak me etete otutuuk ido geelek me linyọn̄. 9 Ìre enyi mîwuuk inu ikpak cha ebi nte nte kinyi erọbe, mè echi ebi ubọọn̄ Juda mè ebi nwa kiban̄ erọbe, mè echi enyi mè ebi nwa kinyi erọbe me ijọn̄ Juda, mè irọ si me lek oniin̄ Jeruselem? 10 Mege inire chereyi, lek kiban̄ ìkasiki, kpekakaan̄ si ulibi, kpekisun̄ ikan n̄a, kpekirọ orọmijọn̄ n̄a cha ntobe me isi kinyi mè isi ebi nte nte kinyi.

11 “ ‘Eya orọ, Okumugwem, Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Mâniyaka isi n̄a ida enyi, mè isa ùrioon̄ inichep otutuuk ido Juda isan̄a kpai. 12 Mâkpulu otutuuk ebi Juda ebi ìsisik isan̄a, ebi ìtetet isi kiban̄ itat ifofo ijọn̄ Ijipiti isi iluk me ere keya. Ema mêkwaan̄ irurọn̄ọ me ijọn̄ Ijipiti. Ema mêkwaan̄ me otu oge akọn̄ mè irak akan̄. Ibene me lek ogwu òsisip ichit ire lek ogwu òmimin ichit, ema otutuuk mêkwaan̄ isan̄a. Ema mêkana inu mêkisa ifieek otu, mè inu urimi, mè inu esip, mè inu ochak. 13 Mâsa oge akọn̄ mè akan̄ mè ijo orukan̄ isulu ebi ìluk me Ijipiti osusut kubọk nsulube ebi Jeruselem. 14 Me lek ebi Juda ebi ìsisik mè inan̄a ifo Ijipiti isi iluk, ene geege ìkpogat ugwem, ìkponwọnwọnọ si, ene geege ìkpogwu ikom ika inu ijọn̄ Juda ya, eyi òkilọk ema igwugwu ikom ika iniluk. Ene geege ìkpoka, îtata ene inen mè inen gaalek ebi mênwọnọbe.’ ”

15 Otutuuk ebirieen̄ ìrọriọọn̄ ibe ke ebi nwa kiban̄ mîkiwọp nsensi inyi ofifi awaji, mè otutuuk ebibaan̄ ìkukup me ere ya, mè otutuuk ebi ìkiluk me Ijipiti me agan̄ Paturus, ikpele urum ebi ene, etutumu inyi Jerimaya ibe, 16 “Eji kpebegban̄ ikọ cha otumube me erieen̄ Okumugwem inyi eji! 17 Eji ebekirọrọ si inu geelek eji etumube ifieek me otu kiji irọrọ. Eji mêkiwọp nsensi inyi Ubọọn̄ Enenwaan̄ Akpabin Inyọn̄, mè ikigwook miin̄ ngwugwa inyi ọmọ, kubọk eji mè ebi nte nte kiji mè ebi ubọọn̄ kiji melek ebi ibot mkpulu kiji erọbe me ama ebi Juda cha, mè irọ me lek oniin̄ Jeruselem cha. Mgbọ ya, eji mîkaan̄ owuwa inorie ikirie ijot, inu okekije ijaan̄ eji me lek, eji kpemun̄ ufialek geege. 18 Ire, karake eji kpeyaka ikiwọp nsensi inyi Ubọọn̄ Enenwaan̄ Akpabin Inyọn̄, kpeyaka ikigwook miin̄ ngwugwa inyi, karakeya ke otutuuk inu onan eji, oge akọn̄ mè akan̄ otata eji isan̄a.” 19 Ebibaan̄ cha etutumu si ibe, “Mgbọ eji ekiwọp nsensi inyi Ubọọn̄ Enenwaan̄ Akpabin Inyọn̄ mè ikigwook miin̄ ngwugwa inyi, ìre ebi nlom kiji kperiọọn̄ ibe eji mêkirọ unin̄i fituru me mbet kan̄, mè ikigwook miin̄ ngwugwa inyi ni?”

