Ebi Filisia mîyaka okop inyan̄a-ibot ijet ebi Ijeren
6
Okop inyan̄a-ibot Okumugwem îkup me ido ebi Filisia onyan̄ jaaba. 2 Ebi Filisia enenigwen ebi ngwugwa kiban̄, mè ebi yọk-ofia kiban̄ ititiin̄, mè inido ema ibe, “Ìre keke ke eji eberọ me lek okop inyan̄a-ibot Okumugwem? Ìtumu-nu ìnyi eji, ìre eji ebesa keke iria okop inyan̄a-ibot ya ifo ere îkikup?”3 Ebi ife cha enenifọọk ibe, “Ire enyi iberia okop inyan̄a-ibot Awaji ebi Ijeren ijet ebikaan̄, enyi kpeberia ikeya ukpọk ubọk. Ikalọlọ iraria inu ngwugwa esuuk igbaalek, inyi enyi ebọkọ igwagwa, mè esa me ikeya eriọọn̄ inu òrọrọ ibe Okumugwem ikasan̄a enyi ubọk me lek.”
4 Ebi Filisia enenido ife cha ibe, “Ìre kpasi inu ngwugwa esuuk ke eji ebesa iria okop inyan̄a-ibot ya ijet ebikaan̄?”
Ema efọfọọk ibe, “Ubọọn̄ go ke ebi Filisia ekaan̄. Eya orọ, enyi mêsa nkwukwuun̄ alata araran̄ go, mè isa si ikpi alata araran̄ go, igọọk me otu ifuk ebi ubọọn̄ kinyi, mije, îre chieen̄ orukan̄ yaage otet enyi otutuuk ene, mè itet si ebi ubọọn̄ kinyi igbaalek. 5 Enyi mêsa alata araran̄ ibot orukan̄ nkwukwuun̄ òninin̄ ama kinyi, mè isa ibot si ikpi, òrere ofifi inu eyi Okumugwem osabe ijijaka inyọn̄ ijọn̄ kinyi isan̄a, mè isa igbaalek okop inyan̄a-ibot Awaji ya iria ijet ebi Ijeren. Sa me ikeyi, enyi mêneninyi Awaji ebi Ijeren umin. Usini mgbọ, ọmọ mônenisan̄a ubọk kan̄ me lek kinyi mè lek awaji kinyi mè lek ijọn̄ kinyi. 6 Ikatet ejit kinyi ìnye kubọk ebi Ijipiti melek ogwu Fero kiban̄ erọbe. Mgbọ ema etetbe ejit inye, Okumugwem osasa unye ubọk itutuku ema. Me mgburudun̄, ìre ebi Ijipiti kpelilaba ebi Ijeren isibi, mè itele ibe ema enan̄a eje efon?”
7 “Eya orọ, mgbọ keyi, ìnama aya uji ekpirikpo eyi anam okitaba ije, mè ìsa eriembuuk iba echi òkinyi bọn ebe, echi kperarak isa isi ikwaan̄ geege, ìnitobo me lek uji ekpirikpo ya, mè ìtet bọn kiban̄ cha ìsan̄a me lek kiban̄ ìsa ìsi ìtobo me uwu anam. 8 Enyi isirọ isan̄a, ìben okop inyan̄a-ibot Okumugwem ya ìyik me emen uji ekpirikpo ya. Ìtap chieen̄ inu iba cha esabe alata araran̄ irom, echi ebesa iria okop inyan̄a-ibot ya inyi ifo, me emen gwun̄ okop ge, mè ìben si gwun̄ okop ya ìyik me agba lek okop inyan̄a-ibot ya me emen uji ekpirikpo ya. Enyi isirọ isan̄a, ìria okop inyan̄a-ibot ya, inyi ifo. 9 Mgbọ anam cha isikitaba uji ya ije, ìkikpọ agan̄ uji ya oboje inin̄. Ire ikije inin̄ oniin̄ agan̄ ido kiban̄ ikisi ama Bet Semes, eya ìsibi ibe ke îre Awaji ebi Ijeren osulu eji ikpele osusut cha. Ire, ire ìkaje ìnin̄ agan̄ keya, eya mônenijeen̄ ibe ke ìkare ọmọ oria orukan̄ cha òsasa mkpa ijet eji inu, ke orukan̄ cha ìkpọkpọ inu inyi eji ikeya.”
