Igwọgwọk lek ogwu orukan̄ inyakpa otabe me lek
14
Okumugwem onenitumu inyi Mosis ibe, 2 “Eyi ìre mfaka ebefaka me lek ogwu orukan̄ inyakpa otabe me lek me usen ebetumu isibi ibe ke ọmọ ìkakaan̄ mbuban me lek. Mêsa ene ya inu me isi ogwu ngwugwa. 3 Ogwu ngwugwa mônenisibi isi udun̄ ama isi ikpọ ene ya lek. Ire imun̄ ibe ke orukan̄ inyakpa ya îta me akpalek ene ya, 4 ogwu ngwugwa môneninyi ida ibe esa ofut iba ikakaan̄ge mbuban me lek mè okpọkọ uti olik mè eri eje eje mè mbubet isop ejet ogwu ebegwọk lek ya. 5 Ogwu ngwugwa môneninyi ida ibe ekpan̄ ge me lek ofut cha me otu otin̄ ibat ata mudim okupbe me emen, inyi eje kan̄ irọn̄ọ igwook me emen mudim ya. 6 Ogwu ngwugwa mônenitet ofut ge keyilọ òsisik me ugwem, mè imọnọ okpọkọ uti olik ya mè eri eje eje ya mè mbubet isop ya, mè iniben ema otutuuk ijiin̄ me emen eje ofut ekpan̄be ya eyi òrọrọn̄ọ igwook me emen ata mudim ya, 7 mè ininyan eje ofut ya igwook me lek ogwu ebegwọk lek ya mgbọ jaaba, isasa igwọk ọmọ lek, inyi mbuban ita ọmọ me lek, mè iniben ofut òkup me ugwem ya itọp, inyi iwulu ifo. 8 Ogwu egwọkbe lek mônenigwọk otutuuk ofọnti mè ekwut kan̄, mè ikwọkọ otutuuk ijeek ibot kan̄ mè ifet otu kan̄ isan̄a, mè iniken mun̄. Mbuban mônenita ọmọ me lek. Isirọ otutuuk inu chi isan̄a, mônenije inin̄ emen ama ere m̀gba-ǹgwele ukan̄ ya, mè isi ikup me isi uwu ọfọ kan̄ mege usen jaaba. 9 Me òso usen jaaba ya, ene ya mônenikpọk ikwọkọ otutuuk ijeek ibot kan̄ mè ifet otu kan̄ mè inwọọn̄ òkup me mgbugbo-chieen̄ kan̄, mè otutuuk ijeek geelek òkup ọmọ me lek isan̄a kpai, mè inikpọk igwọk ofọnti kan̄ mè ekwut kan̄, mè ikpọk iken mun̄. Sa me ikeya, mbuban mônenita ọmọ me lek.10 “Me òso usen jeeta, ene ya môsa bọn orie arọọn̄ iba mè gwun̄ uman arọọn̄ ge òsoso acha ge, echi kpunube ìroon̄ geege me lek inu me lek ogwu ngwugwa. Môsa si iko atalek akpa ekọkọk gweregwen mè okpọkọ eyi etapbe aran̄ me lek inu, inyi mêsabe igwa ngwugwa akpa, mè isa si sọn̄ aran̄ môsobe irek ge me irek ita eyi iko ge igbaalek inu. 11 Ogwu ngwugwa ya, ogwu òbonigwọk ene ya lek, mônenisa ogwu ene ya ebegwọk lek, melek otutuuk inu cha inu me isi Okumugwem, me otu isotu Atanga Chinichini.
