Use kè Debit melek Okumugwem
Okwa ekikọt isa inene isi Uwu Mbuban.
132
Okumugwem, soso kawuuk Debit;kawuuk si otutuuk kwulukwulu kan̄ geelek.
2 Keek inyan̄a-ibot înyan̄abe inyi owu Okumugwem,
mè use îchieekbe owu Awaji Ogwu Unye,
ogwu Jekọp òkiriaak, ibe,
3 “Emi ǹkabanin̄ agwut uwu n̄a ikup;
ǹkabanene inyọn̄ mkpilaak n̄a ilaak;
4 ǹkabanyieen̄ ilaak;
ǹkabalalaak si inwọnọ;
5 mege mâdọmọbe ere inyi Okumugwem ikup,
atalek uwu ere Awaji Ogwu Unye,
ogwu Jekọp okiriaak obokup.”
6 Kpọ, eji ekup me Efarata inọ
inu ofolek okop inyan̄a-ibot ya;
îre me ijọn̄ uko ebi ama Jiarim
ke eji eniweek okop ya imun̄.
7 Eji enenibe, “Ngwa eji enesi
Uwu Mbuban Okumugwem;
eji enesi etọbọ ebum enyi ọmọ me isi ogboon̄ kan̄.
8 Okumugwem, nan̄a keke, mè na si nin̄ me uwu kwun̄,
mè sa okop inyan̄a-ibot,
òrere iman̄ òriọọn̄ unye kwun̄, gbaalek.
9 Soso, rọ ebi ngwugwa kwun̄ ekerọ ata irọrọ;
tele mè ebi kwun̄ etaan̄ ukpo unwọọn̄.”
10 Mije kè Debit ogwu ikwaan̄ kwun̄,
soso, kada chieen̄ ìsan̄a
me lek ogwu ubọọn̄ owu ogobobe ito.
11 Owu onyan̄a ibot inyi Debit me atikọ;
owu òkpogwu ikom me lek use ochieekbe ọmọ ibe,
“Emi mâsa mfut ge òsibi me lek kwun̄
itoon̄ me inyọn̄ ogboon̄ ubọọn̄ kwun̄.
12 Ire bọn kwun̄ itet inyan̄a-ibot n̄a inye,
mè isun̄ inu ata-ikọ n̄a echi mâjeen̄be ema,
bọn bọn kiban̄ si mêkikweek
me inyọn̄ ogboon̄ ubọọn̄ kwun̄,
mege ire mgbọ ikakaan̄ge itata.”
13 Okumugwem îgobo Sayọn;
îweek isasa irọ ere iluluk kan̄,
14 mè ibe, “Eyi ìre ere itap-efuuk n̄a
ire mgbọ ikakaan̄ge itata;
eyi ìre ere mbaluk,
mije, îre emi mweek inyi lek n̄a.
15 Mânyi Sayọn òjot òjot inu geelek òkup ọmọ me uyọt;
mânyi ebi ugbọọn̄ ìkup me emen kan̄ inorie erie ejot owot.
16 Mânyan̄a ebi ngwugwa ìkup me emen kan̄;
ebi n̄a ebi ìluk me emen kan̄ mêtaan̄ ukpo unwọọn̄.
17 Me Sayọn, mârọ ene ge me lek
bọn kè Debit ikpele ubọọn̄;
mârọ mkpulu ogwu ngobobe ito ikeke inye
kubọk mkpukan̄ aran̄ ìkakinan me emen.
18 Mâsa esip ikana ichit ebi ochicha kan̄ kubọk ekwut,
ire, okpibot ubọọn̄ kan̄ ìbokikekebe.”