AÑ SAN PABLO POꞌCARTA ÑEÑTH KELLKAN GALACIOꞌMARNESHAꞌ
GÁLATAS
Attho Pablopaꞌ kellkan carta añekop ñeñth ameꞌñetsa anetso Galacio
1
1-2 Masheñneshachaꞌ ñamha noxhaneshachaꞌ ñeñthes allowenes sameꞌñeñoth apxhaꞌyetsa allemeñ anetso Galacioꞌmar.
Na Pablon sekellkëneꞌña añ carta ñeñthen Jesucristo poellsensaren.
Napaꞌ ama acheñeyeꞌ nellsensenaye,
Jesucristoña nellsenseneꞌ epoet Pompor Parets ñeñth tantaterreꞌ Poechemer rromoth.
Ñamha allowen masheñneshaxhno ñeñth parro arroꞌtsenen,
ñetpaꞌxhoꞌña moeneñet oꞌch womhchaꞌtaset ñamet añ necartoth.
3 Theꞌpaꞌ eꞌñe newomhchaꞌteñothes oꞌch notas:
Yomporepaꞌchña sebensareꞌtampeneꞌ ñeñth atarr Parets epoet Poechemer Jesucristo ñeñth Yepartseshar yepen.
Ñetepaꞌchña sokshateneꞌ eꞌñe sa seyoxhro allowenes.
4 Ñeñthara Jesucristo ñeñth eꞌñe pokteꞌ enteꞌ oꞌch rroma yoꞌchñarekop atthochña yapaꞌ kowenoꞌtseneychaꞌ amaꞌt añ patsropaꞌ sosyaꞌtsañoꞌtsenya,
tharroꞌmar ñeñthpaꞌ ateth pokteꞌ eñch Pompor ñeñthara Yompor ñeñth nanak Parets.
5 Ñeñthara Paretspaꞌ ayeꞌchoxhtaterrapoꞌch eꞌñe thayotheñ errponowañen.
Ñeñthpaꞌ atthetepaꞌch Nompore.
All eñotatanet attho ama eñalle poꞌpoñ alloch yekeshperra
6 Theꞌ napaꞌ oꞌch notas:
Esoꞌmareꞌtña eꞌñe mamekmapaꞌ oꞌ alla sokthapeꞌchyerr poꞌpoñ.
Sapaꞌ xha semneñ oꞌch sekexhpoer Yompor ñeñth oꞌ waꞌñerres oꞌch sameꞌñerrñaña Poechemer Cristo ñeñth rromats atthoch sekeshperra.
Tharraña sañapaꞌ xha semneñ oꞌch alla sokthapeꞌcherr poꞌpoñ ñeñthoꞌch saꞌkeshphaterrayeñ.
7 Poꞌñoxhpaꞌ amaꞌt ama eñalle poꞌpoñ alloch yekeshperrapaꞌ añña ñeñth wapyetsa seshopaꞌ ñetpaꞌ xha moeneñet oꞌch alla moññeꞌtaterrset sokthaphña.
Ñamha ñetpaꞌ moeneñet oꞌch aꞌpoꞌpoñetonaset sokthaphña ñeñth kothaphñats poꞌñoxh alloch yekeshperra eꞌñe yameꞌñeñotha Cristo.
8-9 Tharraña napaꞌ oꞌch notas:
Amaꞌt erraꞌtsenchaꞌ seserrpareꞌtateꞌ poꞌpoñ kothaphñats ñeñth ama ñeñtharayaye ñeñth ateth oꞌ sameꞌñerra awañapaꞌ ñeñth acheñerpaꞌ amoepaꞌch yenpoeñe Yompor.
Amaꞌt yapaꞌxhoꞌña ñerraꞌm oꞌch alla yeserrpareꞌtaterrserr ello ñeñth ama ñeñtharayaye ñeñth ateth oꞌ neserrpareꞌtatwas awaña ñeñth poꞌñoxh alloch yekeshperra yapaꞌxhoꞌña amoepaꞌch alloꞌna yenpaꞌnenye Yompor.
Ñamha amaꞌt añ ateth phatsa ñeñth Yompor poꞌmhllañotheñer entothpaꞌ amaꞌt ñapaꞌxhoꞌña amoepaꞌch yenpoeñe Yompor.
Amaꞌt ñeñthpaꞌ oꞌ notwaseñ awathotheñpaꞌ tharraña theꞌpaꞌ oꞌch alla noterrserr,
amoepaꞌch yenpoeñe Yompor ñeñth ateth petsa.
10 Theꞌ sapaꞌ señotenen napaꞌ ama añekpayeꞌ notenso atthoch kowen entenen acheñ,
añña nemnen oꞌch kowen entenen Yompor.
