Ateth pha Ananías epoet poethapor Safira
5
Tharraña eñall poꞌpsheñeñ ñeñth ateth phatseꞌth poꞌpoñ,
ñeñthpaꞌ añ paꞌsoꞌcheñ Ananías epoet poethapor ñeñth paꞌsoꞌcheñ Safira.
Añña Ananíaspaꞌ oꞌ vendan allpon poꞌpatseñpaꞌ
2 oꞌ wapatan kelle,
aposan ñeñth allsensareth.
Tharraña ama orayeꞌ wapatwano kelle xhach shekënet.
Tharroꞌmar ñet epoet poethaporpaꞌ ateth aꞌpoktachet oꞌch yoret allpon kelle eꞌñe ñokpoet.
3 Allempoña aposan allsensareth ñeñth oꞌ allponamha kellepaꞌ,
Pedroñapaꞌ ateth och:
—Esoꞌmareꞌt pemnateñ oneñeth oꞌch kothapeꞌchataph poꞌpoñ peyoxhro.
Phapaꞌ pemneñeñ oꞌch peshkëñ amaꞌt Parets Poekamkëñ attho phapaꞌ awoꞌt peyorañ allpon kelle.
4 Ñeñth pepatseñpaꞌ eꞌñe poꞌñoxh ñeñthpaꞌ pho.
Tharraña ñerraꞌm ama pha moenatsñe oꞌch pevendeñpaꞌ ñeñthpaꞌ eꞌñe pokteñ.
Ñamha amaꞌtchaꞌ pevendeñpaꞌ ñerraꞌm ama pha moenatsñe oꞌch phapyeñ ora allpon kelle ñeñth phagappaꞌ,
ñeñth eꞌñe pokteñ ñamha.
¿Errothenotheꞌña phokthapeꞌchña ateth peyoxhro?
Ama yaptheyeꞌ pemnenñe oꞌch peshkaꞌyeñ,
Yomporeꞌnaña pemneñeñ oꞌch peshkëñ ñamha.
5 Allempoña Ananíaspaꞌ ñeñtha eꞌmwapaꞌ athakoꞌrocheꞌ eꞌñe allpaꞌ oꞌ rroma.
Añña poꞌpotantañ acheñeneshaꞌ allempo eꞌmareꞌchetpaꞌ nanak yorenet womenk.
6 Añña yakmaneshaꞌ ñeñth poꞌnareꞌpaꞌ oꞌ wapoetpaꞌ ñetñapaꞌ ephatseꞌchet ñeñth rromats oꞌ anmet aꞌyo all pampoeñetaꞌ.
7 Thematenpaꞌ oꞌ wapa ñamha poethapor ñeñth rromats.
Ñapaꞌ ama eñoteñe oꞌtheꞌ rroma poerrollar.
8 Allempo wapa Pedroñapaꞌ oꞌ aꞌphthoꞌtaph:
—Ñewa,
photen,
¿poꞌñoxhtheꞌ allpona kelle sagap allempo sevendaꞌwa sepatseñ?
Poethaporñapaꞌ ateth och:
—Allponakaꞌye kelle ñeñth yagap.
9 Pedroñapaꞌ ateth otererr:
—Tharraña sapaꞌ awoꞌt saꞌpoktach epaph perrollareñ atethchaꞌ sepha.
Xhaꞌt sotapañ ñatoꞌ oꞌch seshkëñ ñamha amaꞌt Parets Poekamkëñ.
Pekweꞌ oꞌ beꞌthosxhaꞌtwerrmoch ñeñth oꞌ pampaꞌwennaphaꞌ errteꞌ perrollareñ.
Phapaꞌxhoꞌ atthekmapaꞌ anmapetchaꞌ aꞌyo.
10 Eꞌñe allempokma poethaporpaꞌxhoꞌña oꞌ thakoꞌra ñamha eꞌñe alla Pedresho,
oꞌ rroma ñamha.
Allempo beꞌthosxhaꞌtwerr ñeñth anmoeꞌ poerrollareñ,
allñapaꞌ entwerrñañet poethaporpaꞌxhoꞌña oꞌ rroma.
Ñapaꞌxhoꞌña anmetpaꞌ oꞌ pampoeñetaꞌ aꞌyo epoet poerrollareñ.
11 Atarr mechaꞌnaꞌtet allowenet ñeñth pameꞌñeñoth apxhetsa,
amaꞌt allowen ñeñth eꞌmareꞌteꞌpaꞌ xha yorenet nanak.
Añpaꞌ ñeñtha allowa ateth pha Ananíasoñ.
