AÑ ÑANOM SAN PABLO POꞌCARTA ÑEÑTH KELLKAN CORINTOꞌMARNESHAꞌ
1 CORINTIOS
Attho Pablopaꞌ kellkan carta añekop ñeñth ameꞌñetsa anetso Corinto
1
1-2 Masheñneshachaꞌ ñamha noxhaneshachaꞌ ñeñthes allowenes eꞌñe sameꞌñeñoth Yompor xhokma sapxhena parro all anetso Corinto,
ñeñthes oꞌ waꞌñerres Parets atthoch poeyochreshaꞌ perres attho eꞌñe separrokmateñoth epas Cristo Jesúspaꞌ sañapaꞌ saꞌkowentatarethterra Partsokop.
Eꞌñe parrokma waꞌñerres Parets atthoch poeyochreshaꞌ perres,
eꞌñe atthekma oꞌ waꞌñerran allowen amaꞌt erraꞌtsena acheñer ñeñth eꞌñe pameꞌñeñoth xhoreꞌteneꞌ Yepartseshar Jesucristo amaꞌt erratheꞌ yexhaꞌyenet.
Ñeñthña Jesucristo ñeñth Yepartseshar yepen ora alloweney ñeñthey ameꞌñenaya.
Na Pablon sekellkëneꞌña añ carta epan masheñ Sóstenes.
Napaꞌ Jesucristo poellsensaren tharroꞌmar Yomporpaꞌ ñeñthekopña oꞌ xhoreꞌterren atthoch nesherber.
3 Theꞌña eꞌñe newomhchaꞌteñothespaꞌ oꞌch notas:
Yomporepaꞌchña sebensareꞌtampeneꞌ ñeñthara Parets epoet Poechemer Jesucristo ñeñth Yepartseshar yepen.
Ñetepaꞌchña sokshateneꞌ eꞌñe sa seyoxhro allowenes.
Arrpaꞌ all parasyosoꞌtamphsanet
4-5 Theꞌpaꞌ oꞌch notas,
napaꞌ xhokma neparasyosoꞌteñ Yompor sokop tharroꞌmar ña poemoereñothpaꞌ atarr bensareꞌtampenes.
Eꞌñe separrokmateñoth Cristo Jesúspaꞌ oꞌ eñotaterres paꞌnamen koxhneshaꞌ kothaphñats seyoxhro.
Ñeñthoꞌmar theꞌpaꞌ amaꞌt ora allpon señosyen eꞌñe ñeshothpaꞌ eꞌñech kowenareꞌ señosyen.
Ñamha amaꞌt allowen kowen kothaphñatspaꞌ oꞌ señotwer.
6 Ñeñth ateth yotwanmas ñeñthchaꞌ ateth phonas Cristo,
theꞌpaꞌ atethxhoꞌ oꞌ etsotatwonas.
7 Ñeñthoꞌmarña theꞌpaꞌ ama es palltetso ñeñthchaꞌ apoerrserr poꞌpoñ Yompor.
Theꞌpaꞌ aña palltetsa oꞌch sekwameꞌteñ esempowañenchaꞌ werra Yepartseshar Jesucristo.
8 Ñeñthara Jesús ñeñthchaꞌ alloꞌna womenk sephaꞌneneꞌ seyoxher.
Atthothach xhap allempoch werra Yepartseshar Jesucristo.
Atthochña allempopaꞌ amach eñalle alloch otteñeꞌcharethes amaꞌt mamesha.
9 Tharroꞌmar Yomporpaꞌ ama poenesho poꞌñoñ,
erroth otpaꞌ atethchaꞌ pha.
Ñeñthara Yompor ñeñth oꞌ waꞌñerrey oꞌch yeyemterrñaña Poechemer ñeñthara Yepartseshar Jesucristo.
Arrpaꞌ all yexhatanet atthoch eꞌñe pathrra kothaphñats anmoet
10 Theꞌpaꞌ oꞌch masheñneshachaꞌ ñamha noxhaneshachaꞌ notas ñeñthchaꞌ ateth sepha,
eꞌñech pathrra sokthapeꞌch allowenes.
Amach alloꞌna sokthapeꞌchyesatsto poꞌpoñeꞌttsokma.