Ñamha ama acheñeneshayeꞌ nemneno oꞌch nokshach tharroꞌmar ñerraꞌm aña orameñ nemneñ oꞌch nokshach acheñpaꞌ ñeñthepñapaꞌ amatheꞌ errotheno noto napaꞌ poeyocher penen Cristo.
Ateth pha Pablo allempo errteꞌ allsensarethterra
11 Napaꞌ nemneñ masheñneshachaꞌ ñamha noxhaneshachaꞌ oꞌch señoch ñeñth ateth neserrpareꞌtatas awañapaꞌ ñeñthpaꞌ ama acheñoyaye pokthaphña alloch yekeshperra.
12 Napaꞌ ama acheña neñotatenaye ateth,
ñamha napaꞌ ama eseshaꞌ neyxhatenaye.
Añña eꞌñe Jesucristo ñaña eꞌñe neñotateneꞌ ateth.
13 Sapaꞌ oꞌ seꞌmareꞌtwan ateth nepeꞌth awañmoꞌcha allempo nokthoñeꞌth judioneshaꞌ pokthaphña.
Napaꞌ allempo nanak nokthareꞌcheꞌth ñeñth ameꞌñenaya Yompor.
Napaꞌ atarrchaꞌ nemneꞌth oꞌch naꞌkllatwanet.
14 Napaꞌ eꞌñe netsotoñeꞌth judioneshaꞌ pokthaphña.
Napaꞌ ello nemhtanaꞌtweꞌth shonteꞌ nakmaneshaꞌ judioneshaꞌ ñeñth parro neyemteꞌth.
Napaꞌ nanak nemaꞌyoxhroñeꞌth judioneshaꞌ pokthaphña ñeñth ateth yexheꞌth awathnaneshañ,
ñamha ñeñthara ateth yexhatyeseteꞌth ñamha poechemereshañ.
15-16 Tharraña Yomporpaꞌ awoꞌt akrerren awathotheñ amaꞌt allempo ama neꞌñalletenaꞌ.
Tharroꞌmar allempo xhap allempoch eñotaterrenpaꞌ oꞌ yemtaterrna Poechemer ñeñthara Jesús.
Eꞌñe poemoereñothen nanakpaꞌ oꞌ xhoreꞌterren atthoch nach serrpareꞌteꞌ poꞌñoñ alloꞌtsaꞌyen ñeñth ama judioneshayaye.
Ñamha allempo eꞌñe pokteꞌ enteñ Yompor oꞌch eñotaten atethpaꞌ napaꞌ ama eseshaꞌ naꞌphthoꞌto amaꞌt poesheñarra.
17 Ñamha amaꞌt Jerusaléñapaꞌ ama neto oꞌch nenteñaꞌ ñeñth allsensarethneshaꞌ awathotheñ.
Elloña napaꞌ arra awen all oteñet Arabia,
allpaꞌ ama acheñempañoyaye.
Allñapaꞌ all naꞌllponmatenaꞌ eꞌñe alla;
allothñapaꞌ alla nepoerrerra Damasco.
18 Oꞌña met maꞌpa char allempañapaꞌ awen Jerusaléño oꞌch nenteñaꞌ masheñ Pedro.a
Allñapaꞌ alla naꞌpa ñesho xharramat poechena amnarmat.
19 Tharraña allempo alloꞌtsenenpaꞌ ama nenteño poꞌpsheññexhno ñeñth allsensarethneshaꞌ,
ñaptha nenteñaꞌ masheñ Jacobob ñeñthara ñeñth paꞌmoꞌnasheñ pen Yepartseshar Jesús.
20 Poꞌñoxhpaꞌ amaꞌt Yomporpaꞌ eñotenen ñeñth ateth notenespaꞌ ñeñthpaꞌ eꞌñe poꞌñoxh ateth.
21 Allempoña nerr,
arr naswanerr Sirioꞌmar ñamha Cilicioꞌmar.
22 Tharraña amaꞌt allempo ñeñth ameꞌñenaya Cristo all Judeoꞌmarpaꞌ ñetñapaꞌ ama eseshayeꞌ nechmeꞌtenaye.
23 Tharraña awoꞌt eꞌmareꞌchet ñeñth kothareꞌtaweteꞌth awaña theꞌñapaꞌ oꞌ serrpareꞌterran atthoch yameꞌñerra ñeñthara kothaphñats ñeñth xhokma moeneñ awaña oꞌch waporeꞌtater.
24 Ñeñthoꞌmarña theꞌpaꞌ eꞌñe noꞌmarpaꞌ nanak ayeꞌchoxhtateññañet Yompor.