10 Ebi Filisia enenirọ ike ife cha etemebe ema, mè initobo eriembuuk iba etetbe ebi bọn isan̄a me otu ebe me lek uji ekpirikpo ya, mè inisa bọn eriembuuk cha isi itobo me uwu anam. 11 Ema eneniben okop inyan̄a-ibot Okumugwem ya iyik me emen uji ekpirikpo ya, mè itap si gwun̄ okop eyi esabe itap nkwukwuun̄ go esabe alata araran̄ irom, mè ikpi go esabe si alata araran̄ irom, me emen uji ekpirikpo ya. 12 Eriembuuk iba cha ekpọkpọ itet isi itat ikije inin̄ oniin̄ òkisi Bet Semes. Ema ekekitaan̄ ukpo, mè ikpọkpọ itet isi itat ikije me lek uga oniin̄ ge ya gaalek, kpegwaka inin̄ agan̄ ulom mè ìre agan̄ ujit. Ebi ubọọn̄ ebi Filisia cha ekekigọọk ema me udun̄ mege inire otubọk okike ijọn̄ ama Bet Semes.
13 Me ike mgbọ ya ìkpọkpọ inire mgbọ ebi Bet Semes ekirọkọ akpa wit me uko kiban̄ me emen iteke ijọn̄. Ema enenikup me uko kiban̄ ibene chieen̄ imun̄ okop inyan̄a-ibot ya, mè ibele ejit enenen. 14 Eriembuuk cha onenitaba uji ekpirikpo ya inire uko kè Josuwa ogwu Bet Semes, mè inikeke me agba lek ewuuk ile ge òkup me ere ya. Ebi Bet Semes esọsọp uti uji ekpirikpo ya, mè igwu eriembuuk cha isa igwa ngwugwa ewọwọp inyi Okumugwem. 15 Ebi otoko kè Libai enenibene okop inyan̄a-ibot Okumugwem ya mè gwun̄ okop etapbe inu cha esabe alata araran̄ irom me emen iyik me inyọn̄ ewuuk ile ya. Ebi Bet Semes egwagwa ngwugwa ewọwọp iriọk mè esese chieen̄ ngwugwa inyi Okumugwem me usen ya. 16 Ebi ubọọn̄ ebi Filisia cha emumun̄ otutuuk inu cha òrọrọ, mè inigwu ikom ika inu Ekurọn usen yaage.
17 Nkwukwuun̄ go cha esabe alata araran̄ irom echi ebi Filisia esabe iria okop inyan̄a-ibot ya ika ijet ebikaan̄ kubọk inu ngwugwa esuuk inyi Okumugwem, enyi ge me ibot ama ge. Ge okeke inyi Asidọdu, ge okeke inyi Gaja, ge okeke inyi Asikelọn, ge okeke inyi Gat, sà ge okeke inyi Ekurọn. 18 Ikeya si ke ikpi go esabe alata araran̄ irom cha okeke me otuchieen̄ ama go echi ebi ubọọn̄ go kiban̄ cha ekikpulu, ibene me lek unye ama ewakbe mgban ikana ire lek asabọn ama echi kpewak mgban ikana. Ewuuk ile ya eyi eyikbe okop inyan̄a-ibot Okumugwem me inyọn̄ ya ọmọ òwa si me emen uko kè Josuwa ogwu Bet Semes mege inire cherekeyi.
19 Ebi ama Bet Semes etataak chieen̄ ikpọ emen okop inyan̄a-ibot Okumugwem. Mije keya, Okumugwem okpakpan̄ akọp ebirieen̄ jaabaa me etete kiban̄. Ufieejit oninin̄ ama ya mije uga osusut ya Okumugwem osulube ebi ama ya.
Mîben okop inyan̄a-ibot Okumugwem ifo Kiriat Jiarim
20 Ebi ama Bet Semes enenikitumu ibe, “Ukpook! Ìre ekene obokọt ikeke irọ inu me isi Okumugwem Awaji keyi òkup mbuban? Sà ìre ekene ke mêben okop inyan̄a-ibot Okumugwem yi isa ijet mọnọ?” 21 Ema eneniria etip ijet ebi ama Kiriat Jiarim ibe, “Ebi Filisia mîyaka okop inyan̄a-ibot Okumugwem ya inu. Ìna ìniben ìsa ìfo ama kinyi.”