12
Ekwukwu kwun̄, eyi ìkakikwukwu ya,òwa me emen inu geelek.
2 Eya orọ, jei Okumugwem,
owu òkisa ususuk ineen̄ ebi ìrọrọ ilọ isun̄;
mè ikikeek ema inu ema erọbe ilọ,
mè ikitaba ema ubọk me utọn̄,
inyi ema esan̄a lek me lek inu ikpak,
mè etoon̄ owu ejit me lek.
Ijo inu ebi Kenan
3 Ebi ìluk me ijọn̄ mbuban
kwun̄ me ukot ikaan̄,
4 owu ocha ema mije njijọ orirọ kiban̄,
òrere irọrọ inu ibọk ibọk
mè mfaka ikakupge me mbuban.
5 Ema ekigwu bọn kiban̄
me kpunube nsan geege,
melek ijọk ngwugwa itaka-ene
mè inwọnwọ eje ene.
Inu chi ìtibi isibi me emen irariaak yọk,
6 eyi ute mè uga ekikpan̄
nsabọn kpêkọtbe inyan̄a lek.
Owu òben me ejit isasa ebi
nte nte kiji ijijaka ema,
7 inyi ijọn̄ keyi òkup me unye
otu ewe ichit me lek kwun̄,
môbọkọ urum bọn Awaji
ebi ìgbegbe ibe eluk me inyọn̄ ijọn̄ ya.
8 Ire, ubọk geelek si,
eyi ema erebe ebilene, owu òkakpan̄ ema,
owu oneniria uwuson
kubọk òje ìsi urum akọn̄ kwun̄,
inyi inikijijaka ema sọntiik sọntiik.
9 Ìkare ke owu òkpokọt ida
ebi kperiọọn̄ owu itap me
ubọk ebi ata irọrọ me akọn̄,
mè ìre iria anam afa ibe
inijijaka ema isan̄a mgbọ ge kpọi,
mè ìre owu isasan̄a otu amọn ge gaalek.
10 Ire, òkifieek oyerebet
sọntiik sọntiik isa inyi ema irek ibe egwu ekom,
ìkare ke owu òkariọọn̄ ibe
ke ema esibi inyọn̄ ikekirọ ijo inu,
ke ema esasa inu ikpak eyi kiban̄ iniman,
ke ubọk ema ekikeek inu eyi kiban̄
ìkponwene mgbọ geege.
11 Mije, ema ìre owot iman
efieekbe otu inyi bene me ibebene,
ìkare si ibe ke îkaan̄ ogwu
owu okifieek owot me lek
orọ okanyige ema osusut ijo inu kiban̄.
Awaji okaan̄ otutuuk unye mkpulu
12 Ekene obodo ibe:
“Keke ire ya orọbe?”
Sà ìre ekene obokọt ijit
oyerebet kwun̄?
Ekene obogwen owu oyerebet
ibe ke owu ofiat ido echi orombe?
Sà ìre ekene obokọt ikeke me isi
kwun̄ itumu ikọ me ibot ebi oyerebet otipbe?
13 Mije, kpunu awaji geege,
ilọ me lek kwun̄,
ogwu òkikpọ ene geelek chieen̄ me lek,
ogwu owu môsibe isi igbini lek kwun̄ me isi
ibe ke òkasibi oyerebet ikanenge.
14 Kpukpunu si ogwu ubọọn̄
mè ìre ogwu ibot mkpulu geege
òbokan̄ inu inyi owu
òfo me lek ebi owu osulube osusut.
15 Owu ìre ogwu ata irọrọ,
owu òkikpulu si otutuuk
inu geelek me ata irọrọ;
owu òkasa unye kwun̄ ìtip ene geege,
ogwu ikagbege osusut, oyerebet.
16 Mije, unen oyerebet ìnan̄a
me lek unye kwun̄,
unye okaan̄be me lek otutuuk inu
orọ okikaan̄ nsan me lek otutuuk ene.
17 Owu òkijeen̄ unye kwun̄
mgbọ ebilene ekikeek ibe
ke unye kwun̄ ìkaso ifuk,
mè ikigana ere inyi ebi geelek
ìrọriọọn̄ unye ya isan̄a
mè ikinye chieen̄.
18 Ubọk geelek otutuuk unye
okupbe me ubọk kwun̄,
oyerebet kwun̄ ìkire mmemem mmemem,
owu òkisa ikpele ime ikpulu eji,
mije, owu okaan̄ unye irọrọ
inu geelek oweekbe irọrọ
me mgbọ geelek oweekbe irọrọ.
Ikween̄-inu Awaji okween̄be ebi Ijeren
19 Sa me lek okirọ ikeya,
owu ojeen̄ ebi kwun̄ ibe
mè ogwu ata irọrọ ikaan̄ ata ejit,
mè inyi si bọn kwun̄
ata ikpọchieen̄ òjot òjot,
mije, owu onyi ema irek
ibe egwu ekom me ijo inu.
20 Owu ògbagbala chieen̄ mè ikaan̄ ejit nsan
mgbọ okisulu ebi ìchacha bọn kwun̄,
ìrere ebi ìgbegbe mkpa, osusut,
mè ikinyi ema mgbọ mè irek
ibe etele ubọk me lek inu ikpak kiban̄.
21 Ire, owu òkisibi oyerebet
unye unye inyi bọn kwun̄,
ebi onyan̄abe ibot inyi ebi nte nte kiban̄,
mè ichieek ema owuwa ata use.
22 Eya orọ, osikisulu eji osusut,
òkisut ebi ochicha kiji
akọp obop mgbọ igak eyi kiji,
inyi, mgbọ eji isikisibi oyerebet,
eji mêkikeek nsan kwun̄,
ufuna, isikisibi oyerebet inyi eji,
eji mêkikpọ chieen̄ ibe ke mêrọ eji nsan.
Osusut Awaji osulube ebi Ijipiti
23 Eya orọ, ebi ìkiluk ugwem ikpak,
òrere si ugwem burubut,
owu osa òchichaka inu kiban̄ cha
itutuku ema.
24 Mije, ema mîje ijọn̄ọ ere
enenen me lek nlilọ oniin̄,
mè imọnọ nsak nsak anam cha
ekpọbe chieen̄ isiki ibe ìre awaji;
mîfiaan̄ ema ifiin̄
kubọk ekifiaan̄ asasa nsabọn.
25 Ikeya si ke owu omọnọ ema
kubọk nsabọn ekakaan̄ge ifuk-ibot,
mè iria osusut kwun̄ isa ichak ema ochak.
26 Ire, ebi kpesa osusut ochak
ya igwen inu geege,
mêmun̄ osusut ògbegbe ibe Awaji inyi ene.
27 Ukwook kiban̄ me ubọk anam cha
îlet ema efuuk,
anam cha echi ema esabe irọ awaji,
echi esabe isulu ema osusut,
ema etotolek inimun̄,
mè iniriọọn̄ ibe ke
ogwu ema ejitbe irọriọọn̄ ya,
ke ọmọ ore ata Awaji.
Eya orọ, esusulu ema
osusut eyi òmimin ichit.