Attho Jesús poellsensarneshaꞌpaꞌ orrtateteꞌth Yompor poꞌpartsoña
12 Añña ñeñth Jesús poellsensarpaꞌ nanak orrtateteꞌth Yompor poꞌpartsoña,
amaꞌt ñeñth acheñeneshaꞌpaꞌ ama poentare atthoch eñochet añmapaꞌ Partsepaꞌt.
Añña ñeñth parro ameꞌñenetpaꞌ arr apxhenet all ocheteꞌth Salomón Popellrraro.
13 Poꞌpotantañ acheñeneshaꞌ amaꞌt eꞌñe pokteꞌ eñcheteꞌth ñeñth ameꞌñetsapaꞌ,
allempoña ñet poemhchañothetpaꞌ ama apxherreto parro.
14 Allempoñapaꞌ alloꞌna atonetnena poꞌpoñexhno acheñeneshaꞌ ñeñth oꞌ ameꞌña.
Shonteꞌ oꞌ ameꞌñana Yompor,
amaꞌt koyaneshaxhno ñamha yakmaneshaxhno.
15 Añña ñeñth atsnaꞌtyetspaꞌ oꞌ anmet aꞌyeneth allekma chopeñeꞌchenet.
Allñapaꞌ oꞌ phanrraꞌtyesoset topantso,
ñamha poesheñaꞌtetspaꞌ ñatoꞌ ora poꞌmayeꞌna.
Tharroꞌmar anmarethetyeset allekma chopeñeꞌchenet allochñapaꞌ ñerraꞌm macheꞌ wena Pedropaꞌ eshekchaꞌ amaꞌt paꞌchoyesheꞌma poꞌpomaꞌmteñapaꞌ xhapchaꞌ ñesheto,
ñatoꞌ atthothpaꞌ oꞌch korrerret.
16 Ñamha amaꞌt allampañoth Jerusaléñothpaꞌ wapatoñ acheñeneshaꞌ atsnañethexhno ñamha amaꞌt ñeñth chorrena oneñeth.
Allochñapaꞌ allowenetpaꞌ oꞌch korraꞌwerret.
Allempo Pedro ñamha Juanpaꞌ abeꞌtharethtet cárcelo
17 Allempoñapaꞌ ñeñth korneshaꞌ ñeñth nanak amhchaꞌtarethpaꞌ eꞌmoñeꞌtan allowen ñeñth ameꞌñetsa.
Ñamha allowen ñeñth parro eꞌñe atthekmoet kothapeꞌchenet ñeñth otenet saduceoneshaꞌpaꞌ oꞌ eꞌmoñeꞌchet ñeñth ameꞌñetsa.
Tharroꞌmar sopeꞌchapretenetñaꞌ,
acheñeneshaꞌpaꞌ eꞌñe kowen enteñet ñeñth ameꞌñetsa.
18 Allempoña allsensarethneshaꞌpaꞌ rromoeñetpaꞌ oꞌ abeꞌtharethtet cárcelo eꞌñe allekma abeꞌtheñet acheñeneshaꞌ.
19 Tharraña amaꞌt abeꞌtharethtetpaꞌ tsapoñapaꞌ oꞌ wapanet Yompor poꞌmhllañotheñer ñeñth wetsa poeꞌntañoth oꞌ toramperranet,
oꞌ xhapaterranet aꞌyenethpaꞌ ateth otanet:
20 —Añ poktetsa oꞌch awes Parets paꞌpakllopaꞌ oꞌch sathomos all oꞌch seserrpareꞌtach allowen acheñeneshaꞌ ora ateth yokrrena etserra kowen Partsokop.
21 Allempoña ñeñtha eꞌmwetpaꞌ eꞌñe awathekma awaꞌmoenet Parets paꞌpakllo,
oꞌ beꞌthosxhaꞌtoset,
allña yexhataꞌmoenet.
Añña ñeñth korneshaꞌ ñeñth nanak amhchaꞌtarethpaꞌ oꞌ xhapaꞌmoen ñamha elloneth allothchaꞌ agotatan amhchaꞌtarethneshaꞌ.
Oꞌch xhapaꞌmoen ñamha allowen ñeñth kotheneꞌ.
Allothchaꞌ agotatan allowen amhchaꞌtarethneshaꞌ ñeñth xhokma aꞌpoktatyeneꞌ ñoñets ñeñth pomporneshaꞌ penet israelenaꞌtarneshaꞌ.
Oꞌña xhaxhaꞌtwetpaꞌ oꞌ serrpareꞌtatannaꞌtet atthoch aꞌpoktachet atethchaꞌ pet.
