2 Sọọlu onenigobo obop ebi akọn̄ ita me etete ebi akọn̄ Ijeren, mè iria ebi ìsisik ibe efon. Me lek ebi îgobobe cha, inenisun̄ obop ebi akọn̄ iba melek kan̄ me Mikimas me inyọn̄ orioon̄ ere ama Beten okupbe, mè iniria obop ebi akọn̄ ijet Jonatan, gwun̄ kan̄, me Gibiya òkup me ijọn̄ ebi otoko kè Benjamin.

3 Jonatan onenijibi akọn̄ inin̄ ere ebi akọn̄ ebi Filisia ekikup me Geba, etip akọn̄ îtimbe ya onenire utọn̄ ebi Filisia. Sọọlu oneninyi ida ibe ewut otita ekana otutuuk ido ebi Ijeren, mè elook etip ya, inyi otutuuk ebi Iburu enọ. 4 Otutuuk ebi Ijeren eneninọ ibe ke Sọọlu îjibi akọn̄ inin̄ ere ebi akọn̄ Filisia ekikup, mè itim ikpan̄ ema. Ema mînọ si ibe ke inu ya îrọ inyi ebi Filisia echa ebi Ijeren enenen. Egwegwen otutuuk ebi Ijeren isibi inu me Giligan, inyi enegọọk Sọọlu esi akọn̄.

5 Ebi Filisia etititiin̄, mè ibem lek ititim akọn̄ me lek ebi Ijeren. Ema, akọp obop uji akọn̄ ita, mè obop ebi akọn̄ inyọn̄ inyinya gweregwen ebi ìkilibi me uji akọn̄ cha, mè ebi akọn̄ ikike ìwawa me otu ifuk ikup kubọk nkwukwuuk okpoon̄ agba awaji, enenijibi inu inirieen̄ akọn̄ me Mikimas, ama òkup me agan̄ mbum-ura ama Bet Afen. 6 Mgbọ ebi Ijeren emun̄be ibe ke ukot akọn̄ ebi Filisia îlobo igak eyi kiban̄, ke ema kpebekọt ikeke ida, ema elilim isi ileek me emen ǹkororok, mè emen ekpuk oron òkup me ere cha, mè irak ewuuk, mè emen udọn̄-ufuun̄, mè emen udọn̄ mun̄ òkup me ere cha. 7 Usini ebi Iburu mîlim si isaba okwaan̄ Jodan itoon̄ me inyọn̄ ijọn̄ ebi otoko kè Gadi mè agan̄ Giliadi isi ilet.

Otutuuk mgbọ cha, Sọọlu okpọkpọ ibia me Giligan. Otutuuk ebi akọn̄ ìgọgọọk ọmọ ikup ekekiran mije ukpook. 8 Sọọlu îbia me Giligan ikup ikikpọ Samien mege usen jaaba, òrere otu ifuk usen Samien obe ikup iban ọmọ. Ire, mgbọ usen jaaba ya osobe, Samien ìkanu, ebi akọn̄ kè Sọọlu ebebene ikiyat itele ọmọ. 9 Mije keya, Sọọlu obebe esa inu ngwugwa ewọwọp iriọk mè echi ngwugwa esuuk cha ejet ọmọ. Mgbọ esabe inu cha inu, Sọọlu oneniben ngwugwa ewọwọp iriọk ya igwa. 10 Mgbọ yaage Sọọlu ogwabe ngwugwa ewọwọp iriọk ya isan̄a, Samien okakana isibi. Sọọlu ojeje isi ibosi itọp Samien amọn. 11 Samien ododo Sọọlu ibe, “Ìre keke ke owu orọ ikeyi?”

