Jobu îbọkọ Bilidadi otu
19
Jobu onenibọkọ otu ibe:2 Ìre enyi ebesa ikọ kinyi
itap emi ufialek me lek isi ire mgbọ owa,
mè isa ikpukpuku emi igwook?
3 Akọp mgbọ ire ya enyi ekinye chieen̄ inyi emi,
mè ita esip me isi ikinyi emi kwulukwulu.
4 Ire me atikọ ke nrọ ilọ,
nrọ-nlọ n̄a ìbia emi me ibot.
5 Ire enyi imọnọ me atikọ ibe ke enyi mînwọn igak emi,
mè isa ukwook òkitet emi irọ
inye ibe ke emi nrọ ijo inu,
6 ìriọọn̄ ibe ke îre Awaji orọ emi ilọ,
mè igwook njin kan̄ ikana emi ikwek.
7 “Ntaan̄ ukpo ibe ke mêkirọ emi nnaan̄,
kpunu ogwu òbọbọkọ emi otu;
nto ito iweek ntap-ubọk,
kpunu ogwu òrọrọ inu ònenen inyi emi.
8 Awaji îwak oniin̄ n̄a ichit, inyi nkaraka;
îtap udun me oniin̄ n̄a geelek.
9 Îsan̄a emi ulibi n̄a me lek,
mè isan̄a emi okpibot ubọọn̄ eyi umin isan̄a me ibot.
10 Îgwak emi igwook me agan̄ geelek, ngagak iweek;
îjibi ikpọchieen̄ n̄a isan̄a kubọk ejibi uti me ebon.
11 Unaan̄-ejit kan̄ ìkiyoyok me lek n̄a;
îfuk emi itap me otu ifuk ebi ochicha kan̄.
12 Ebi urum akọn̄ kan̄ mîgbaan̄ ijibi inu,
mè ininama urak ukot kiban̄ ikwek emi,
mè ikpa mbin ikana uwu n̄a.
13 Awaji îbọkọ emi ebi ngwan̄ n̄a isi ito me ujọn̄ọ ere;
ebi òriọọn̄ n̄a mîkpebe emi lek me lek.
14 Bọn ulọk n̄a mîyat itele emi,
ebi une n̄a mîwuuk emi.
15 Ebi ìkirie me uwu n̄a, mè ebibaan̄ ebi ikwaan̄ n̄a
emọnọ emi kubọk ogwu ichen,
ekimun̄ emi kubọk ogwu ofifi ido.
16 Ngwen ogwu ikwaan̄ n̄a enerieen̄ igak, ìkachieek emi,
ubọk geelek nsabe otu n̄a iriaak ọmọ.
17 Nwa n̄a ìlilibi olu otu n̄a;
olu lek n̄a ìkijọjọ me lek
ebi melek n̄a esibibe me owot ge.
18 Nsabọn si ekililibi emi lek,
nsinan̄a ikeke, ema ekichachak emi.
19 Otutuuk ebi unene ibot ejit n̄a ekijọjọ emi ejit me lek,
ebi mmun̄be me chieen̄ ekekirọ ikeme emi.
20 Ukwuuk n̄a ìjeen̄ me lek akpa n̄a mè lek ufuk n̄a,
ìsik sọnja mkpa môsakbe emi ibot.
21 “Ìto emi nsan, jei ebi une n̄a, ìto emi nsan ma,
mije, ubọk Awaji îtoon̄ emi me ijo ere.
22 Keke orọ enyi ekisisaak emi
kubọk Awaji òkisisaak emi?
Ìre saasaak enyi ekinyi akpalek n̄a ìkaso-nu enyi ni?
23 “Kè oneme emi ibe mîge ikọ n̄a isun̄,
kè m̀ma ibe egwat etap me ikpa!
24 Jei, ibe mîsa uti ikpa okwukwut irọkọ me lek oporolo,
mè irọkọ me lek ewuuk, inyi ikup ire mgbọ geelek!
25 Emi nriọọn̄ ibe ke Ogwu Òfaka emi Isibi òwa me ugwem,
me òta kan̄, ọmọ môsibi ikeke me linyọn̄.
26 Akpa n̄a keyi isijijaka isan̄a,
mâmun̄ Awaji me anam akpalek n̄a;
27 emi me lek n̄a mbamun̄ ọmọ, ìkare ofifi ene,
mâsa chieen̄ n̄a imun̄ ọmọ.
“Ejit n̄a îsisik,
28 mije enyi etumube ibe, ‘Eji ebejeje itutuku ọmọ,
eyi ibot ikọ okupbe me lek kan̄?’
29 Enyi me lek kinyi, ìtet ukpook me lek oge akọn̄;
mije, unaan̄-ejit ìbosa oge akọn̄ ininyi enyi osusut,
eya ke enyi ebesa iriọọn̄ ibe ke oyerebet òwa.”