Eꞌñech pathrra kothaphñats sokthapeꞌch allowenes;
erraꞌtsen sokthapeꞌchpaꞌ ñeñthach kowen sent allowenes.
Eꞌñe pathrra sokthaphñothpaꞌ oꞌch separrokmatwa allowenes.
Eꞌñe yameꞌñeñoth Yepartseshar Jesucristo ñeñthoꞌmarña notenes ñeñthchaꞌ ateth sepha.
11 Tharroꞌmar ñeñth parro yexhena Cloépaꞌ ñetpaꞌ eꞌmareꞌtatnet atthoꞌ sepena.
Ñeñthpaꞌ ateth otnet attho sa masheñneshachaꞌ xhokma poꞌpoñ sentannaꞌtyena.
12 Ñeñth notenespaꞌ ñeñthpaꞌ ateth sepena:
Poesheñaꞌttsospaꞌ ateth sotyen:
“Napaꞌ añchaꞌ nameꞌña masheñ Pablo.”
Poꞌpotantaññapaꞌ ñeñthpaꞌ ateth otyenet:
“Napaꞌ añchaꞌ nameꞌña masheñ Apolos.”
Poꞌpotantaññapaꞌ ñeñthpaꞌ ateth otyenet:
“Napaꞌ añchaꞌ nameꞌña masheñ Pedro.”a
Poꞌpoñexhnoñapaꞌ ateth otyenet:
“Napaꞌ añchaꞌ nameꞌña Cristo.”
13 Ñewa,
amaꞌt señoteñeña,
poꞌñoxhpaꞌ ama eñalle atthoch yellopaꞌtetstach Cristo.
Poꞌñoxhpaꞌ amakaꞌye nayeꞌ korsoꞌtamphseto ñeñth eꞌñe sokop atthoch naꞌkeshphatas.
Ñamha ama nayeꞌ sameꞌñeñoth oꞌ sapatarethterroña Partsokop.
14 Napaꞌ atarr neparasyosoꞌteñ Yompor tharroꞌmar napaꞌ ama moenatno oꞌch napatas amaꞌt poesheñarrothesa Partsokop.
Ñewa,
napaꞌ eꞌñe epsheña napat Partsokop,
ñeñthpaꞌ masheñ Crispo ñamha masheñ Gayo.
15 Napaꞌ eꞌñe nokshena tharroꞌmar theꞌpaꞌ amach errothenoth sotno eꞌñoꞌ na sameꞌñeñoth sapatarethterra.
16 Ñewa,
poꞌñoxh ellopaꞌ napach masheñ Estéfanas epoet pamoꞌtseshaꞌ.
Ñerraꞌm eñalltheꞌ poꞌpoñexhno ñeñth napatpaꞌ tharraña ñeñthpaꞌ ama neñoteñe.
17 Napaꞌ ama añekpayeꞌ llesensaꞌnoña Cristo oꞌch napatyes Partsokop ñeñth allpon ameꞌñetsa,
añekpaña llesensaꞌn atthoch oꞌch neserrpareꞌt kowen ñoñets alloch yekeshperra.
Ñamha ama añeyeꞌ koxhneshaꞌ na neñoñ neserrpareꞌtatenso,
tharroꞌmar ñerraꞌm aña neserrpareꞌtatenes koxhneshaꞌ neñoñ nameꞌñatasapaꞌ xhatheꞌ soten attho rroma Cristo korsochopaꞌ ñeñthpaꞌ amakaꞌye es sherbeno atthoch yameꞌñera Cristo.
Añ ñoñets attho rroma Cristo korsocho, ñeñthña ñoñets Yomporo poꞌwamenk alloch aꞌkeshphatyerran acheñeneshaꞌ
18 Poꞌñoxh ñerraꞌm esempo yeserrparen attho Cristo rroma korsocho eꞌñe ya yoꞌchñarothpaꞌ añña acheñeneshaꞌ ñeñth chenkëtsapaꞌ xhach otenapoetañ atthatheꞌ yotatseꞌtyen.
Tharraña ya ñeñthey aꞌkeshphataretheypaꞌ añña ñoñets attho rroma Cristo korsochopaꞌ ñeñthña ñoñetspaꞌ yeñoteñ allothña wena Yompor poꞌwamenk atthoch aꞌkeshphatyerran acheñeneshaꞌ.