Sọọlu ofọfọọk ibe, “Nkup ikpọ owu igak, mege ire mgbọ owu osun̄be ibe ke owu mônu, owu òkanu. Otutuuk mgbọ cha, ebi akọn̄ n̄a mêkiyat itele emi, sà ebi Filisia mêkititiin̄ me Mikimas. 12 Nnenikeek ibe, mgbọ keyi ke ebi Filisia mênikwala isibi inisoon̄ emi me Giligan, sà emi ǹkabeek ntap-ubọk me ubọk Okumugwem. Mije keya ke nsa me uran-lek iben ngwugwa ya igwa, ǹkagegen ibak ìgwa.”

13 Samien ofọfọọk Sọọlu ibe, “Owu orọ inu ebi burubut! Owu òkarọ inu Okumugwem Awaji kwun̄ onyibe ida ibe owu òrọ. Ibe owu mogban̄ utọn̄, ke Okumugwem orọ inyi mkpulu kwun̄ me Ijeren ikup ire mgbọ geelek. 14 Ire, me mgbọ keyi, owu òkpoyaka ikpulu ebi Ijeren igak ikeya! Okumugwem îra iweek ogwu enerieen̄ ge ogwu ejit kan̄ onemebe, mè igobo isa irọ ogwu mkpulu, ogwu òbokikpulu ebi kan̄, mije, owu òkarọ inu înyibe owu ida ibe owu òrọ.”

15 Samien itutumu ikọ yi isan̄a, inanan̄a me Giligan ije ifo Gibiya me agan̄ ebi otoko kè Benjamin. Sọọlu onenifuk otutuuk ebi akọn̄ ìsisik melek kan̄, mè iniweek imun̄ ibe ke îre efit ebi akọn̄ gweregwen gaalek eyaka inisik melek kan̄.

16 Sọọlu mè Jonatan mè ebi akọn̄ cha ìsisik melek kiban̄ enenisi ititiin̄ me Gibiya me agan̄ ebi otoko kè Benjamin. Ebi akọn̄ Filisia ererieen̄ akọn̄ me Mikimas. 17 Usini ebi akọn̄ Filisia eneninan̄a me orieen̄ akọn̄ kiban̄ me Mikimas isibi isi enun̄unun̄ me etete ebi Ijeren. Ema eche lek kiban̄ ukpa ita. Ukpa ge oje inin̄ oniin̄ ama Ofera eyi òkup me agan̄ Suwali. 18 Ofifi ukpa oje inin̄ oniin̄ ama Bet Oron, sà òso ukpa ita oje inin̄ oniin̄ oke ijọn̄ òkiyaka isi ikpọ iteke ijọn̄ Jeboyim me agan̄ èwê.

19 Me ike mgbọ ya, kpunu kubọk ogwu usọ ikwaan̄ okwukwut geege me otutuuk ido ebi Ijeren, mije, ebi Filisia kpeweek ibe ebi Iburu ekerom oge akọn̄ mè otunwa. 20 Me ike mgbọ cha, otutuuk ebi Ijeren geelek ìweweek iwawat orọk ilile kiban̄, mè ìre orọk sọntiik kiban̄, mè ìre otuban kiban̄, mè ìre oge ikwaan̄ uko kiban̄, ekisa ikwala isibi isi ama ebi Filisia isi iwat, mije, îre ema gaalek eriọọn̄ ubọk ikwaan̄ kecha. 21 Inu geelek ewatbe îkaan̄ otu ewe kan̄. Ema ekibọkọ irek iba me irek ita me lek ikpoko alata okuket ge me iwawat orọk ilile mè orọk sọntiik, mè ikibọkọ irek ge me irek ita me lek ikpoko alata okuket ge me iwawat ocha otu ita mè otuban mè ochichim ekisa ilap eriembuuk.

22 Mije keyi, me usen akọn̄ ya, kpunu kubọk ene ge ikeyi me etete otutuuk ebi akọn̄ ebi Ijeren òkakaan̄ oge akọn̄ mè ìyaka ire otunwa me ubọk, îtata Sọọlu mè Jonatan ogwu gwun̄ gaalek ekaan̄.

23 Ebi Filisia eneniria ebi akọn̄ kiban̄ ibe esi egon oniin̄ utibi ogoon̄ ekije isi ama Mikimas echit.