Ogwu emabe
8
Jei, mebe owu ìre ngwan̄ n̄a enerieen̄,ogwu ònwọnwọ ebe me ejit nga n̄a,
mè ire mamun̄ owu me oyet,
kè ǹtuun̄ owu otu,
eyi ene geege kpomonyinyọ otu inyi emi.
2 Kè nsa owu nje ǹnu,
ǹnentap me uwu nga n̄a,
inyi owu òjeen̄ emi inu.
Kè nnyi owu miin̄ utop olu,
òrere mun̄ pomegaranet n̄a,
inyi owu ònwọ.
3 Ubọk agan̄ ujit kan̄ me irak ibot n̄a,
ubọk agan̄ ulom kan̄ îkat emi ikaan̄.
4 Enyi nsabọn ibaan̄ Jeruselem, ntap mbuban inyi enyi,
kè lek òsô, kè lek uman ogaan̄ òkup me oron:
Ikariki, ikatitimi si imumechieen̄,
mege ire mgbọ îkembe me lek kan̄.
Ebi unene
5 Ìre ekene ore enenwaan̄ keyi
òkinan̄a me emen èwê inu,
òyayaka lek ibieen̄ me lek ogwu ima kan̄?
Ogwu emabe
Me irak uti apulu ke ntimi owu;
ere ya ke nga kwun̄ onin̄ owot kwun̄,
ere ya ke ogwu ònin̄ owot kwun̄ oman owu.
6 Gon emi kam me ejit kwun̄ kubọk iman̄ òriọọn̄,
mè gon me owut-ubọk kwun̄ kubọk iman̄ òriọọn̄.
Mije, imumechieen̄ ìkaan̄ unye kubọk mkpa,
mba-ejit kan̄ ìnye ejit kubọk udọn̄-ufuun̄.
Ìkilomo kubọk ukan̄ òkisasak,
kubọk ukan̄ ònin̄ lek nchat inwan̄ me aka oron.
7 Owuwa mun̄ ìkpokọt iniin̄ imumechieen̄,
ukot mun̄ owuwa okwaan̄ ìkpokọt ibaak imeen̄.
Ire ene isa otutuuk inu ubọọn̄ uwu kan̄ inyi mije imumechieen̄,
ochak gaalek ke ene ya obobọkọ.
Ebi unene
8 Eji mîkaan̄ sọntiik ngwan̄ enenwaan̄,
ogwu ìkatitibi-nu ebe.
Keke ke eji eberọ inyi ngwan̄ kiji enenwaan̄
me usen ene ge mônube ibonido?
9 Ire ọmọ ire mgban kpetibi inin̄ lek,
eji mêsa alata okuket inama owu oket isa ibala ọmọ.
Ire, ire ọmọ ire isotu, igwuku inin̄, egwuku esibi,
eji mêsa uwot uti olik igon afọn̄ ikwek ọmọ.
Ogwu emabe
10 Emi ìre mgban eyi kpetibi inin̄-nu,
ebe n̄a ìkeke kubọk uwu-oket.
Eya orọ, me chieen̄ kan̄,
emi ìre ogwu òneme ọmọ.
11 Solomọn îkaan̄ uko gerep me Baali-Amọn,
mè isa inyi ebi ene me ọkọ.
Ogwu ọkọ ge ge ìbọkikpe ọmọ obop ikpoko alata okuket
me ibot mfut uko ya.
12 Ire, uko gerep n̄a ìkup inyi emi inyinyi me ọkọ.
Jei Solomọn, obop ikpoko
alata okuket ya ìkup inyi owu,
sà efit ikpoko alata okuket iba okup inyi ebi ọkọ cha.
Ogwu ima
13 Owu ogwu òluk me emen uko,
ebi unene kwun̄ mêkigban̄ utọn̄ inọnọ ida kwun̄,
tele emi ǹgọọk ǹnọ ida kwun̄ ya!
Ogwu emabe
14 Gwu kom na, ogwu ima n̄a,
libi na kubọk òsô,
mè ìre gwun̄ ogaan̄,
me inyọn̄ ogoon̄ cha òkidun̄u utop olu.