Ạḍinya omuneniom ịyal dị
ạJon
ạge
1
Mị okumoor oye phọ kụ ụge ḍịnya phọ ạḍien raruomaan nyịna ạnir phọ Ẹnaan ẹsaḅar bọ, rꞌạnmuny phọ ạna. Mị ịphomoghian ni inyina igey. Kạ́mi bịn, oomo phọ ạbuphe molegheri bọ igey phọ ịphomoghian ni inyina, 2 ịdi eḍighi bọ igey phọ edi ni iloghi phọ ayira kụ kịrolonaan ni iyira kꞌagee-pọ.3 Ẹnaan Ọde phọ rꞌạJizos Kraist Ọony phọ ọdi, kụngo ghan iyira ọghor rꞌọnma ighirigiir rꞌẹepho, ịdipho yira odimom bọ igey rꞌẹphomoghian phọ.
Igey rꞌẹphomoghian
4 Mị ubo ni iboom mị ạmiin bọ mọ buniin ạnmuny ạna rọdaph ni igey phọ, ịdipho Ọde phọ ạto bọ ụngo iyira. 5 *Nịr phọ, nyịidipho mị rạlhom ni nyịna mọ oniin ạphomoghian ghan nyoniin. Ọphon phọ mị rạge bọ kómoom ologh. Ọphon kụ ologh phọ ọlogh bọ ni ụngo iyira kꞌẹḅel emiighom mọ. 6 Ooko ghan iilogh phọ ọdi kụ ẹphomoghian phọ ẹphen. Ọphon kụ ologh phọ, ịdipho nyina mẹnaghan bọ ni kꞌẹḅel emiighom mọ: mọ ịtolom ghan ẹphomoghian.
7 Ịbadi awe dị rọparanaan mọ ạJizos Kraist aateneghian ni amite ịdipho oye momite sịen aḅirini phọ rookeleghi we. Ọdo phọ oye phọ ọphon phọ, oye areekeleghian rꞌẠmulogh-ḍien aKraist. 8 Igona loor, ọbo nyina kepiemi ghan bọ rạraar phọ ịpe nyina eghol ghan bọ rekumuan, ẹmoogh ghụn ruunmo phọ ẹmadan.
9 Tọrobo oye lọ apel ghan ḅịle úlhoonaan ịtughemi phọ aKraist, pọ ọ́moogh mụḅoph rꞌẸnaan. Oye phọ ọpo odianaan bọ ịtughemi phọ ọdi ạmoogh ni mụḅoph rꞌỌde phọ rꞌỌony phọ. 10 Oye lọ ạpham ịnon ọdo ịtughemi kụ aru ịteenyom inyina, kẹ́logh otu, ḅịle kẹn kẹ́ngo nyọdi ọphuo, 11 ịdi eḍighi bọ oye lọ ạngo nyọdi ọphuo ạmoogh aani bin sịphe ịkaraph iiḍighi phọ ọdi.
Ikpo ọnhu okureriom
12 Ọbo mị ạmoogh ni iboom ạraraar ọḅeni anyina kụ epel ọsighe ạḍinya rꞌiki kụ ọgeom oruom anyina. Mị aḍuom ghụn ni ologhi mọ mị katu ni yira ọmiinan, ọḅile ọghaaphan, ọbo iboh phọ ayira emunughan.
13 Ạnmuny umarani phọ ạna Ẹnaan ẹsaḅar bọ mopuru nyịna.