20 Jerimaya onenitumu inyi otutuuk ebi ene cha, ebirieen̄ mè ebibaan̄, ebi ìkifọọk ọmọ otu cha ibe, 21 “Ìre ìkafat ìre nsensi cha enyi mè ebi nte nte kinyi, mè ebi ubọọn̄ kinyi, mè ebi ibot mkpulu kinyi melek ebi ene, ewọpbe me ama Juda cha mè iwọp me lek oniin̄ Jeruselem cha ke Okumugwem okeek, mè imọnọ itap me ejit ni? 22 Îre mije Okumugwem ìkayaka ìkọt ìme inu ikpak kinyi cha mè filafila inu cha enyi erọbe, ke ido kinyi okana inu ekisa ifieek otu, mè ere ejijakabe igwook, mè ere òyayat ita, kubọk îkupbe me cherekeyi. 23 Îre mije enyi ekiwọp nsensi, mè ikirọ Okumugwem ijo inu, enyi kpegban̄ ikọ kan̄, kpesun̄ ikan kan̄ mè orọmijọn̄ kan̄ mè nteme kan̄, ke ùrioon̄ keyi otoon̄ enyi, kubọk enyi ekimun̄ cherekeyi.” 24 Jerimaya onenitumu inyi otutuuk ebi ife cha melek ebibaan̄ cha ibe, “Otutuuk kinyi ebi Juda ìkup me Ijipiti, ìgban̄ ikọ Okumugwem: 25 Okumugwem, Awaji Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: Enyi mè ebi nwa kinyi mîtumu me otu kinyi, mè irọrọ si me ubọk kinyi, ibe: ‘Eji ebekiwọwọp nsensi mè ikigwook miin̄ ngwugwa inyi Ubọọn̄ Enenwaan̄ Akpabin Inyọn̄.’

“Ìtet lek ìnye ìkirọ use enyi echieekbe! Ìkisun̄ inyan̄a-ibot enyi enyan̄abe! 26 Ire, otutuuk kinyi ebi Juda ìluk me ijọn̄ Ijipiti, ìgban̄ ikọ Okumugwem: ‘Ìkpọ, nsa ikpele erieen̄ n̄a inyan̄a ibot ibe ke kpunu ogwu Juda geege, òluk me ere geelek me Ijipiti, òboyaka ikpọk ichili otu igwen erieen̄ n̄a ofifi ikisa inyan̄a ibot ibe, “Kè lek ugwem Ogwukaan̄-ene Okumugwem.” Emi Okumugwem ntumu.’ 27 Ìkpọ, emi ǹgwọgwọk chieen̄ ikikpọ ema, irọrọ ema ijo inu, ìkare ata inu. Otutuuk ebi Juda ìkup me Ijipiti mêkwaan̄ isan̄a me otu oge akọn̄ mè irak akan̄, mege otutuuk kiban̄ mêtabe isan̄a kpai. 28 Ebi mênwọnọbe me otu oge akọn̄, mè inan̄a me Ijipiti ika inu me ijọn̄ Juda ebere ene inen mè inen gaalek. Mgbọ ya, otutuuk ebi Juda ìsisik, ebi ìniluk me Ijipiti mêtolek iniriọọn̄ ogwu ikọ kan̄ obokeke, mè ìre eyi n̄a, mè ìre eyi kiban̄.

29 “ ‘Eyiyi môre òriọọn̄ inyi enyi ibe ke mâsulu enyi osusut me ere keyi, inyi enyi eriọọn̄ ibe ke ikọ ijo inu ya nkitumu ibe ke mârọ enyi ìbokekeke. Emi Okumugwem ntumu.’ 30 Okumugwem onenitumu ibe ikeyi: ‘Mâniyaka Ofira, ogwu Fero, ogwu ubọọn̄ ebi Ijipiti, itap me ubọk ebi ochicha kan̄ ebi ìkiweek ebek ugwem kan̄, kubọk nyakabe Jedikaya, ogwu ubọọn̄ ebi Juda, itap me ubọk kè Nebukadineja, ogwu ubọọn̄ ebi Babilọn, ogwu ochicha kan̄ òkiweek ebek ugwem kan̄.’ ”