19 Tharroꞌmar añ ñoñetspaꞌ eꞌñe anwareth amaꞌt awathotheñ,
ñeñthpaꞌ ateth oten Yompor:
Ñeñth entetsa ñapaꞌ nanakoꞌ es eñoten patsoꞌmarekoppaꞌ napaꞌ oꞌch naꞌwañampeswanet ñeñth poeñoteñ.
Ñamha amaꞌt ñeñth entetsa ñapaꞌ nanakoꞌ eñotañtenapaꞌ napaꞌ oꞌch newaporeꞌtampes attho es eñotatseꞌtyenet.
20 Ñewa,
amaꞌt señoteñeña,
amaꞌt ñeñth nanak es eñotatseꞌtyets arr patsro ama eñalleña ñeñth atarr asherben enten Yompor.
Ñamha ñeñth atarr etsotayenayeñ ñoñets ñeñth ateth anwareth awathotheñ ñamha ñeñth nanak eñoꞌñathtetsañ añe patsro ama eñalleña ñeñth atarr asherben enten Yompor.
Ñetpaꞌ xhatheꞌ otenapoetañ atarrtheꞌ es eñotenet tharraña Yompor oꞌ eñotatway poꞌñoxh ñeñthpaꞌ eꞌñekaꞌye orrena ateth otatseꞌtyenet arr patsro.
21 Tharroꞌmar Yomporpaꞌ eꞌñe poeñoteñoth ñapaꞌ ama pokteyeꞌ enteñe eꞌñe ya yokthaphñothpaꞌ oꞌch yenter Yompor,
amaꞌt yapaꞌ yoteneñ atarrtheꞌ es yeñoten.
Añmapaꞌ ñeñthña pokteꞌ enten Yompor:
ñeñthara kothaphñats ñeñth attho rroma Jesucristo yokop ñeñth xhach enteñet ñerraꞌmrratheꞌ attha yotatseꞌtyen,
añ ñeñthara kothaphñats ñeñthña moenen Yompor oꞌch yeserrpareꞌtoñ alloch aꞌkeshphaterrey alloweney ñeñthey ameꞌñenaya.
22 Ñerraꞌm esempo yeserrpareꞌtach judioneshaꞌ attho Cristo rroma yokop,
ñetñapaꞌ amach asherbenayeꞌ entenetoña yokthaphña tharroꞌmar ñetpaꞌ añach moenet yorrtatanetepaꞌtoꞌ Cristo poꞌpartsoña.
Ñamha ñerraꞌm esempo yeserrpareꞌtateñ ñeñth ama judioneshayeyeto attho Cristo rroma yokop ñetpaꞌxhoꞌña amach asherbenayeꞌ entonayetoña yokthaphña tharroꞌmar ñetpaꞌ añach moenet yorrtatanetepaꞌtoꞌ ñeñthchaꞌ eñotatawet eꞌñetheꞌ poꞌñoxh ateth yoten.
23 Tharraña yapaꞌ añchaꞌña yeserrpareꞌtatanet attho Cristo rroma korsocho yokop.
Tharraña añña judioneshaꞌ poetsenaꞌteñothetpaꞌ amach kowenayeꞌ enteñeto.
Ñamha ñeñth ama judioneshayaye ñetpaꞌxhoꞌña atthach enteñet ñerraꞌmrratheꞌ attha yotatseꞌtyen.
24 Tharraña acheñeneshaꞌ ñeñth oꞌ ameꞌñerra ñetpaꞌ oꞌ xhapanet poeyoxhreto poꞌñoxhpaꞌ Cristo eꞌñe Pompor poꞌwamenkothpaꞌ oꞌch aꞌkeshphaterrey,
ñamha eꞌñe Pompor poeñoteñothpaꞌ oꞌch aꞌkeshphaterrey.
Atthekma oꞌ xhapanet poeyoxhreto ñeñth oꞌ ameꞌñerra amaꞌt ñeñth judioneshaꞌ ñamha amaꞌt ñeñth ama judioneshayaye.