12 “Ogwu ngwugwa mônenitet ge me lek bọn arọọn̄ iba cha, mè imọnọ mgbidim iko aran̄ ya, mè inisa ema igwa ngwugwa awọ, mè iwuwum ema me isi Okumugwem kubọk ngwugwa ewuwuwum. 13 Ogwu ngwugwa ìbokpan̄ arọọn̄ ya me ere òkup mbuban, ere ekikpan̄ anam ngwugwa ijo inu mè echi ngwugwa ewọwọp iriọk. Inu ngwugwa awọ ìkup kubọk inu ngwugwa ijo inu. Otutuuk inu geelek esabe igwa ngwugwa iba chi ìkup inyi ogwu ngwugwa. Îre inu òkup mbuban ichit. 14 Ogwu ngwugwa ya môsa usini me lek eje arọọn̄ ngwugwa awọ ya ichak me inwan̄ utọn̄ agan̄ ulom ogwu ene ya, mè isa si ichak me otubọk ile kan̄ agan̄ ulom, mè otukot ile kan̄ agan̄ ulom. 15 Ogwu ngwugwa môtọkọ sọntiik me lek aran̄ ya itap me akajit ubọk kan̄ agan̄ ujit, 16 mè inisa otubọk ilaka-aran̄ kan̄ agan̄ ulom ijiin̄ me emen aran̄ eyi òkup ọmọ me akajit ubọk agan̄ ujit, mè isa inyan me ere ya mgbọ jaaba, me isi Okumugwem. 17 Ogwu ngwugwa mônenisa usini aran̄ ya eyi òkup ọmọ me akajit ubọk ichak ogwu egwọkbe lek ya me inwan̄ utọn̄ agan̄ ulom, mè otubọk ile agan̄ ulom, mè otukot ile agan̄ ulom, mè igwook si usini eje ya me lek inu ngwugwa awọ ya. 18 Ogwu ngwugwa môneniben aran̄ eyi òsisik ọmọ me akajit ubọk ichiọọk me ibot ogwu egwọkbe lek ya, mè isa me ikeya irọ esuuk me ibot ene ya me isi Okumugwem.
19 “Ogwu ngwugwa mônenigwa ngwugwa ijo inu, mè isa me ikeya irọ esuuk me ibot ene ya, inyi mbuban ita ọmọ me lek. Mgbọ eya orakabe, ogwu ngwugwa mônenikpan̄ anam ngwugwa ewọwọp iriọk, 20 mè inigwa ngwugwa ewọwọp iriọk melek ngwugwa akpa me inyọn̄ ntook ngwugwa, mè isa me ikeya irọ esuuk me ibot ene ya. Sa me ikeya, mbuban mônanan̄a ene ya me lek.
21 “Ire, ire ubọk ogwu ene ya ìkasoon̄ otutuuk inu chi, ene ya môsa gwun̄ orie arọọn̄ ge inu inyi mêsabe igwa ngwugwa awọ. Ogwu ngwugwa môben gwun̄ orie arọọn̄ ya iwuwum isa irọ esuuk me ibot ene ya. Ene ya môsa si iko atalek akpa ekọkọk iba eyi etapbe aran̄ me lek inu, inyi mêsabe igwa ngwugwa akpa, mè isa si sọn̄ aran̄ môsobe irek ge me irek ita eyi iko ge igbaalek inu. 22 Ene ya môsa ekerekwukwu iba mè ìyaka ire bọn elesia iba ike ubọk kan̄ osoon̄be inu si. Mêsa ge igwa ngwugwa ijo inu, mè isa ge keyilọ igwa ngwugwa ewọwọp iriọk.
