Ebi Ijeren mîdo ibe enyi ema ubọọn̄
8
Mgbọ Samien omun̄be ibe ke ọmọ îra ikan, inenisa bọn ebirieen̄ iba kan̄ irọ ebi oyerebet inyi ebi Ijeren me irek kan̄. 2 Erieen̄ adasi gwun̄ enerieen̄ kan̄ ìre Juwen, sà erieen̄ ogwu òso iba ore Abija. Ema ene iba ere ebi oyerebet me Bieseba. 3 Ire, nsabọn cha kpekup kubọk nte kiban̄. Ema eyaka inikima ikpoko ngan, mè ikibọkọ ikpoko udun̄, mè ikisibi oyerebet ngan ngan.4 Ebi ugane Ijeren enenititiin̄, mè ininu me lek kè Samien me Rama, 5 mè initumu inyi Samien ibe, “Kpọ, mgbọ keyi owu ora ikan. Nsabọn ebirieen̄ kwun̄ si kpekup kubọk owu okupbe. Eya orọ, to ubọọn̄ nyi eji, ogwu òbokikpulu eji, mè ikisibi oyerebet inyi eji kubọk îkupbe me otutuuk ofifi ido geelek.”
6 Idodo ya ife cha edobe ibe enyi ema ogwu ubọọn̄ ogwu òbokisibi oyerebet inyi ema ya onenifieek Samien me lek enenen. Eya orọ, Samien orariaak uriaak igwen Okumugwem. 7 Okumugwem ofọfọọk Samien otu ibe, “Gban̄ utọn̄ me ida ebi ife cha, mè rọ otutuuk inu geelek etumube inyi owu, mije, ìkare owu ke ema ejit. Îre emi ke ema ejit, ibe emi nkayaka ìkikpulu ema. 8 Ike ema erọbe emi ire eya, ibene me usen mkpulube ema isibi me Ijipiti mege inire cherekeyi, mè ijuuk emi itele, mè isi ikitọbọ ebum inyi ofifi awaji. Mgbọ keyi, îre inu yaage ke ema ekirọ owu si! 9 Me mgbọ keyi, inu geelek ema edobe, rọ nyi ema. Ire, taba ema ubọk me utọn̄ enenen, inyi ema eriọọn̄ inu ogwu òbokikpulu ema obokirọ ema.”
10 Samien oneniben otutuuk ikọ cha Okumugwem otumube inyi ọmọ itumu inyi ebi ife cha ebi ìkido ibe ọmọ inyi ema ubọọn̄. 11 Ìtumu inyi ema ibe, “Ikeyi ke ogwu ubọọn̄ òbokikpulu enyi obokirọ: Môkikpulu bọn ebirieen̄ kinyi itap me akọn̄. Usini kiban̄ mêkikọp uji akọn̄ kan̄, sà usini ebekikọp inyinya kan̄, sà usini ebekilibi me isi inyinya kan̄ ikibem ọmọ. 12 Ogwu ubọọn̄ ya môsa usini bọn ebirieen̄ kinyi irọ ebi ibot akọn̄ ìkikpulu urum obop ebi akọn̄, mè urum akọp ebi akọn̄ go. Usini bọn kinyi mêkibak ijọn̄ iwop mfut me uko kan̄, mè ikirọkọ mfut uko kan̄ si me mgbọ mfut uko cha isiren̄e. Sà usini kiban̄ ebekirom esese chieen̄ nroon̄ akọn̄, mè nroon̄ uji akọn̄ kan̄. 13 Môkpulu bọn ebibaan̄ kinyi, inyi ekerọ aran̄ utop olu, mè eketem inorie, mè ekekala fituru enyi ọmọ. 14 Ijọn̄ uko kinyi mè uko gerep kinyi mè uko olifu kinyi echi òjajaan̄ ichit cha, echa ke ìbotet enyi ibọkọ isa ikana inyi ebi ikwaan̄ kan̄. 15 Môbọkọ irek ge me akọp irek me lek mfut uko kinyi echi ibot ibot, mè lek miin̄ kinyi, isa ikana inyi ebi ibot mkpulu kan̄ mè ebi ikwaan̄ kan̄. 16 Môbọkọ enyi ebi usun̄ kinyi ebirieen̄ mè ebibaan̄, mè ibọkọ si bọn ebirieen̄ kinyi ebi ìnwọnwọn ichit, mè ibọkọ enyi si inyinya akpan kinyi isa ikirọ ikwaan̄ eyi lek kan̄. 17 Môbọkọ enyi si irek ge me akọp irek me lek arọọn̄ kinyi isa irọ eyi kan̄. Enyi me lek kinyi si mênenikana ebi usun̄ inyi ọmọ. 18 Me mgbọ ya, enyi mêtaan̄ ukpo ito ito igwen Okumugwem mije ogwu ubọọn̄ ya enyi esabe ubọk kinyi igobo inyi lek kinyi. Ire, Okumugwem ìkpogban̄ utọn̄ me ida ito kinyi.”
19 Ire, ebi Ijeren cha ejijit igbagban̄ utọn̄ me lek otutuuk ikọ cha Samien otumube. Kpan̄asi ikeya, ema ekekitumu inyi Samien ibe, “In̄-in̄, eji ekiweek ogwu ubọọn̄ ogwu òbokikpulu eji, 20 inyi eji si ekup kubọk otutuuk ebi ofifi ido, mè ekaan̄ ogwu ubọọn̄ kiji ogwu òbokisibi oyerebet kiji inyi eji, mè ikije me isi kiji ikitim akọn̄ kiji inyi eji.”