Mkpulu ata irọrọ
32
Kpọ, ogwu ubọọn̄ ge môkeke ubọọn̄ me ata irọrọ,ebi ibot mêkpulu me unen oyerebet.
2 Ene geelek me etete kiban̄ ìbore ere ilet-lek me isi efet,
mè ere irak-ibot me irak egwijo;
mè ikisuuk ene lek kubọk ibot mun̄ me emen èwê,
mè ikisiki ene lek kubọk ogugo ikpele ewuuk
me inyọn̄ ijọn̄ òkirọ lek ene iweek.
3 Mgbọ ya, chieen̄ ebi ìkimọọn̄ inu ìkpoyaka ichit,
utọn̄ ebi ìkinọ ikọ ìbokinọnọ ikọ.
4 Ejit ebi uran-lek môtolek inikaan̄ ngobo-ntet,
alọm ebi ochichi môtolek inikitumu ikọ ibolo.
5 Kpebeyaka ikiben ogwu mbubut igwen ogwu ilile,
kpebeyaka ikinyi ogwu ngan ulibi.
6 Mije, ogwu mbubut ìkitumu ikọ mbubut,
ijo inu ìkakinan me emen ejit kan̄;
ọmọ ìkirọ inu ebi ekariọọn̄ge Awaji ekirọ,
mè ikitumu Okumugwem ilọ;
ìkitele ebi uraafiọọn̄ me ukpọk owot,
mè ojit ebi ebek orakbe mudim.
7 Nroon̄ ikwaan̄ ogwu ngan ìre ijo inu;
ọmọ ìkitọt inu ikpak,
inyi ọmọ isa ikọ ataak ifiat ebi ugbọọn̄,
mè ifiat si ebi ijo irek,
ikerere mgbọ unen kiban̄ osibibe utoon̄.
8 Ire, ogwu òkirọ inu òtatat, ìkitọt otitọt òtatat,
ìkikeke si inye me lek inu òtatat.
Itataba ubọk me utọn̄ ebibaan̄ Jeruselem
9 Enyi ebibaan̄ ebi ìkiluk kubọk enyi kpekaan̄ saasaak,
ìnan̄a ikeke, mè ìnọ ida ikọ n̄a;
enyi nsabọn ibaan̄ ebi ìkup kubọk mîkaan̄ utelelek,
ìgban̄ utọn̄ me lek ikọ n̄a!
10 Acha ge mè usen inen,
enyi ebibaan̄ ìkup kubọk enyi kpekaan̄ ufialek geege,
mêbene ikiran;
mije, enyi kpebeyaka ikigbeme gerep ofifi,
irọrọkọ mfut me uko si ìkpoyaka ikup.
11 Ìkiran, enyi ebibaan̄ ebi ìkiluk
kubọk enyi kpekaan̄ saasaak,
ìfieek owot, enyi nsabọn
ibaan̄ ìkup kubọk mîkaan̄ utelelek!
Ìtọn̄ọ ekwut kinyi ìgwook,
mè ìtobo ekwut ufieejit ìnye me ebon.
12 Ìsulu ubọk me ejit, ìfieek ejit, mije atalek uko cha,
ìfieek ejit mije ata gerep cha òkitoto mfut ijot lek,
13 mè ìfieek ejit, mije ijọn̄ ebi n̄a,
eyi ukpak mè abọm egbe otibibe ichit;
iin̄, ìfieek ejit, mije otutuuk uwu ubelejit cha,
mè ama unwọọn̄ ya.
14 Mije, mêyat itele ama mgban akọn̄,
mè iyat ita me emen ama mgbọ òkikpukput ya;
uwu mgban akọn̄ òkup me inyọn̄ ogoon̄,
mè uwu-oket akọn̄, môkpukpuku igwook,
mè ikana ere eyatbe itele mege ire mgbọ geelek;
ere ebi kè inyinya akpan oron ebekinibọm urie,
mè ere ebi kè arọọn̄ ebekinitaka mbubet,
15 mege mêriabe Ekwukwu Awaji
inan̄a me emen inyọn̄ igwook me lek kiji.
Mgbọ ya, emen èwê mônenikana ata ijọn̄ uko,
ata ijọn̄ uko môneniyaka inikup kubọk aka oron.
16 Mgbọ ya, unen oyerebet môkup me emen èwê,
ata irọrọ môkup me ata ijọn̄ uko ya.
17 Ata irọrọ môsa esuuk inu,
ikwaan̄ ata irọrọ mônenisa utelelek mè ikpọchieen̄ inu,
mege ire mgbọ geelek.
18 Ebi n̄a mêluk me ere esuuk,
mè uwu òkup me utelelek,
me ere isiki-efuuk eyi kpebemun̄ saasaak.
19 Ubọk geelek ibot mgbọlọ môgbugbọbe oron igwook,
ubọk geelek mêgwakbe ama ikpukpuku igwook,
20 môre ikpele ubelejit inyi enyi,
mgbọ enyi isikiwop mfut uko
me otutuuk agba mun̄ geelek,
eriembuuk kinyi melek inyinya akpan kinyi
mêkekije ikana ere ikibọm urie.