2 Yuodia rꞌaSintiki, mị rịiḅereghian ni inyina mọ ịgbaaghian ẹphomoghian, ẹrol dọl abumarani esi Ọmoogh-we phọ. 3 Mị rạaḅereghian ni nyịna oye oḍumughian phọ ạmi, mọ pọmoghi ịyal ạnmariir phọ ạbuen, ịdi eḍighi bọ bịdi ụ́logh ạaku ọḅaram ạmi rꞌạKlement rꞌoomo ạbueri phọ, mọgeeghi bọ siḍien phọ ạbidi sịphe ạḍinya aghuḍum Ọmoogh-we phọ, bụphe mọghaaph bọ ooḅi ọghaaph phọ oleenye eleeny.

4 Iboh ghan esi Ọmoogh-we phọ oomo amem. Mị ạḅile ni rạḅem mọ iboh ghan ni.

5 Ịtol dọl dị oomo awe kọmiin eeḅi ẹzo phọ anyina. Ọmoogh-we phọ ạnuun ni ratu. 6 Kẹ́eḅaghamian loor anyina esi ạtorobo ịyaar. Kụ ịiḅereghiom ghan ologhi ạḍiseph ẹlhom ghan Ẹnaan ịlo nyina rẹwa. 7 Kụ ẹepho phọ kꞌẸnaan epel bọ dị oye katue alegheri, keeko ni ịitughian rꞌiloghi phọ anyina esi ạJizos Kraist.

8 Ịlo okureriom mọ, bụo asiya ạmi, tọrobo egey, tọrobo ịlo eghuan, tọrobo ịlo eelenyan, tọrobo ịlo eseleman, tọrobo ịlo ẹnighe, tọrobo eeḅi, tọrobo ịlo eḍighi ịma, tọrobo ịlo ẹkpianaan oboom, iseere ni ologhi ịlo ịphen phọ. 9 Iḍighi ghan ịpe nyina mẹtuugha bọ emeeraam esi ọghaaph phọ rꞌeḍighinom ịyaar phọ ạmi. Kụ Ẹnaan phọ rịngo ghan bọ iyira ẹepho kịrolonaan ni inyina.

10 Mị rabo ni iboom esi Ọmoogh-we phọ, mọ sịen osughanam ọman phọ nyina ẹḅile ni rịitughian ghan ịmi. Ọbo nyina ịwa ghan ni oḍighi ịphen phọ, kụ nyina eepoogh ị́moogh ghan. 11 Mị rákunu ghan mọ nyina ighinom ịmi, ịdi eḍighi bọ mị mạtuugha dọl dị ịlo mị ạmoogh rịgbaanyan ghan ni ịmi. 12 Mị alegheri ni ịdi ạdol ekuom rꞌạdol ẹelha ẹrol. Mị mạtuugha ịdi tọrobo ekpisi, ịlo ẹrol ẹrol, ologhi ạmi rạḅaal ghan ni, mem ọkoony rꞌamem ẹeḍiom, mꞌẹboghogho mꞌekom. 13 Mị katue ni ạdaluan oomo ạraraar lọ eru ghisigh ạmi loor ịikpo phọ aKraist rụngo ghan bọ ịmi.

14 Kụ ọlo meḍighi ọloghonaan ạḍighaagh phọ nyina ịloghonaan bọ ịmi sịen ịiḅaghami phọ ạmi. 15 Nyina ạbuo ạsiosi phọ aFilipai bịn elegheri ni mọ, mem mọ mị ạḍua bọ eelhe phọ aMasidonia, ẹḅel emiighom ooḅi ọghaaph phọ, nyina bịn kụ ạbuo ạsiosi dị inmo ghan ịmi inmo ẹḅile ẹmoogh ịikpia ạḍiseph kꞌẸnaan. 16 ^**Epel eniin amem mọ ikuom bọ ịmi ẹpe Tẹsalonika, nyina kụ iruom ghan ịmi ịyaar ọrolom. 17 Ụ́ḅem mọ ạanyi inmo kụ ịḅeeraan ịmi, mị rạtuan ghan ọbughe ẹelha phọ anyina ẹpe kꞌạke. 18 ^*Nyina mịkpe ịmi ẹloghom ọḅar. Mịboghoghom ịmi nyịidipho Ẹpafroditos mụngo bọ ịmi inmo phọ nyina ẹngo bọ nyọdi oruom ạmi. Ẹnaan ẹsighe ni inmo phọ ịphen ẹseph ịdipho ẹkia eeḅi eḍu dị nyina rẹngo nyọdi. 19 Ịdipho nyina mẹḅophoghan bọ Jịzos Kraist, Ẹnaan phọ ạmi kẹngo ghan ni oomo ịlo ikuom inyina — kụ inmo phọ ọdi kẹman ghan ni ịpe egbogh ẹelha phọ ọdi. 20 Kụ nyịidipho eghuan ẹrolonaan Ẹnaan Ọde phọ ayira kꞌagee-pọ kꞌagee-pọ! Ẹrol li ịdipho!

21 Ipurunaan oomo awe phọ Ẹnaan, bụphe oḍighi bọ bụo ạJizos Kraist. Iiḅi asiya phọ rꞌạmi odi bọ ẹphen mipuru inyina. 22 Oomo awe phọ Ẹnaan odi bọ ẹphen mipuru kẹn inyina. Asiya phọ ayira kꞌaSiza iseere ni inyina ologhi.

23 Ooḅi ọghor phọ kꞌạJizos Kraist Ọmoogh-we phọ ạrolonaan oomo phọ anyina!