25 Ñeñth ama ameꞌñetsopaꞌ amaꞌt otenapoetañ Yompor pokthaphñapaꞌ atthatheꞌ otatseꞌtyen,
tharraña ñeñthara pokthaphña eꞌñe ña poeñoteñ ñeñthña nanak sherbets.
Acheñpaꞌ amaꞌt atarr es eñoteneñpaꞌ tharraña pokthaphñetpaꞌ ama tama sherbeno tharroꞌmar acheñpaꞌ ama tama es eñoteneto.
Ñamha amaꞌt otenetañ Yompor poꞌwamenkpaꞌ ama aꞌñsheꞌmayeꞌ orrtenopaꞌ tharraña yokoppaꞌ ello metanennay alloweney yewamenk tharroꞌmar yapaꞌ arromñathaya.
26 Ñewa,
masheñneshachaꞌ ñamha noxhaneshachaꞌ,
sokthapeꞌch allempo waꞌñerres Cristo oꞌch sameꞌñera.
Allempo amaꞌt acheñeneshaꞌpaꞌ entaseteꞌth sapaꞌ ama esoyeꞌ señoteꞌthe tharraña Yomporpaꞌ oꞌ waꞌñerres,
ñamha amaꞌt ama sesherbeno,
ñamha amaꞌt ama añeyayso poechemeres amhchaꞌtareth.
Ñewa,
ñatoꞌ poesheñaꞌttsospaꞌ ñeñthes, tharraña ama allowenakmayeꞌ atthekmaso.
27 Añña pokteꞌ enten Yompor oꞌch aꞌkeshphatan acheñ ñeñth acheñeneshaꞌpaꞌ xhach otenapoetañ ñeñthpaꞌ amatheꞌ es eñoteno.
Tharrekop pokteꞌ enteñ Yompor allochñapaꞌ oꞌch penkatan acheñeneshaꞌ ñeñth nanak es eñotatseꞌtyets.
Añpaꞌxhoꞌña pokteꞌ enteñ Yompor oꞌch aꞌkeshphatan acheñ ñeñth acheñeneshaꞌpaꞌ xhach otenapoetañ ñeñthpaꞌ amatheꞌ esoyaye.
Tharrekop pokteꞌ enteñ Yompor allochñapaꞌ oꞌch penkatan acheñeneshaꞌ ñeñth xhach otenapañ ñetpaꞌ atarrtheꞌ es sherbenet.
28 Añpaꞌxhoꞌña pokteꞌ enteñ Yompor oꞌch aꞌkeshphatan acheñeneshaꞌ ñeñth entenet ñeñth ama esosheꞌmayaye ñamha ñeñth atsenaꞌtareth.
Ñamha añ acheñer moenen Yompor ñeñth ama es echeno atthoch sherbhaꞌ amaꞌt mamesha.
Tharrekop moeneñ Yompor allochñapaꞌ ñothetpaꞌ oꞌch waporeꞌtamphsan acheñ pokthaphña ñeñth aña patsoꞌmara.
Eꞌñech orrena enteret acheñ pokthaphña.
29 Ñeñthoꞌmarña ya acheñeypaꞌ amaꞌt poesheñarrotheya ama pokteyaye oꞌch eꞌñe yañeña kowen yentena tharroꞌmar Yomporpaꞌ ama attheyeꞌ entenye.
30 Tharroꞌmar ñaptha Yompor yapoeneꞌña atthoch yapaꞌ korretsayach.
Eꞌñe yeparrokmateñoth Cristo Jesús aꞌkrrateney Pompor.
Ñamha Yomporpaꞌ attho nan Poechemer Cristo ñach yeñotaterreꞌ ñeñth kowentetsa Yeyompor-rekop,
ñamha ñeñthara Cristo ñeñthchaꞌ eꞌñe kowen aꞌpoktateneꞌ yokop atthoch kowen entweney Pompor ñamha ñeñthara Cristo ñeñthña aꞌkowentaterrey Partsokop,
ñamha ñeñthara Cristo ñeñth yetsaꞌterroya yoꞌchñar atthoch yekeshperra.
31 Ñeñthoꞌmar ateth anwarethta Yompor poꞌñoñ awath:
“Ñerraꞌm eseshaychaꞌ es ayeꞌchoxhtatetspaꞌ Yomporekpoepaꞌchña es yaꞌyeꞌchoxhtaten.”