Allempoñapaꞌ oꞌ agotachet ñeñth abeꞌthatenet cárcelo.
22 Tharraña allempoña xhap cárcelo ñeñth moeñenetpaꞌ ama es entosetoña cárcelo.
Oꞌ poerrerretpaꞌ ateth otweret amhchaꞌtarethneshaꞌ:
23 —Yapaꞌ allempo yexhap cárcelopaꞌ oꞌ yentos cárcel eꞌñe poktakma echarr ayottamphsareth,
ñamha ñeñth kowampeneꞌpaꞌ alla thomxhenet alloth beꞌthenet.
Tharraña allempoña toretpaꞌ,
oꞌponoñapaꞌ ama eseshaꞌ eñalle amaꞌt poesheñarra.
24 Allempoña ñeñtha eꞌmwa amhchaꞌtarethneshaꞌ ñeñth poꞌcapitáner penet ñeñth kowampeneꞌ Parets paꞌpakëll ñamha ñeñth paꞌmhchaꞌtaretherneshaꞌ pen allowen judioneshaꞌ poꞌkornanesharpaꞌ ñetñapaꞌ ateth otet:
—Esokoptheꞌkaꞌye oꞌ xhaꞌnmaxhenettheꞌ.
Theꞌpaꞌ errothwanenchaꞌ pettheꞌ tsapathoneth.
25 Allempoñapaꞌ wapa poesheñarr ateth otosanet:
—Añña ñeñth sabeꞌthat ellerro cárcelopaꞌ theꞌñapaꞌ alla thomxhenet Parets paꞌpakllo yexhatetset all.
26 Allempoña añña capitán ñamha ñeñthchaꞌ yenpoeꞌpaꞌ oꞌ awanmoet alloꞌtsen allsensarethneshaꞌ.
Oꞌña xhapoetpaꞌ oꞌ awenanetaꞌ eꞌñe kowenakma.
Tharraña ama erroth phaneto tharroꞌmar capitánpaꞌ xha mechaꞌtenan acheñeneshaꞌ.
Ñatoꞌ xhoꞌtheꞌ rrolleꞌchet.
27 Oꞌña xhapaterranetpaꞌ nosanet eꞌñe alloꞌtsaꞌyen ñeñth xhokma aꞌpoktatyeneꞌ ñoñets.
Añña korneshaꞌ ñeñth nanak amhchaꞌtarethpaꞌ ateth otanet:
28 —Awañapaꞌ amaꞌt eꞌñe echeꞌxharro yotwas amach seserrpareꞌtatsterrerro ñeñth pokthaphña Jesús.
Tharraña sapaꞌ awoꞌt alla seserrpareꞌtatwerrerr ñeñth so sokthaphña.
Amaꞌt allowen ñeñth yexhetsa arr Jerusaléño oꞌ alla seserrpareꞌtatwererr.
Theꞌñapaꞌ alloꞌ seyowerryerr awoꞌ yemtsach añ Jesús.
29 Allempoñapaꞌ otanet Pedro ñamha ñeñth epoet,
ñetñapaꞌ ateth ochet:
—Añña eꞌñe pokteꞌ amach acheña yameꞌño,
añña Yomporchaꞌña yameꞌña.
30 Sapaꞌ oꞌ sepataꞌpes Jesús tsacho atthoña oꞌ semtsatach.
Tharraña Pomporpaꞌ ña tantaterreꞌ.
Añpaꞌ ñeñthara Yompor ñeñth Poꞌyomporer peteꞌth ñamha awath yatañneshañ.
31 Theꞌña Pomporpaꞌ oꞌ nanak awamenkath peꞌ,
eꞌñe poꞌkowenrothpaꞌ all partsoten.
Allochñapaꞌ atthoch kothapeꞌchaterran israelenaꞌtarneshaꞌ ñamha atthoch kothapeꞌcherret kowen eꞌñe etserra atthoch peretnerranet poꞌchñar.
Ñeñthoꞌmarña Yomporpaꞌ nan Jesús ñeñthchaꞌ Yaꞌkeshphatañer yepen.
32 Ñeñthoꞌmarña theꞌña yapaꞌ yaꞌpotheññañ ateth pena Yompor.
Yompor Poekamkëñpaꞌxhoꞌña ñeñth eñotatets.
Ñeñthara Poekamkëñ ñeñth nennay yeyoxhro,
alloweney ñeñthey ameꞌñenaya ña.
Añpaꞌ allowa ateth otanet Pedro.
33 Allempoña ñeñtha eꞌmwet ñeñth ateth ot Pedropaꞌ añña amhchaꞌtarethneshaꞌ nanak atsrreꞌmatanet,
atarr moeneñetañ awoꞌch moetswet ñeñth allsensarethneshaꞌ.