23 “Me òso usen jeeta egwọkbe ene ya lek isan̄a, ọmọ mônenisa otutuuk inu chi inu me isotu Atanga Chinichini, mè inikana itap me ubọk ogwu ngwugwa me isi Okumugwem. 24 Ogwu ngwugwa mônenibọkọ gwun̄ arọọn̄ ngwugwa awọ ya, melek sọn̄ aran̄ òje me lek, mè iniben iwuwum kubọk ngwugwa ewuwuwum me isi Okumugwem, 25 mè inikpan̄ arọọn̄ ngwugwa awọ ya, mè inisa usini eje ònan̄a me lek ichak me inwan̄ utọn̄ agan̄ ulom ogwu ene ya, mè otubọk ile kan̄ agan̄ ulom, mè otukot ile kan̄ agan̄ ulom. 26 Ogwu ngwugwa mônenitọkọ sọntiik me lek aran̄ ya itap me akajit ubọk kan̄ agan̄ ujit, 27 mè inisa otubọk ilaka-aran̄ kan̄ agan̄ ulom ijiin̄ me emen aran̄ òkup ọmọ me akajit ubọk agan̄ ujit, mè isa inyan me ere ya mgbọ jaaba, me isi Okumugwem. 28 Ogwu ngwugwa mônenisa usini me lek aran̄ ya eyi òkup ọmọ me akajit ubọk ichak ogwu egwọkbe lek ya me inwan̄ utọn̄ agan̄ ulom, mè otubọk ile agan̄ ulom, mè otukot ile agan̄ ulom, òrere ere yaage îtoon̄be eje anam ngwugwa awọ ya. 29 Ogwu ngwugwa môneniben aran̄ eyi òsisik ọmọ me akajit ubọk ichiọọk me ibot ogwu egwọkbe lek ya, mè isa me ikeya irọ esuuk me ibot ene ya me isi Okumugwem. 30 Ogwu ngwugwa mônenisa ekerekwukwu cha, mè ìre elesia cha, geelek ubọk ene ya osoon̄be, igwa ngwugwa. 31 Môsa ofut ya ge igwa ngwugwa ijo inu, mè inisa eyi keyilọ òsisik igwa ngwugwa ewọwọp iriọk, mè igwa si ngwugwa akpa igbaalek. Sa me ikeya, ogwu ngwugwa mônenirọ esuuk me ibot ene ya ogwu egwọkbe lek me isi Okumugwem.”
32 Ikeyi ke ebekisa igwọk lek ebi orukan̄ inyakpa ofiakbe ebi kpekọt ikaan̄ otutuuk inu ngwugwa igwọk-lek iso ike îgbebe.
Igwọgwọk lek uwu mbubeek otibibe me emen
33 Okumugwem onenitumu inyi Mosis mè Erọn ibe, 34 “Mgbọ enyi isinin̄ inyọn̄ ijọn̄ Kenan eyi mbanyi enyi me ìrot, mè ire nnitap mbuban mbubeek me uwu kinyi me inyọn̄ ijọn̄ kinyi ya, 35 ogwukaan̄ uwu ya môsi itumu inyi ogwu ngwugwa ibe ke inu ọmọ omun̄be me uwu kan̄ ìbet lek mbubeek. 36 Sabum ogwu ngwugwa mônisisi uwu ya isi ikpọ mbubeek ya, môdasi inyi ida ibe otutuuk ebi ìkup me uwu ya esibi enọọn̄ me uwu ya, inyi mbuban ikachaka me lek otutuuk inu geelek òkup me uwu ya. Mgbọ ebi ene isisibi inọọn̄ me emen uwu ya, ogwu ngwugwa mônenisi uwu ya isi iwọlọ ikpọ. 37 Ire imun̄ mbubeek me lek akpalek uwu ya, mè imun̄ ibe ke mbubeek ya îtaka lek akpalek uwu ya, mè ikup chieen̄ njijoon̄ inwan̄ njijoon̄ inwan̄, mè ìre araran̄, mè ikup kubọk chieen̄ ere cha îdọk igak akpalek uwu ya, 38 ogwu ngwugwa mônan̄a isibi me uwu ya me otu isotu, mè igon isotu uwu ya usen jaaba. 39 Me òso usen jaaba, ogwu ngwugwa môgwu ikom inu inikpọ uwu ya. Ire mbubeek ya itaka iwele isi igak ike îkupbe me adasi mgbọ me akpalek uwu ya, 40 ogwu ngwugwa mônyinyi ida ibe egbugbọ akpa lek uwu ya ere mbubeek ya otibibe, mè ekpulu ewuuk ònan̄a me ere ya echi mbubeek ya otibibe me lek esa esibi enan̄a me emen ama ya efo udun̄ ama, mè esi etọọn̄ efiin̄ me ere òkaan̄ mbuban me lek, 41 mè enekwat otutuuk akpalek uwu ya ekana me agan̄ emen, mè ekpulu otutuuk inu ekwatbe isan̄a cha esa esibi udun̄ ama esi efiin̄ me ere òkaan̄ mbuban me lek. 42 Mênenisa ayaya ewuuk inama ichit chieen̄ ere egbugbọbe ya, mè isa si ayaya abọt ichọkọ ichit akpalek uwu ya.
