Ayajaya îkana ogwu ubọọn̄ Juda
22
Ebi ama Jeruselem enenisa Ayajaya gwun̄ kè Jeyoram, ogwu òrere ijija ichit, irọ ubọọn̄ me irek ogwu ute, mije urum ebi inọ afa Arabu ìninin̄ orieen̄ akọn̄ kiban̄ ekpan̄be otutuuk bọn kè Jeyoram ebi ugane isan̄a. Ikeyi ke Ayajaya gwun̄ kè Jeyoram onikana ogwu ubọọn̄ Juda.2 Ayajaya ìre akọp acha iba mè ibaa mgbọ îkanabe ubọọn̄, mè ikup me Jeruselem ikpulu acha ge. Erieen̄ ogwu uga ìre Atalia, gwun̄ gwun̄ kè Omiri.
3 Ayajaya îrọ ijo ugwem yaage ebi uwu kè Eyabu erọbe, mije ogwu uga okiteme ọmọ nteme ijo inu. 4 Ayajaya îrọ ijo inu me chieen̄ Okumugwem, kubọk ebi uwu kè Eyabu erọbe, mije, ebi uwu kè Eyabu ekinyi ọmọ nteme mgbọ ogwu ute okwube iraka. Îre nteme cha si ojijaka ọmọ. 5 Sa me nteme ebi uwu kè Eyabu si ke Ayajaya ogọọk Joram gwun̄ kè Eyabu ogwu ubọọn̄ Ijeren isi itim akọn̄ me lek kè Ajayen ogwu ubọọn̄ ido Aram me ama Ramot me Giliadi. Ere ya ke ebi Aram etap Joram unan me lek. 6 Joram onenika inu Jesereli inikup, inyi unan îbenbe me Ramotb me akọn̄ îsibe isi itim me lek kè Ajayen ogwu ubọọn̄ ido Aram ita.
Ayajayac gwun̄ kè Jeyoram ogwu ubọọn̄ Juda onenisi ikpọ Joram gwun̄ kè Eyabu me Jesereli mije unan ya îbenbe.
7 Awaji onenisa me eyi Ayajaya osibe isi ikpọ Joram ya irọ inyi Ayajaya inan̄a irọn̄. Mgbọ yaage Ayajaya orebe uwu kè Joram, ọmọ melek kè Joram enenigbaan̄ isibi ibesi ichichini melek kè Jewu gwun̄ kè Nimsi ogwu Okumugwem owuukbe lek igobo ibe ijijaka uwu kè Eyabu. 8 Mgbọ Jewu okirọ otu oyerebet Awaji iso me lek uwu kè Eyabu, imumun̄ usini ebi ibot mkpulu Juda, mè bọn ngwan̄ kè Ayajaya ebi ìkisi ikwaan̄ inyi Ayajaya, mè ikpan̄ ema si igbaalek. 9 Jewu onenikiweek Ayajaya. Ebi melek kan̄ emumun̄ Ayajaya oletbe me Sameria, mè itet me agam isa ijet Jewu, Jewu okpakpan̄. Ebeben ifuun̄, mije, mîtumu ibe ke îre gwun̄ kè Jiosefat ogwu òsasa otutuuk ejit kan̄ iweek Okumugwem. Sa me ikeya, kpunu ofifi ene geege me uwu kè Ayajaya òyayaka ikọt ikaan̄ efuuk ikpulu ido Juda.
Atalia mè Jowas
10 Mgbọ Atalia nga kè Ayajaya omun̄be ibe ke Ayajaya gwun̄ kan̄ îkwu, ibebene ikikpan̄ otutuuk ebi owot iman ogwu ubọọn̄ me otoko kè Juda. 11 Ire, Jeyoseba, gwun̄ enenwaan̄ kè Jeyoram ogwu ubọọn̄, oneninween lek iben Jowas gwun̄ kè Ayajaya isan̄a me etete bọn ogwu ubọọn̄, ebi ebekpakpan̄, isa isi ilet me emen agwut, ọmọ melek ogwu òkiban ọmọ. Mije Jeyoseba gwun̄ kè Jeyoram ogwu ubọọn̄, òrere si nwa kè Jeyoyada ogwu ngwugwa, orebe ngwan̄ kè Ayajaya, ibeben gwun̄ ya isi ilet isan̄a me chieen̄ kè Atalia, inyi ikakpan̄. 12 Sa me ikeya ke elet Jowas acha gweregwen me emen Uwu Mbuban Awaji. Otutuuk mgbọ ya, Atalia okekikpulu Juda kubọk ubọọn̄ enenwaan̄.