Jerimaya îtaba ebi ene ubọk me utọn̄ ibe ekup me Juda
42
Otutuuk ebi ibot akọn̄ cha, igbaalek kè Joyanan gwun̄ kè Kareya mè Jejaniya gwun̄ kè Osaya, mè otutuuk ebi ene, ibene me lek ogwu òsisip ichit ire lek ogwu òmimin ichit, 2 eneninu me lek kè Jerimaya ogwu nriran, mè itumu inyi ibe, “Soso, gban̄ mbeek kiji, mè riaak uriaak nyi Okumugwem Awaji kwun̄ me ibot kiji otutuuk ebi ìsisik chi. Mije, eji sọn̄ ibot ene inen mè inen gaalek eyaka inisik me lek owuwa otu ifuk eyi eji erebe me adasi mgbọ, kubọk owu osabe chieen̄ kwun̄ imun̄ eji mgbọ keyi. 3 Eya orọ, riaak Okumugwem Awaji kwun̄ be itumu inyi eji agan̄ eji ebenin̄, mè inu eji eberọ.”4 Jerimaya onenifọọk ema ibe, “Nnọ. Me atikọ, mâriaak Okumugwem Awaji kinyi kubọk enyi ebeekbe. Inu geelek Okumugwem otumube, mâtumu inyi enyi, m̀kpalet enyi inu geege.”
5 Ema enenibe Jerimaya, “Kè Okumugwem ire ogwu ata-ikọ ikeme eji, ogwu ata-ikọ eyi atikọ, ogwu etoon̄be ejit me lek, ire eji kperọ otutuuk inu geelek Okumugwem Awaji kwun̄ oriabe owu ibe owu òtumu ònyi eji. 6 Ìnwọnwọn, ìfefieek, eji ebegban̄ utọn̄ me ida Okumugwem Awaji kiji, ogwu eji eriabe owu isi lek, inyi inu môjaan̄ eji me lek mgbọ eji isigban̄ utọn̄ me ida Okumugwem Awaji kiji.”
7 Akọp usen iraraka, Okumugwem otutumu ikọ melek kè Jerimaya. 8 Igwegwen Joyanan gwun̄ kè Kareya mè otutuuk ebi ibot akọn̄ ebi melek kan̄, mè otutuuk ebi ene, ibene me lek ogwu òsisip ichit ire lek ogwu òbebene ichit. 9 Inenitumu inyi ema ibe, “Okumugwem, Awaji ebi Ijeren, ogwu enyi eriabe emi ibe ǹsa mbeek kinyi ǹsi lek, ìtumu ibe ikeyi: 10 ‘Me atikọ, ire enyi ikup me lek ijọn̄ yi, mânama enyi ibene ikeke, m̀kpagbugbọ enyi igwook; mâwop enyi igwuun̄, m̀kpajibi enyi ito, mije, ùrioon̄ keyi nsabe initoon̄ enyi îyọt emi me lek. 11 Ikatet ukpook me lek ogwu ubọọn̄ Babilọn ogwu enyi ekitet ukpook me lek. Ikatet ukpook me lek kan̄. Emi òwa melek kinyi, mânyan̄a enyi, mè itaba enyi isibi me ubọk kan̄. Emi Okumugwem ntumu. 12 Mâkaan̄ enyi nsan me lek, inyi ọmọ si môto enyi nsan, mè irọ inyi enyi eka enu me lek ijọn̄ kinyi.’
13 “Ire, ire enyi itumu ibe, ‘Eji kpebekup me lek ijọn̄ keyi,’ mè isa me ikeya ikpaka ida Okumugwem Awaji kinyi, 14 mè enyi iyaka ibe si, ‘In̄-in̄, eji mêfon Ijipiti isi iluk me ere eji kpebemun̄ akọn̄, kpebenọ ida otita, kpebekup me uraafiọọn̄ inorie,’ 15 jei ebi Juda ebi ìsisik, ire enyi itumu ikeya, ìgban̄ ikọ Okumugwem. Okumugwem, Awaji Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: ‘Ire enyi itet isi kinyi itat isisi Ijipiti, mè ire enyi ije isi iluk me ere keya, 16 oge akọn̄ ya eyi enyi ekitet ukpook me lek, môsoon̄ enyi me ijọn̄ Ijipiti; akan̄ ya enyi ekifieek owot me lek, môgọọk enyi me udun̄ isi ire Ijipiti; ere keya ke enyi ebekwaan̄. 17 Me atikọ, otutuuk ebi geelek ìtetet isi kiban̄ itat ifofo Ijipiti isi iluk mêkwaan̄ me otu oge akọn̄, mè irak akan̄ mè ijo orukan̄. Ene ge ikeyi me lek kiban̄ ìkposik, ene geege ìkpolibi inwọnọ ùrioon̄ mbato ikeme ema.’ 18 Okumugwem, Awaji Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: ‘Ike mgbukube unaan̄-ejit n̄a mè uyok uyok unaan̄-ejit n̄a igwook me lek ebi ìluk me Jeruselem, ikeya si ke mbagbuku uyok uyok unaan̄-ejit n̄a igwook enyi me lek, mgbọ enyi isifon Ijipiti. Enyi mêkana inu ebekisa ifieek otu, mè inu urimi, mè inu esip mè inu ochak; enyi kpebeyaka ikpọk imun̄ ere keyi ofifi.’
19 “Enyi ebi Juda ebi ìsisik, Okumugwem îra itumu ikọ ofolek kinyi ibe, ‘Ikasi Ijipiti.’ Ìriọọn̄! Nra itaba enyi ubọk me utọn̄ cherekeyi! 20 Lek kinyi gaalek ke enyi efiaan̄ mgbọ enyi eriabe emi isi lek Okumugwem Awaji kinyi ibe, ‘Riaak Okumugwem Awaji kiji me ibot kiji; inu geelek Okumugwem Awaji kiji obe eji erọ, kpa nyi eji, ke eji mêrọ.’ 21 Cherekeyi, mkpa inyi enyi, ire, enyi kpegban̄ si ida Okumugwem Awaji kinyi me lek inu geelek îriabe emi ibe ǹtumu ǹnyi enyi. 22 Eya orọ, mgbọ keyi, ìriọọn̄ ubọk ìriọọn̄ ibe ke enyi ebekwaan̄ me otu oge akọn̄, mè irak akan̄ mè ijo orukan̄ me ere ya eyi enyi ekiweek ifofo isi iluk.”