43 “Ire, ire mbubeek ya iyaka ikpọk inibum isibi me akpalek uwu ya mgbọ egbugbọbe akpat ere eyi oka ya, mè isan̄a ewuuk mbubeek otibibe me lek cha, mè isa ayaya ewuuk ikpọk inama ichit ere ya, mè isa ayaya abọt ichọkọ ichit otutuuk akpalek uwu ya, 44 ogwu ngwugwa môkpọk inu inikpọ akpalek uwu ya. Ire imun̄ ibe ke mbubeek ya îkpọk iso lek uwu ya, mbubeek ya ìre mbuban mbubeek. Eya orọ, mbuban îchaka me lek uwu ya. 45 Ebegbugbugbọ uwu ya ito me ijọn̄, mè ikpọk ewuuk òkup me lek, mè ikpọk si uti geelek òkup me lek uwu ya, mè ikpulu otutuuk isibi me emen ama isa ifo udun̄ ama isi itọọn̄ ifiin̄ me ere òkaan̄ mbuban me lek.
46 “Ene geelek òninin̄ emen uwu ya me mgbọ egonbe ichit, mbuban îchaka me lek ene ya mege ire ikakwun̄. 47 Ogwu geelek òlalaak me emen uwu ya, mè ìre ogwu geelek òrerie inorie me emen uwu ya ìbogwọgwọk otutuuk ofọnti kan̄. 48 Ire, ire ogwu ngwugwa inu inikpọ uwu ya mgbọ esabe abọt ichọkọ akpalek isan̄a, mè imun̄ ibe ke mbubeek ìkakpọk ìso lek uwu ya, ọmọ môtumu isibi ibe ke mbuban îta me lek uwu ya, mije, ke mbubeek ya îta. 49 Ogwu ngwugwa mônenimọnọ ofut iba mè okpọkọ uti olik mè eri eje eje mè mbubet isop isa igwọk lek uwu ya. 50 Ogwu ngwugwa mônenikpan̄ ge me lek ofut iba cha me otu otin̄ ibat etapbe ata mudim me emen, inyi eje kan̄ irọn̄ọ igwook me emen mudim ya. 51 Ogwu ngwugwa mônenimọnọ okpọkọ uti olik ya mè mbubet isop ya mè eri eje eje ya, mè ofut ge keyilọ òsisik me ugwem, mè iniben ema otutuuk ijiin̄ me emen eje ofut ekpan̄be ya eyi òrọrọn̄ọ igwook me emen ata mudim ya, mè isa inyan igwook me lek uwu ya mgbọ jaaba. 52 Sa me ikeya, ogwu ngwugwa ya môsa eje ofut ya mè ata mudim ya mè ofut ge keyilọ eyi òkup me ugwem mè okpọkọ uti olik ya mè mbubet isop ya mè eri eje eje ya igwọk lek uwu ya, 53 mè inisa ofut òkup me ugwem ya isibi ifo udun̄ ama ya, mè iben itọp, inyi iwulu ifo, mè isa me ikeya irọ esuuk me lek uwu ya. Mbuban mônenita me lek uwu ya.”
54 Echi ore ikan òkup inyi otutuuk orukan̄ inyakpa mè mfem, 55 mè mbubeek òtibi me lek ekwut mè ìre me akpalek uwu, 56 mè ǹrọọn̄ mè ifọ mè orukan̄ òkirọ akpalek ene itana okuket. 57 Ikan kechi si ke ebekisa iweek iriọọn̄ mè ìre mbuban îchaka me lek ene mè ìre me lek inu geelek, sà ìre ìkachaka. Echichi ore ikan òkikpulu inyakpa mè mbubeek.