34 Allempoñapaꞌ añña poesheñarr fariseo ñeñth eꞌñe parro aꞌpoktatyeneꞌ ñoñetspaꞌ oꞌ thomos atthoch eños.
Ñeñth thomosetspaꞌ añ paꞌsoꞌcheñ Gamaliel,
ñapaꞌ ña ñeñth yexhatets ñoñets ñeñth ateth anareth,
tharroꞌmar ñeñth poꞌtarwas pen.
Ña allowen acheñeneshaꞌpaꞌ eꞌñe kowen enteñet.
Gamalielñapaꞌ oꞌ moeñatwerran allsensarethneshaꞌ mameꞌ aꞌyeneth.
35 Ñeñth epoet kothapeꞌchatannenetpaꞌ ateth otanet:
—Masheñe israelneshachaꞌ oꞌch notas:
Eꞌñech kowenakma yaꞌpoktach ñeñth atethchaꞌ yephanet.
36 Sapaꞌ amaꞌt seyerpoeñoña attho awaña oꞌ orrta poesheñarr ñeñth paꞌsoꞌcheñ Teudas.
Ñapaꞌ atarr moeneꞌth oꞌch ayochreshathta.
Shontoꞌ acheñeneshaꞌ ñatoꞌ alloꞌtsenoꞌtheꞌ cuatrocientos ñeñth ameꞌñata.
Allempoñapaꞌ allponmaterrerrpaꞌ oꞌ moetset.
Ñeñthña poeyochreshaꞌpaꞌ oꞌ awanomyerret ñopaꞌttsokmoet.
Allempoñapaꞌ oꞌwañ es kothapeꞌchet.
37 Allempoña allponmaterrerrpaꞌ orrta ñamha poꞌpsheñeñ ñeñth paꞌsoꞌcheñ Judas ñeñth galileoꞌmarneshaꞌ.
Ñapaꞌ tharrempo orrta allempo kellkatyenet paꞌsoꞌchñexhno amhchaꞌtarethesho.
Ñapaꞌxhoꞌña tama yochreshaꞌtana allpon acheñeneshaꞌ.
Allponmaterrerrpaꞌ ñapaꞌxhoꞌña oꞌ chenka.
Añña ñeñth poeyochreshaꞌpaꞌ oꞌ parratseꞌtwerret.
38 Ñeñthoꞌmarña theꞌpaꞌ oꞌch notas,
oꞌch saꞌrroyer ñeñth serrpareꞌteneꞌ ñeñth ateth pena Jesús.
Amach erroth sephatstaneto,
tharroꞌmar ñerraꞌm eꞌñe ñothotheta pokthaphñoth ateth penetpaꞌ ñeñthpaꞌ mameshapaꞌ oꞌch wañerr.
39 Tharraña ñerraꞌm pokthaphñetpaꞌ Yomporeshoth wenapaꞌ amach errothenoth sewaporeꞌtache.
Ñatoꞌ sapaꞌ xha seꞌmoñeꞌteññañ amaꞌt Yompor pokthaphña.
Añpaꞌ ñeñth ateth otan Gamaliel amhchaꞌtarethneshaꞌ.
40 Ateth kothapeꞌchatanet Gamalielpaꞌ eꞌñe pokteꞌ eñchet.
Allempoñapaꞌ alla agotaterran allsensarethneshaꞌ.
Allempoña waxherretpaꞌ oꞌ nalleꞌtatanet amhchaꞌtarethneshaꞌ.
Oꞌ nalleꞌtatwanet amhchaꞌtarethneshaꞌpaꞌ allothñapaꞌ otarethtet ñamha eꞌñe echeꞌxharro:
—Theꞌpaꞌ amach seserrpareꞌtatsterrerro ñeñth ateth pena Jesús.
Allempoñapaꞌ aꞌrroyarethtenet.
41 Allempoñapaꞌ oꞌ awanenet,
oꞌ saꞌneñet ñeñth xhokma aꞌpoktatyeneꞌ ñoñets.
Eꞌñe poksheñeshokmañen awanenet tharroꞌmar Yompor eꞌñe pokteꞌ entanet ñeñthoꞌmar moenatanet oꞌch moeroxhtet ñokop.
42 Allempotheñ patheꞌtets yethpaꞌ xhokmach yexhateteꞌth Parets paꞌpakllo amaꞌt ñamha eꞌñe alla paꞌpaklleto.
Nanak serrpareꞌteteꞌth attho Jesúspaꞌ ña Cristotats.