Ịlo ọḅaalami ologhi Ẹnaan
13
Oniin ạphomoghian ghan ni nyoniin, ịdipho ạbuo asiya esi aKraist! 2 *Ịitughian ni ọlogh ghan aruuruen otu. Abuniin awe dị oḍighi ghan ịduon phọ úlegheri mem dị bịdi ọloghom otu rụukpaany phọ Ẹnaan. 3 Ịitughian ghan ni bụo ikoli, mụdi nyina rꞌạbidi kụ edi ikoli phọ. Ịitughian ghan kẹn ni bụphe rọmiinom bọ, mụdi nyina rꞌạbidi kụ rẹmiinom.4 Apinien ạkpe ni dị oomo awe kọlogh ghan eghuan. Olhom mọ rꞌạnir phọ oniin ameelom nyoniin! Ẹmina aḍughul phọ bịdi kụ́pue, ịdi eḍighi bọ Ẹnaan keegbo ni ịiruen ẹngo bụwaam ạnmariir rꞌabulhiom ẹmha.
5 *Kẹ́sighe ghuḍum mọ anyina ẹḅam ạnyu ikpoki. Ịlo nyina ẹmoogh ịgbaanyan ghan ni inyina, ịdi eḍighi bọ Ẹnaan mẹḅem ni mọ, “Mị inyina kị́wile. Mị inyina kíghel.” 6 *Kụ esi ịduon phọ yira kọḅem ni rꞌoḍuom ologhi mọ,
“Ọmoogh-we phọ kụ rụlhoghonaan ghan ịmi ḍịghaagh.
Mị kákiilaan.
Oye kuḍighi ịmi eeghe?”
7 Ịitughian bụo ạrumhu phọ anyina, bụphe ọphur bọ ọghaaph ọghaaph phọ Ẹnaan ịḅeni inyina. Ịkiom ologhi ịpe bịdi ọrol bọ sịen aḅirini phọ rꞌọdo aḍuugh phọ bịdi omugh bọ, ẹtuughaany omeeraam mọ ạbidi. 8 ẠJizos Kraist oniin phọ ni iḍue phọ eten bọ rꞌarodon ḅịle kꞌagee-pọ. 9 Kémeera ọdo kịrokiro ịtughemi irorori inyina ẹgbole egey eten phọ. Ẹkpe ni dị ọnma ighirigiir phọ Ẹnaan kụ kạkparami ruwaloor phọ ayira, kóoko ghan iilogh ịlo amalhe. Bụphe ooko ghan bọ iilogh phọ ịphen ụ́moogh sụo.
10 Yira ọmoogh ni enmeny ẹkia dị ariil ạrikia phọ ạbuphe rọpinyonom ghan bọ rịkia sịphe ogbogo ịiḅereghi phọ okpiom bọ rukpe phọ ụ́ko ịko olhe aani ạraraar ạrikia phọ ịpe phọ. 11 *Oyil abiil phọ ayira rạpam ghan ịḅaal ịnam mọ kaḍighom Ẹphan phọ mọ ọsighe owophom ịkaraph, kụ komite erugh oguom nịan ịnam mọ ọze bọ. 12 Ịduon kụ iḍighi kụ ạJizos atenom bọ emitenom ẹmha phọ kụ ogbi bọ oghiigh phọ, pịdi ọdi ạsighe ịḅaal phọ ọdi awophom we phọ esi ịkaraph phọ ạbidi. 13 Ụgua nụun, omite erugh ọteeny nyọdi ophin aani bin umugholoor phọ ọdi, 14 ịdi eḍighi bọ ẹphen phọ yira ụ́moogh ẹmha dị emiigh. Yira ropogh ghan ghụn ọmiin ẹmha phọ ẹpe retu bọ. 15 Ụgua nụun oboom ghan Ẹnaan oomo amem. Ẹphen phọ kụ ẹkia dị ạJizos rụlhoghonaan iyira ḍịghaagh ọphighiron. Ẹphen phọ bịn kụ ẹkia dị bụphe ọsighe bọ ịidoronhu phọ ạbidi rokolom ḍien phọ ọdi rọpighiron ghan. 16 Kébulamaam ghan oḍighi iiḅi, ḅịle lọ oniin kạloghonaan ghan nyoniin ḍịghaagh, ịdi eḍighi bọ ịphen kụ ạrikia dị rẹḅaal ghan ologhi Ẹnaan.
17 Ịnaghanan ghan bụo ạrumhu phọ anyina, ẹdaph ịtooghi phọ ạbidi. Bịdi kụ abukoriom aruwaloor phọ anyina, sịen dị bịdi kọgba bọ ni ịpe bịdi oḍighi bọ oḍighi phọ ọḅeni Ẹnaan. Nyina ẹnaghanan bịdi, pọ bịdi koḍighi ni oḍighi phọ ạbidi rꞌọphalaḅaal ologhi. Ịdipho ílho, pọ bịdi koḍighinom rꞌịḅiphighu, bịn kéḍighi sụo ịngo inyina.
18 Ighol ghan ni iyoor ẹeḅereghi. Yoor ọmoogh ni oḍuom ologhi dị iloghi ayoor iyoor rị́gurogh, ịdi eḍighi bọ yoor rọwa ghan oḍighi ịpe eru bọ igey phọ oomo amem. 19 Mị ịlom ni inyina rạkpaariom mọ ịiḅereghi Ẹnaan mọ ọdi ạnuun ni uḅulemi ịmi iruom inyina.
Ịiḅereghi
20 Ẹnaan meḅeton Jịzos Ọmoogh-we phọ ayira sịphe aḍuugh phọ, ọpo ạtuan bọ ịḅaal phọ ọdi oghirom bọ ịyo kꞌagee-pọ phọ kụ aḍighi bọ Ogbogh Opoghom iyool-ịga phọ. 21 Ẹnaan ẹepho phọ ịngo ni inyina tọrobo egey ịyaar lọ ikuom inyina ọsighe oḍighinom ịpe Ẹnaan rẹwa bọ, kụ ọdi ạtuan ni Jịzos Kraist ạtuugh aḍighi sịphe ạroozo phọ ayira ịpe ẹḅeeraan bọ nyọdi! Igbogh phọ kụ ẹrolonaan Kraist kꞌagee-pọ kꞌagee-pọ! Ẹrol li ịdipho!
Ikpo ọnhu okureriom
22 Bụo asiya, mị rịiḅereghian ni inyina mọ ịnaghanan rꞌọkparam ọghaaph ọkparami iloghi phọ anyina ọphon; ịdi eḍighi bọ ạḍinya phọ ạḍien mị ạge bọ riruom inyina ị́karaghi ịdoony. 23 Mị rạwa mọ nyina ilegheri mọ moseere Timoti, ọnyo asiya phọ ayira, ikoli phọ. Mọ ọdi ạnuun atu, pọ ọdi rꞌạmi kụ kịmiin ni inyina.
24 Ipurunaan iyoor oomo ạbuo ạrumhu phọ anyina rꞌoomo awe phọ Ẹnaan. Ạbuo asiya phọ, bụphe Itali, mipuru inyina.
25 Ooḅi ọghor phọ kꞌẸnaan ạrolonaan oomo phọ anyina!